Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Segurtasun-uhalaren, haurrentzako eserlekuaren eta eskola-garraioaren gaineko zaintza kanpaina hasi du Ertzaintzak


2006-11-06 17:36

BILBO, 6 (EUROPA PRESS)

Ertzaintzak eta Euskal Autonomia Erkidegoko hiri eta herrietako udaltzaingoek segurtasun-uhalaren, ibilgailuetan haurrentzako eserlekuen erabileraren eta eskola-garraioaren inguruko zaintza kanpaina hasi dute gaur, herri barruko eta herri arteko errepideetan. Errefortzu-kanpaina hau hilaren 19ra arte luzatuko da eta gidariak eta bidaiariak aipaturiko gailuen inguruan kontzientziatzea eta horiek gehiago erabiltzea du helburu, eta baita EAEko eskola-umeak garraiatzeko baldintzak hobetzea ere, Eusko Jaurlaritzako Herrizaingo Sailak gaur jakinarazi duenez.

Eusko Jaurlaritzako Trafiko Zuzendaritzaren datuen arabera, 2005ean errepideetan istripua izan zuten ibilgailuetako bidaiarien artean igo egin zen segurtasun-uhalaren erabilera, %67ra iritsita. Bide Segurtasunerako Plan Estrategikoa 2003-2006an jarri zen helburua bi puntutan gainditu zen horrela.

Datozen bi asteetan, Ertzaintzak eta udaltzaingoek ibilgailu arinetan eta garraiorakoetan hiru segurtasun-gailu horien erabilera zaintzeko kontrolak areagotuko dituzte, herri barruko bideetan zein hiriartekoetan, eta baita eskola-umeak garraiatzeko baldintzen ingurukoak ere.

Bestalde, Eusko Jaurlaritzako Industria Sailak ere parte hartuko du kanpainan. Informazioa bidaliko du Euskadin Ibilgailuen Azterketa Teknikoa (IAT) egiten duten zentroetara bi helbururekin: segurtasun-uhalen egoera sakon aztertzea bermatu eta erabiltzaileak horren garrantziaz kontzientziatzeko.

Gainera, epe horretan, Herrizaingo Sailak, Mapfre Fundazioko Bide Segurtasuneko Institutuak eta RACVN elkarteak kanpainak eta iragarkiak indartuko dituzte modu bateratuan, gai horren inguruan kontzientziazioa handitzeko.

Eusko Jaurlaritzako Trafiko Zuzendaritzaren aburuz, horrelako kanpainek eta beste ekimen batzuek segurtasuna bermatzeko gailuen erabilera egokia areagotzen laguntzen dute. Bide Segurtasunerako Plan Estrategikoa 2003-2006ren adierazleetako batek errepideetan istripua izan duten ibilgailuetako bidaiarien artean zenbatek zeramaten segurtasun-uhala zehazten du.

Horrela, 2001ean, %57,2k zeramaten, eta 2004an, aldiz, %64k. 2005ean gailu horren erabilerak gora egiten jarraitu zuen (%67ra iritsi zen), Plan Estrategikoak ezarritako helburua (%65) bi puntutan gainditu arte. Herri barruko bideei dagokienez, horren erabilera %44koa zen 2004an.

Segurtasun-uhala eta haurrentzako segurtasun-eserlekua erabiltzea oso garrantzitsua da lesio larriak zein heriotzak saihesteko. 50 kilometro orduko abiaduran pertsona batek hartzen duen kolpea eta bigarren pisu batetik jausita hartutakoa antzekoak dira.

Beste alde batetik, Deustuko Unibertsitateak Eusko Jaurlaritzako Trafiko Zuzendaritzarekin eta Babygap enpresarekin elkarlanean egindako txosten baten arabera, bidaia luzeetan laburretan baino gehiago erabiltzen dira haurrentzako segurtasun-eserlekuak.

Ikerketaren arabera, 25 kilometro baino gehiagoko ibilbideetan joan-etorrien %94,5etan erabiltzen dira, eta % 75era jaisten da 5 eta 25 kilometro arteko ibilbideetan. Bost kilometro baino gutxiagoko tarteetan, berriz, are txikiagoa da gailu horien erabilera (% 70).

Zaintza eta kontzientziazio kanpaina hau Bide Segurtasuneko Plan Estrategikoa 2003-2006 egitasmoaren barruan dago. Plan horretan, Eusko Jaurlaritzak, foru aldundiek, udalek eta trafikoarekin eta errepideekin harremana duten erakunde pribatuek hartzen dute parte.

ESKOLA-GARRAIOA

Gaurtik aurrera, ikasturte hasierako lehen hilabeteetan egin ohi den moduan, eskola-garraiorako erabiltzen diren autobusak aztertuko dituzte. Foru aldundietako Garraio sailetako inspektoreek, Ertzaintzaren agenteek eta EAEko hiru hiriburuetako udaltzaingoek egingo dituzte azterketa horiek.

Ertzaintzak egiten duen azterketak izaera administratiboa du; zerbitzua egoki emateko ibilgailuek eduki behar dituzten baimen eta dokumentuak kontrolatzen dira. Horretarako, foru aldundietako Garraio sailek emandako zerrenda erabiltzen dute, baldintzaren bat bete ez duten ibilgailuak (ibilgailuen azterketa teknikoa edo azterketa bereziak, esaterako) aurretik aukeratzeko modua ematen baitu. Gero, errepidean bertan, lehenik eta behin, aurreko fasean aurkitutako akatsak begiratzen dituzte, eta, ondoren, ibilgailuen segurtasuna eta eskola-garraioa egiteko baldintzak aztertzen dituzte.

Segurtasun-baldintzei dagokienez, Ertzaintzaren agenteek arreta berezia jartzen diote garraiatzen diren ikasle kopuruari. Azkenik, ibilgailuaren baldintza teknikoak eta segurtasun elementuak aztertzen dira, baita gidariaren baldintzak ere: gidabaimena, gidatzeko eta atseden hartzeko orduak eta alkoholemia-proba.


120 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin