Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Urdaibaiko Garapen Iraunkorrerako Estrategia berriak 553 milioi euro xedatuko ditu zazpi urtetan zenbait egitasmorako


2009-01-15 13:56

2009-2015 aldian gauzatuko da estrategia, oinarrizko lau ardatzen inguruan eta 12 ildo jarraituz, eta guztira 62 ekintza zehaztu dira

BILBO, 15 (EUROPA PRESS)

Urdaibaiko (Bizkaia) Garapen Iraunkorrerako Estrategia berriak 553 milioi euro xedatuko ditu datozen zazpi urteetan eskualdeko gizarte, ekonomia eta ingurumenaren arloak suspertzeko giltzarri izango diren egitasmoetarako.

Esther Larrañaga Eusko Jaurlaritzako Ingurumen eta Lurralde Antolamendu sailburuak 2009-2015 aldirako Urdaibaiko Biosfera Erreserbaren Garapen Iraunkorrerako Estrategia aurkeztu du gaur Gernikan. Bere esanetan, hainbat eragile sozialekin eta herritarren partaidetzarekin diseinatu den estrategia betearazita, Urdaibai gune berritzailea bihurtzeko giltzarri izango diren egitasmoak sustatuko dira. Horretarako, ingurumen ondarearen eta garapen ekonomiko zein sozialaren arteko oreka erraztuko duten ekintzak burutuko dira.

Eskualdearen erabateko garapena bultzatzeko asmoz, 60 ekintza baino gehiago aurreikusi ditu planak, lau ardatz estrategikoen inguruan sailkatuta eta 12 ildo lehenetsiei erantzutearren.

Lurralde eredu iraunkorra zehazten du lehenengo ardatzak. Hori gauzatzeko bidean ezinbestekoa izango da Gernika-Markina eremurako Lurralde Zati-Plana onartzea, Erreserbaren Erabilpen eta Kudeaketarako Gida Plana eta Natura Sarea 2000ren Kontserbazio Bereziko Eremuak Urdaibaien finkatzen dituzten agiriak berrikusi eta eguneratzea. Era berean, eskualdearen irisgarritasuna eta loturak hobetzea aurreikusten du lehenengo ardatzak.

Horren harira, tren zerbitzu eraginkorragoa behar da, bai eta garraio publikoa berrantolatzea eta errepide berriak eraikitzea, besteak beste, Bermeo, Sollube eta Autzaganetik iristeko.

Bigarren ardatza ondarea eta bioaniztasuna babestean eta zaintzean datza. Ondorioz, ingurumena leheneratzeko, birsortzeko eta hobetzeko egitasmoak burutuko dira (Gautegiz-Arteagako padurak, Muruetako triangelua edo Laidako hondartzaren haremunak, besteak beste), eta, batez ere, landare exotiko inbaditzaileak kenduko (Baccharis halimifolia eta Cortaderia selloana).

Ekintza horiez gain, erakundeen arteko akordioak bultzatuko dira, bertako eta nazioarteko zaintza sareetan parte-hartzea eta, halaber, ikerketaren garapena. Horrela, egoitza Madariaga Dorretxean duen Euskal Autonomia Erkidegoko Bioaniztasun Zentroa izango da EAEko ingurumena ikertzeko eta ezagutarazteko erreferentea.

Gainera, Lurraldearen Saneamendurako Ekintza Plana betearazteko ezinbesteko ekintzak ere barne hartzen ditu atal honek (Lamaraingo Hondakin Uren Araztegia eta biltodi erraldoien eraikuntza lanak amaitzea). Energiaren alorrean, berrikusi egingo da Urdaibaiko Ingurumenaren Energia Plana, hobetu egingo da argindarraren banaketa sarea, eta garapenean iraunkortasun irizpide gehiago ezarriko dira.

BERRIKUNTZA ETA BIZI KALITATEA

Hirugarren ardatzaren arabera, berrikuntza da ekonomia lehiakorra lortzeko eragilea. Ikuspegi ekonomikoan, honako proiektu hauek aurreikusi ditu: Miango-Agerre-Untzetako jarduera ekonomikoen sektorea eraikitzea, eskualdean Tokiko Garapen Agentzia sortzea, Biosfera Erreserbarekin lotutako kalitatezko marka-irudia sustatzea eta Urdaibaiko Turismo-Garapen Iraunkorrerako Plana eguneratzea.

Laugarren ardatzak bizi kalitatea areagotzea du helburu, gizarte, kultura eta aisialdirako ekipamenduak hobetuz, gizarte zerbitzuen eta baliabide sozialen eskaintza handituz eta kultura tradizionala sustatuz. Gizarte arloan, nabarmentzekoak dira menpekotasun egoeran, gizarteratze programaren batean edo Immigrazio Planen barruan daudenen beharrak asetzeko bultzatuko diren politika eraginkorrak.

Laugarren ikuspegi estrategiko honetan, zenbait ekintza aurreikusi dira eskualdeko biztanleen parte-hartzea ziurtatzeko eta beren ekimen eta engaiamendua bideratzeko, baita parte-hartze publikorako eta herritarrak artatzeko prozedura ereduak sortzea ere. Honetarako, Tokiko Agenda 21eko prozesuak bultzatuko dira, eta herritarrentzako ingurumen hezkuntza jarduerak antolatuko.

553 MILIOI EURO

2009-2015 aldirako Garapen Iraunkorrerako Estrategiak eragile eta erakunde guztien konpromisoa eskatzen du, eta guztira 553 milioi euroko inbertsioa egingo da Urdaibaiko lurretan datozen zazpi urteetan.

Urdaibaiko Biosfera Erreserban jarraitu beharreko jarduera ildo lehenetsiak irudikatzen ditu Garapen Iraunkorrerako Estrategiak. Egitasmo zenbaitentzako inbertsioak ematea erakunde eskudunen ardura izango da: eskualdeko udalak eta zerikusia duten Bizkaiko Foru Aldundiko eta Eusko Jaurlaritzako Sailak.

Agiri estrategikoan zehazten diren ekintzez gain, bestelako ekimenak ere aurrera eraman ahalko dituzte erakunde eskudunek, baldin eta Estrategiak finkatutako helburuak sendotzen badituzte. Engaiatutako erakunde guztien parte-hartzean eta konpromisoan oinarritutako zuzentarau estrategikoak dira horiek, hain zuzen ere.

Azkenik, Urdaibaik Biosfera Erreserba gisa duen balioa kontuan hartuta, areagotu egingo da eskualdeko bizi kalitatea. Garapen Iraunkorrerako Estrategiak Euskadi erreferentzia bihurtzen lagundu nahi du, Urdaibaik ikerketarako, esperimentaziorako eta ekimenen garapenerako eremu berritzaile gisa duen papera sustatuz, ingurumen ondarearen eta garapen ekonomiko eta sozialaren arteko oreka bilatzeko.


553 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin