Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Xirula Mirulak Kukuketan, jolaserako kantak liburu-diskoa atera du txikienek euskaraz kanta eta jolas dezaten


2006-02-20 10:21



BILBO, 20 (EUROPA PRESS)

Musikak eta jolasak haurraren garapenean eragin onuragarria besterik ez dutela sinestuta, Xirula Mirulan urteak daramatzate Euskal Herriko haurrei zuzendutako lanak plazaratzen, musika, jolasak eta euskara uztartuz. Eta haurrei bakarrik ez, baita horien gurasoei ere. Azken alea Kukuketan, jolaserako kantak liburu-diskoa da.

Komun ikatu batean, Xirula Mirula Musika Hezkuntzarako Saialekuan 25 urte daramatzate musika, kantak eta jolasak tresna pedagogiko gisa erabiltzen, Imanol Urbietaren sormena baliatuz. Orain arte Imanol Urbietak eta Xirula Mirulak sortu eta argitaratutako lanak 3 urtetik aurrerako haurrei begira eginak izan dira, baina beti somatu izan da txikiagoekin lan egiteko material falta.

Horrela, duela lau urte inguru, sehaska kantez osatutako CD bat egin zen: Kunkun Lo Lo. Disko horren 16.000 ale saldu dira eta gehienak udalek erosi zizkiguten, jaioberriei oparitzeko.

Haurren eguneroko biziera eta bizipenak kantuz islatzea egokia litzatekeela pentsatu zen, izan ere, kantua bada zerbait berezia haurrentzat. Horrela bada, haur txikienen egunerokotasunari lotutako hainbat gai aukeratu eta, Imanolekin hitz eginda, berak musika jarri eta kantak sortu zituen, gai horien bueltan.

Horiexek dira Kukuketan, jolaserako kantak liburu-diskoan jasota daudenak. Bertan haur txikiekin egiteko 25 jolas-kanta agertzen dira. Guztiek helburu berdinarekin egin dira: haurrari bere garapenean laguntzea. Jakina da bizitzako lehen hiru urteetan hazi eta garatzen dela azkarren haurra, eta jolasa dela haren espresiobide naturalena. Dena da jolasa urtebeteko haurrarentzat. Oraindik hitzez bere sentierak adierazteko gai ez denean, gorputz-hizkuntza erabiltzen du.

Liburu-disko honetako 25 kantuak gurasoek euren haur txikiekin euskaraz jolas egiteko pentsatuta daude. Lehenengo abestia haurra esnatzen den unerako egin dugu eta azkena, berriz, oheratzen denerako. Tartean egun luze bat planteatu dugu, non haurrak bere hartzatxoarekin, eskutxoekin, baloiarekin... jolasten duen. Zabuan ibiltzen da, izadiko soinuak entzuten ditu, hotsekin jolasten du, bazkaltzen du, ezkutaketan, kukuka, jolasten du, negar egiten du, bainatzen da... eta abar.

Gaurko gizartean aurrerapen handiak ditugu baina, zoritxarrez, sarritan denbora falta zaigu gure seme-alabekin jolasteko, eta hori ezin du inork eskaini, baina bai tarte horietan haur txikiarekin euskaraz jolastu eta komunikatzeko baliabideak. Haur eskoletarako ere egokia delakoan gaude, baina gure helburu nagusia familia da. Gurasoa izan dadila haurrarekin kantatu eta jolastuko duena.

KANTAK, AHOLKUAK ETA PARTITURAK

Kukuketan, esan bezala, liburu-diskoa da. Liburuarekin batera doan CDa erabiliz entzun daitezke lan honetarako prestatu ditugun 25 kantak. Liburuan bertan, berriz, Ruben Franciaren marrazkiekin hornituta, kanta bakoitzaren hitzak eta musiken partiturak jarri ditugu.

Horiekin batera, eta jolaserako edo jarduera zehatzetarako kantak direla ahaztu gabe, kanta bakoitzari dagokion jolasaren azalpena, aholkuak eta proposamenak txertatu ditugu liburuan, gurasoek kanta eta jolas bakoitza nola, noiz eta zertarako erabil dezakeen jakiteko.

Diskoko kantetan, 25 urte hauetan gure lan gehienetako ahotsa izan den Jaione Eskuderoren ahots eztiarekin eta hainbat haurrekin batera, Zarautz Abesbatzako kide batzuen laguntza ere izan dugu, batik bat gizonezkoen ahotsak ere nahi genituelako. Materiala familiari begira egina dagoenez, ezinbestekoa zen gizon ahotsa egotea, nolabait aitaren rola betetzeko.

Honakoen ahotsak entzun daitezke diskoan: Jaione Eskudero, Javi Ondarra, Iñaki Escudero, Axel Eizmendi, Erik Eizmendi, Larraitz Zubeldia, Julia Urreaga, Alazne Aizpurua, Ione Gesalaga, Natalia Intxauspe, Olatz San Miguel eta Imanol Urbieta.

Argitaletxe askok, haurrentzat materialak kaleratzerakoan, lehengo lanetara jotzen dute sarri. Guk, aldiz, berriak sortzearen aldeko apustua egiten dugu normalean, eta Kukuketan liburu-diskoa eskuetan dutenek ere nabarmenduko dute hori. Alde horretatik, Imanol Urbietaren sormenarekin kontatzea luxua da, dudarik gabe.

Material asko sortu dugu jada ildo beretik, txikienekin eta hauen gurasoekin pentsatuta, baina orain ikusteko dago zer nolako irteera duen Kukuketan liburu-diskoak. Horren arabera gehiago argitaratzen joango gara.


989 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin