BILBO, 14 (EUROPA PRESS)
Sareko euskarazko produktuen katalogoa aurkeztuko da bihar Bilbon. Egitasmoaren sustatzaileak Bizkaiko 30 udaletako euskara zerbitzuak izan dira. Udako Euskal Unibertsitateak (UEU) osatu, Euskaltelek babestu eta Eusko Jaurlaritza, Bizkaiko Foru Aldundia eta Alkarbideren laguntzaz kaleratu da, UEUko iturriek iragarri dutenez.
Katalogo hau 16 eta 26 urte bitarteko gazteentzat prestatu da eta Interneten ageri diren euskarazko produktuei buruzko informazioa hurreratzea da bere helburua. Alde batetik, euskarazko softwarea, baliabideak, jolasak, blogak egiteko tresnak eta abar aurkitu ahal izango dira bertan, eta bestetik, hezkuntzarekin lotutako baliabideen informazioa.
Guztira, 77 erreferentzia bilduko ditu liburuxka formatuan argitaratuko den katalogo honetan (CDarekin batera) eta 18.000 ale banatuko dira.
Aurkezpena Euskararen Etxean izango da, Bilbon, goizeko 11,00etan hasita, eta Iñaki Zarraoa Getxoko alkatea, Gotzon Lobera Bizkaiko Foru Aldundiko Euskara Sustatzeko zuzendaria, Lore Erriondo Udako Euskal Unibertsitateko (UEU) zuzendaria eta Rafa Bañales Euskalteleko teknologia arduraduna izango dira bertan.
