ETAk armak utzi behar dituela eta Gobernuak espetxe-politikan pausoak eman behar dituela uste du Patxi Lopezek.
ETArekin hitz egitea ez da beharrezkoa Patxi Lopez lehendakariarentzat, eta taldeak armak utzi eta desagertu egin behar duela uste du.
Ez dira elkarrizketak behar, beharrezkoa dena ETAk armak uztea eta Gobernuak espetxe poltikan pausoak ematea da, adierazi du Gara egunkarian egin duen elkarrizketa batean.
Espetxe politikan Gobernuaren pausoak espero ditu lehendakariak. Euskadin adostasuna dago espetxe poltika ezberdin baten inguruan, gainera, legedian onartuta dago eta horrek, presoak hurbiltzea, birgizarteratzea eta oso larri dauden presoak espetxetik ateratzea ahalbidetzen du.
Gai hauek guztiak, azken bileran Mariano Rajoyri helarazi zizkiola adierazi du.
Arnaldo Otegiren kartzelatzea euskal gizartearen nahiaren eta iritziaren kontrakoa da, gizarteak ez du ulertzen, esan du lehendakariak.
Ezker abertzalearen legalizazioa
Euskal Autonomia erkidegoko datozen hauteskundeetan ezker abertzalea legeztatuta beharko lukeela uste du Patxi Lopezek, eta ez dituela aurtengo udazkenera aurreratuko gaineratu du.
Dagoeneko existitzen dena legeztatzea besterik ez da, gainera ezker abertzaleak erakunde garrantzitsuak ditu bere gain, Gipuzkoako Aldundia eta Donostiako Udala, besteak beste, eta ordezkatzen dituen alderdi bat izateko eskubidea dute, esan du
ETAk jarduera armatua uzten zuela iragarri zuenetik Euskadin bizi den aroa sendotzeko formulak bilatuko dituela azaldu du.
Lehendakariarentzat etorkizunean lau esparrutan lan egin behar da: memoria eta biktimen papera; gertatutakoaren kontakizuna; gorrotoak ezabatzeko pedagogia demokratikoa; eta ETAren existentziaren ondorioak (bertan espetxe politika sartzen du).
