Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-UEUk eta EHUk Inguma datu-basean lankidetzan aritzeko hitzarmena sinatu dute


2006-09-27 14:27

EHUren euskarazko produkzio zientifikoaren erreferentziak Inguma datu-basean katalogatzea da hitzarmenaren helburu nagusia

BILBO, 27 (EUROPA PRESS)

Udako Euskal Unibertsitateak (UEU) eta Euskal Herriko Unibertsitateak (EHU) Inguma Euskal Komunitate Zientifikoaren datu-basean lankidetzan aritzeko bigarren hitzarmena sinatu dute. 2002ko uztailean lehenengo hitzarmena sinatu zuten erakunde biek eta gaur izenpetu den hitzarmen honi esker lankidetzaren bidea berretsi dute.

Dokumentu honen bidez, sinatzaileek Euskal Komunitate Zientifikoaren Datu-Basea (Inguma) unibertsitarioen curriculum-garapenerako erabilgarritasun handiko lanabesa dela adostu eta bi erakundeen arteko elkarlana luzatu dute.

Inguma, Bizkaiko Foru Aldundiaren laguntzaz, UEUk sortu eta garatutako Euskal Komunitate Zientifikoaren datu-basea da. Bertan azken 30 urteotan unibertsitate mailako zientzia eta jakintza-alor bakoitzean euskaraz ekoitzi denari buruzko oinarrizko informazioa eskaintzen da. Era honetan, Inguma datu-basean Euskal Komunitate Zientifikoan oinarri diren produktuak eta egileak biltzen dira.

UEUko zuzendari Lore Erriondok eta EHUren Euskara errektoreorde Ludger Meesek gaur sinatu duten lankidetzaren helburu nagusia da EHUren euskarazko produkzio zientifikoaren erreferentziak Inguma datu-basean katalogatzea. Izan ere, EHUk euskarazko produkzio zientifiko oparoa duen unibertsitatea da eta oinarrizkoa da Inguma datu-basea erreferentzi hauekin osatzea.

EHUren euskarazko produkzio zientifikoa bere osotasunean barneratuko da Euskal Komunitate Zientifikoaren datu-basean, hau da, idatzizko (liburuak, aldizkarietako artikuluak, ...) zein ahozko produkzioa (irakasgaiak). Hala ere, aipatzekoa da lankidetzaren bitartez, Euskal Herriko Unibertsitatean euskaraz garatu diren ikerketen datuak katalogatu eta publikora zabalduko direla www.inguma.org-en bitartez.

Izan ere, lankidetza honen ondorioz euskarazko ikerketa-lanen gaineko ezagutza ahalbidetuko da. Ondorioz, ikerketen eta ikerlarien gaineko erreferentziak Inguman izango dira.

Liburuen kasuan, UPV/EHUk edozein formatutan argitaratutako liburuen gaineko erreferentziak barneratuko dira Inguman, hau da, ohiko paperezko formatuetan zein formatu digitalean argitaratzen diren liburuen erreferentziak. Beraz, formatu digitalean soilik argitaratzen diren argitalpenen datuak ere Euskal Komunitate Zientifikoko datu-basean katalogatuko dira.

INGUMA

Inguma unibertsitate mailako lan-tresna eta baliabidea da. Euskarazko produkzioa zientifikoa bildu, honen berri eman eta zabaltzea du helburu. Erreminta eraginkorra da: produkzio osotasunean biltzen du, hau da, euskarazko idatzizko zein ahozko produkzio zientifikoaren erreferentziak biltzen baititu, (25.760 dokumenturen gaineko erreferentziak gaur egun) adituekin harremanetan jartzea ahalbidetzen duelako eta 4.600 dokumenturen gaineko kontsulta zuzena egiteko aukera ematen baitu.

EHUko Euskara errektoreordea den Ludger Mees-en ustez, Euskararen normalizazioaren prozesuan behar beharrezkoa da indarrak biltzea. Hori dela eta, komuneko interesak eta helburuak daudenean gizarte eragile publiko eta pribatuekin elkarlana bultzatzea erabaki dugu aspaldi, eta erabaki honen beste ondorio bat sinatu berri dugun hitzarmen hau da.

Izan ere, bere esanetan, euskarazko jarduera eta ekoizpen handiena duen euskal unibertsitaterik gabe, alegia, Euskal Herriko Unibertsitatearen datuak sartu gabe, Inguma hanka motz geldituko litzateke. Orain, berriz, edozein interesaturentzat balio handiko tresna bihurtu nahi dugu UEUrekin batera.

Bestalde, Lore Erriondo UEUko zuzendariak azaldu du UEUrentzat Inguma esku artean duen proiekturik garrantzitsuenetarikoa dela, eta bere helburua, euskal komunitate zientifikoa trinkotzea eta euskaraz egiten den produkzio kulturala eta zientifikoa gizarteari hurbiltzea dela zehaztu du.

Gaur egungo baliabide teknologikoei esker, produkzio zientifikoaren erreferentziez gain, Inguma datu-basean beste pauso bat eman dugu eta une honetan ia 5.000 dokumentu zuzenean kontsulta daitezke. Hau ez litzateke posible izango elkarlanaren bidea jorratuko ez bagenu, nabarmendu du.

Bere iritziz, proiektu honentzat ezinbestekoa da lankidetzan aritzea unibertsitate zein goi mailako hezkuntza erakundeekin, datuen bilketa eta osotasuna bermatzeko. Horregatik, gaur sinatu dugun hitzarmenak balio handia du bai UEUrentzat eta Ingumarentzat bereziki, izan ere, Euskal Herriko Unibertsitatea erreferentzia zuzena baita euskarazko produkzio zientifikoan, gaineratu du.


127 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin