Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-PuntuEus elkartea sortu da, euskara eta euskal kultura interneten ikusgarri bilakatzeko helburuarekin


2009-01-29 13:22

BILBO, 29 (EUROPA PRESS)

Euskarak eta bere erronka berriek eragin dute PuntuEus elkarte berriaren sorrera, Bilbon gaur aurfkezten den elkartearena alegia. Bere sustatzaileen arabera, euskarak erronka guztiei erantzun behar die, eta elkarte berria erronka horietako bati helduko dio: euskara eta euskal kultura interneteko espazioan ikusgarri bilakatzeari, hain zuzen.

Euskararen eta euskal kulturaren interneteko presentziari, izanari, izena jarri nahi diogu, azaldu dute elkarte berriko sustatzaileek Bilbon egindako aurkezpenean.

PuntuEus Elkartea 2008ko apirilaren 2an eratu zen, Euskararen eta Euskal Kulturaren Komunitatearen baitako hamaika talde edota erakunde ezberdin elkartuta. Euskalgintza arlotik, Euskaltzaindia, Euskararen Gizarte Erakundeen Kontseilua, Euskal Konfederazioa eta Euskal Idazleen Elkartea - Hegats; Hezkuntzaren arlotik, Euskal Herriko Ikastolen Konfederazioa, Ikastolen Elkartea - Partaide, IEP eta Euskal Herriko Unibertsitatea; eta internet eta komunikazioaren arlotik, EiTB, Internetika, Euskal Herriko Telekomunikazio Ingeniarien Elkartea eta Euskadiko Informatikako Ingeniarien Elkargo Ofiziala.

Informazioaren eta Komunikazioaren Teknologiak egungo gizarteko esparru guztietara hedatu dira eta euskararen erronka berrien ardatza dira. Horrela, elkarteko arduradunen arabera, euskaldunek beharrezkoa dute teknologiak euskarara hurbiltzea, euskara teknologien bitartez munduratzea ahalbidetu behar dugun modu berean.

Zentzu horretan, euskara bezalako eremu urriko hizkuntzentzat, ateak irekiak ditu internetek, eta milaka euskaldunen parte-hartze aktibo eta konpromisoarekin, euskararen presentzia erreala bezain bizia da Interneten. Euskaraz bizi gaitezke eta euskaraz bizi behar dugu sarean, euskara bizi dadin, azpimarratu dute.

Berez, euskarak interneteko espazio birtualean baduela bere espazioa deritzote PuntuEus elkarteko sustatzaileek, baina izanari izena jarri nahi diote. Existitzen den euskarazko internet horri, Interneteko Euskararen eta Euskal Kulturaren Komunitateari, ikur bat sortu nahi diogu. Sinbolo bat. Izen bat. Interneteko sareen sarean, euskara eta euskal kultura identifikatzeko balioko duen izen bat, azaldu dute.

Azken finean, munduan zehar barreiatua dagoen Euskara eta Euskal

Kulturaren Komunitateari nazioarteko aitortza eskainiko dion ikur bat lortu nahi duelkartea: .eus domeinua. Hori da PuntuEus elkartearen abiapuntua eta helburua.

IBILBIDE LUZEA

Erronka horrek ordea, ibilbide luze bat eskatzen du. Ibilbide hori luzea izango den arren, bidea ez dela asmatu behar azaldu dute. Izan ere, duela hiru urte pasatxo sortu zen hizkuntza eta kulturak interneten ikusgarri bilakatzeko lehen domeinua: .CAT, Hizkuntza eta Kultura Katalanaren Domeinua.

Euskararen eta euskal kulturaren interneteko ikurra lortzeko ibilbidea Euskara eta Euskal Kulturaren Komunitateak egin behar duela azpimarratu dute, .EUS Euskara eta Euskal Kulturaren Komunitatearen domeinua izango bada.

Elkartearen iritziz, aniztasuna da komunitate horren ezaugarri nagusia, eta euskara eta euskal kultura bere ardatza. Oraindik bide luzea geratzen zaigu. Ibilbide luzea da, beraz, hasi besterik egin ez duguna, gaineratu dute.

Horrela, ibilbide luze horretako lehen urratsa da Euskara eta Euskal Kulturaren Komunitatea ordezkatuko duen PuntuEus elkartea sortzea. Elkartea izango da .EUS domeinua lortzeko eskaria

aurkeztuko duena eta, beraz, Euskararen eta Euskal Kulturaren Komunitatea modu esanguratsuan ordezkatu behar du.

Orain PuntuEus elkartea zabaldu nahi dute, denontzako lekua dagoelako, eta gaurko aurkezpena parte-hartzera gonbidatzeko baliatu dute bere sustatzaileek.


632 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin