Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Santutxun zehar antolaturiko ibilaldi historikoarekin amaituko da datorren urtea arte Bilbo: hil bakoitzean, auzo


2006-10-04 17:50

BILBO, 4 (EUROPA PRESS)

Bilboko Udaleko Kultura eta Euskara Sailak antolaturiko Bilbo: hil bakoitzean, auzo bat bisita gidatuen programa urrian amaituko da Santutxuko auzora antolatutako ibilaldi batez. Bihar, bisitak aukera ezin hobea eskainiko du hiriko biztanlego eta hirigintza-dentsitaterik handienetakoa duen eta 2.000 negozio inguru biltzen dituen esparru hau ezagutzeko.

Aurreikusitako ibilaldia --ordu eta erdiko iraupenekoa, gutxi gora-behera-- Basarrate Plazan hasiko da, Santutxuko lekurik zaharrenetakoan. Bisitan aurrera eginez, Ismael Gorostizak metalgintzako beharginentzat diseinatu zuen euskal estilo zaharberrituko Cooperativa Union Begoñesa etxe-multzoa (1924) ikusi ahal izango da.

Jarraian, geldialdi interesgarrienetako bat egingo da Luis Briñas Ikastetxearen ondoan. Arkitektura aparteko eraikin arrazionalista hau Pedro Ispizuak sortu zuen 1933an. Ikustaldiak Echevarria metalgintza-lantegiko etxe-multzoan barna jarraituko du, eta hortik Karmelo Elizaraino iritsiko da. Bilbotarrentzat, hauxe da karmeldar tradizioko lokarri nagusia, Santutxuko erdigunean kokatuta dagoena. Orain ezagutzen dugun eliza ahalegin handien ondoren amaitu zuten 1887 urtean. Gero parrokia bihurtu zen (1970), eta berehala eraikina handitzeari ekin zioten, 1975ean abiatutako eraberritze lanen bitartez.

Bisita gidatuen hurrengo geldialdia Santutxu kalea izango da. Leku ezin hobea da auzoko eraikinetan 1960ko eta 1970eko hamarkadetan gertatu zen eraldaketa handiaz jabetzeko. Ondorioz, hiriko esparrurik jendetsuenetakoa bihurtu zen, 2.000 negozio baino gehiago biltzen dituelarik. Ibilbidearekin aurrera eginez, Fika kalea bisitatuko da, hortxe kokatuta baitzeuden Larreagaburuko meategiak; baita Untzeta Parrokoaren Auzunea (1940ko eta 1950eko hamarkadetan eraikitakoa) eta Juan de la Cosa kalea ere. Hortik, Basarrate Plazako abialekura helduko dira bisitariak.

Horrez gain, ibilaldiaren beste bertsio bati esker, Aingeru Jagoleak ikastetxea bisitatu ahal izango da. Ikastetxe hau Jose Maria Basterra arkitektoak sortu zuen 1890ean, barrualdeko eliza eta guzti, eta 1940an eraberritu egin zuten. Horrekin batera, Zabalbide kalea ezagutzeko aukera ere egongo da.

JENDEAREN ERANTZUNA

Hil bakoitzean, auzo bat programak berealdiko erantzun ona lortu du bilbotarren aldetik. Bilbo Zaharrera, Olabeagara eta Castaños-Begoñaibarrera antolatutako ikustaldiek 500 pertsona baino gehiago erakarri zituzten batez beste maiatzean, ekainean eta uztailean.

Hala ere, uriko biztanleen interesak gora egin du eten gabe. Horrela, Abandora antolatutako bisitetan (irailean) 900 pertsonak baino gehiagok izena eman zuten, eta hilabete honetan Santutxu aldera egingo diren ibilaldiei begira ere, kopuru hori aise gaindituko dela esan genezake, ikustaldiak hasi gabe 400 pertsona daudelako izena emanda.

Bestalde, bilbotarrentzat oso atsegina izan da Olabarri Jauregia ezagutu eta Carlton Hotelera sartzeko aukera izatea, baita Bilbo Zaharra bezalako auzoetan dauden bazter bitxi bezain ezezagunak ikustatzea ere. Bisitariek sorpresa ederra hartu dute auzo bakoitzak --Olabeagak, adibidez-- gorderik daukan historiaren nondik norakoak ezagutzean, eta askok tamalgarritzat jo dute Bilboko hiri-esparru ezagun horietarako bisita batzuetan parte hartzeko aukera galdu izana.

Bisitak doakoak dira eta erreserbak 94 435 60 36 telefonora deituz egin daitezke 9,00etatik 13,00etara bitartean. Ekimena Bilbao Izan kultur hedapenerako programaren barruan mamitu da, eta Uriaren aberastasun artistiko eta arkitektonikoa ezagutzera ematea du helburu, bai eta materiaz gaindiko ondarea ere, kale eta auzoen historia eta Bilboko seme-alabarik argitsuenen obraren ezagutza. Bilbao Izan Udaleko Kultura eta Euskara Sailak bultzatutako ekimena da, hitzaldiak, erakusketak, argitalpenak, webgune bat eta bestelako jarduerak biltzen dituena.


169 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin