Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Zentzumenen bidez hainbat elikagairen analisia egiteko metodoak garatzen ari da EHUko laborategi batek


2009-01-21 13:38

BILBO, 21 (EUROPA PRESS)

Euskal Herriko Unibertsitateko (EHU) Zentzumenen Analisiaren Laborategian (LASEHU) zentzumenen bidez hainbat elikagairen analisia egiteko metodoak garatzen ari dira. Izan ere, elikagaiak era askotara ikertu daitezke, analisi fisikoak, kimikoak edo mikrobiologikoak eginez, esaterako, baina baita zentzumenen bidez ere, eta kasu horretan, dastatzaile-taldea da produktua aztertzen duen tresna, EHUtik azaldu dutenez.

Zentzumenen bidezko analisiaren bitartez, produktu batek sortzen dituen sentsazioak neurtzen eta ebaluatzen dira. Analisi hori hainbat sektoretan erabiltzen da, hala nola ehungintzan, automobilgintzan eta elikagaigintzan. Kasu bakoitzean, ezaugarri sentsorialak ebaluatzeko metodoak garatu behar dira. Hala, produktuek definitzen dituzten ezaugarriekin bat egiten dutela ziurta daiteke. Analisi-mota hori aplikatuz, produktuen gutxieneko kalitatea berma dezakete ekoizleek.

LASEHU EHUko Farmazia Fakultateko Farmazia eta Elikagaien Zientzia (Nutrizioa eta Bromatologia) Sailekoa laborategia da. Elikagaien zentzumen-analisiaren inguruan egiten du lan, bereziki, kalitate-bereizgarriak dituzten elikagaien kalitate-kontrolean -jatorrizko deitura dutenetan, adibidez-.

Idiazabal gaztaren eta Arabako Errioxako ardo beltz gaztearen analisia egiteko metodoak garatu dituzte, eta upelean ondutako Arabako Errioxako ardo beltzaren, Bizkaiko Txakolinaren, Arabako Txakolinaren eta Euskal Okelaren analisi-metodoak garatzen dabiltza orain.

PROZESUA

Elikagai baten zentzumen-analisiaren metodoa garatzeko, adituak biltzen dira -ekoizleak, gastronomoak, teknikariak eta abar-. Haiekin, produktuaren kalitatea neurtzeko behar diren parametroak ezartzen dituzte, hala nola ezaugarriak, erreferentziak eta eskalak.

Metodoa garatuta dagoenean, dastatzaile-talde bat produktu jakin bat ebaluatzeko entrenatzen dute, eta aukeraketa-proba batzuk eta elikagaiak ebaluatzeko oinarrizko entrenamendua gainditu behar dituzte, beharrezko zentzumen-sentsibilitatea dutela ziurtatzeko.

Entrenamenduak irauten duen hilabeteetan, metodoan adostutako eskalen, erreferentzien eta abarren arabera ebaluatzen ikasten dute dastatzaileek, eta, pixkanaka, produktuaren ezaugarri guztiei puntuak ematen ikasten dute. Entrenamenduaren ostean, dastatzaile bakoitzak aditu-taldean egoteko adinako gaitasuna duela frogatu behar du proba batzuen bidez (prestakuntza).

Metodoan, dastatze-prozesuaren xehetasun guztiak ezartzen dira: parametroen ebaluazio-ordena, horiek ebaluatzeko metodologia, puntuaketa-irizpideak eta abar.

Hasteko, irizpideak bateratzeko dastatze bat egiten da, talde osoak era berdintsura ebaluatzen duela ziurtatzeko, eta ondoren egiten da dastatzea. Produktuaren itxurak usaimen eta dastamen bidezko analisian eragina izan dezakeen kasuetan, dastamen eta usaimen-analisia ilunpean edo argi gorri eta berdeekin egiten da. Ondoren, argi naturalaren antzeko argiarekin, itxura ebaluatzen da. Gainera, dastatzean eragina izan dezaketen faktore guztiak kontrolatuta daude: produktuaren dastatze-uneko tenperatura, gelaren tenperatura eta hezetasuna eta abar.

Lortutako datuekin, produktu bakoitzean dastatzaileek identifikatu dituzten ezaugarri positibo eta negatiboen txostena idazten du ikertzaileak. Horiekin, produktuaren fitxa teknikoa osatzen da, eta, hala, produktuaren ezaugarri sentsorialen eboluzioa azter daiteke.

ZENTZUMEN-MEMORIA

Dastatzaileek zentzumen-memoria izan behar dute, hau da, ezaugarri berdinak beti era berean identifikatzen jakin behar dute. Beraz, dastatze batetik bestera denbora-tarte bat utzita, produktu berari emandako notak berdintsua izan behar du. Horrekin lotuta, dastatzaileek gai izan behar dute produktu bera egun berean hainbat aldiz berdin puntuatzeko, nahiz mota bereko produktu desberdinak bereizteko.

Emaitzen fidagarritasuna bermatzeko, dastatzaileek urtero entrenatu eta prestatu behar dute. Hala, taldearen gaitasun teknikoa frogatzen da. Elikagai baten zentzumen-analisian, dastatzaile-taldea azterketarako makina bihurtzen da, eta ongi kalibratutako dastatzaile-talde batek beste ezaugarri batzuk neurtzeko eginiko azterketen zehaztasun bera izan dezake.


371 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin