New Yorkeko taldea The Stars Are Indifferent To Astronomy lanarekin itzuli da. Bob Dylanen kantuak Amnesty Internationalen 50. urteurrena ospatzeko aterako dituzte disko laukoitzean.
Nada Surf talde estatubatuarra bueltan dugu. Lau urtean isilean egon ostean, estudioko zazpigarren lanarekin datoz New Yorkekoak, The Stars Are Indifferent To Astronomy diskoa besapean hartuta. Jatorrizko taldekideak indartsu itzuli dira disko berriarekin, zuzeneko musikaren indarra berreskuratu nahi izan baitute bertan
New Yorken bertan grabatu dituzte The Stars Are Indifferent To Astronomy diskoa osatzen duten kantu guztiak. Taldeak bere ohiko soinuari eutsi dio baina 60ko hamarkadako pop ingelesaren, post-punkaren eta indie klasikoaren ukituak ere antzeman ahal izango ditugu abesti berrietan. Disko berria aurkezteko bira ez da Euskal Herrira iritsiko baina Santiagon, Madrilen eta Bartzelonan arituko dira otsailaren 17an, 18an eta 19an.
Amnesty International erakundeak 50 urte beteko ditu eta mende erdi hori behar bezala ospatzeko, Chimes Of Freedom: Songs Of Bob Dylan lana osatu du. Disko laukoitza da eta Minnesotako musikari mitikoaren 72 abestiren moldaketaz osatuta dago. Musikari eta talde ezagun ugarik hartu du bertan parte, besteak beste, Lenny Kravitz, Rise Against, Patti Smith, Queens Of The Stone Age, MIley Cyrus, Adele, Bryan Ferry, Bad Religion, Maroon 5, Kesha, My Chemical Romance, Elvis Costello eta beste hainbat musikari eta talderen moldaketak bildu baitituzte lan horretan.
