Legebiltzar berri batek elkarrizketa erabakitzaile baten alde lan egin dezan, Sortu ahalik eta arinen legeztatzearen alde egin du Nazioarteko Harreman Taldeak, Euskadira egindako bisitan.
Sortu legeztatzea eskatu du Brian Currin Hegoafrikako abokatua buru duen Nazioarteko Harreman Taldeak, Euskadira egin duen bisitan. ETAren jardueraren amaieraren ondoren, legebiltzar berri batek elkarrizketa erabakitzaile baten alde lan egitea proposatu du Currinen taldeak.
Egungo Legebiltzarrean sektore politiko guztiak ordezkatuta ez daudela kontuan izanda, orain martxan jarri litezkeen kontaktuek legitimaziorik izango ez luketela uste dute, ohar batean azaldu duenez. Hori dela-eta, ahalik eta arinen Sortu legeztatzea eta datozen hauteskundeetara aurkezteko aukera izatea eskatu du Currinen taldeak. Orduan, gatazkari heltzeko elkarrizketa erabakitzaile bat jarri ahal izango da martxan, esan dute ohar horretan.
Ordura arte, elkarrizketa hori prestatzeko lanak jorratzeko deialdia egin die alderdiei.
Joan den asteazkenean iritsi zen Nazioarteko Harreman Taldea Bilbora, agente ezberdinekin elkartu eta, etorkizunean, bakea eta normalizazioa jorratuko duen alderdien arteko bilera antolatzeko. Ostiral honetan bukatu da bisita.
Alderdi guztien ordezkariekin biltzeko aurreikuspena zuten, Euskadiko PPko kideekin ez ezik, Antonio Basagoitiren esanetan Currinen taldeak ez baitu zer esanik.
