BILBO, 10 (EUROPA PRESS)
Ortuellako lubakia estaltzeko obrak direla-eta, Renfek autobusez eskainiko du Urioste eta Muskiz arteko zerbitzua, Bilbo hiriguneko aldiriko trenen C-2 ibilbidean, garraio konpainiak prentsa-ohar bidez gaur jakinarazi duenez.
Obrek aldiriko trenen zerbitzuan izango dute eragina egun guztian zehar, goizeko 5,00etatik gauerdiko 24,00etara. Eragina, ordea, Urioste eta Muskiz arteko bidean bakarrik izango dute; bide hori autobusez egingo da, bai norabide batean bai bestean. Tren-zerbitzuak betiko moduan funtzionatuko du Bilbo, Barakaldo eta Urioste arteko bidean (bi norabideetan), eta ordutegia betiko ofiziala izango da.
Muskizetik Bilbora, autobusak trenen ohiko irteera ordu ofiziala baino 7 minutu lehenago aterako dira, bidaiariek behar duten trena hartu ahal izan dezaten Uriosten, Barakaldora eta Bilbora joateko. Autobus-bidaia horrek 17 minutu iraungo dituela aurreikusi da.
Bilbotik Muskizera, bidaiariek Uriostera arteko bidea trenez egingo dute eta Uriosten berehala hartuko dute Muskizerako autobusa.
Autobusek Urioste eta Muskiz arteko bidean (bi norabideetan) egingo dituzten geldialdiak ondokoak dira: Putxetan, errepide nagusian, aldiriko trenen geltokiko bide ondoan; Gallartan bi geldialdi izango dira, bata Udaletxearen ondoan eta bestea Institutuaren parean; Ortuellan, aldiriko trenen geltokiaren ondoan; eta Familia Santuan, aldiriko trenen geltoki aurreko taxi-geltokian.
