Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Petrikilo faltsu bat eta bere bi gaizkideak atxilotu dituzte Gasteizen pertsona bati 7.000 euroko maula egiteagatik


2009-01-21 17:18

GASTEIZ, 21 (EUROPA PRESS)

Ertzaintzaren agenteek hiru gizonezko atxilotu zituzten atzo arratsaldean Gasteizen, ustez maula delitu batean nahasita egoteagatik. Atxilotuetako batek -bere burua maisu, igarle eta petrikilo gisa iragartzen zuen- iruzurren bidez 7.000 euro baino gehiago ostu zizkion gasteiztar bati, Herrizaingo Sailak gaur jakinarazi duenez.

Gasteizko gizonezko batek 7.000 euro baino gehiago lapurtu zizkiotela salatu zuen astelehenean Ertzaintzan. Berak azaldutakoaren arabera, abenduaren amaieran Maisu Igarle Petrikilo baten kontsultara joan zen, bere postontzian pertsona horren iragarki bat aurkitu eta telefonoz deitu ostean.

Ustezko petrikiloak -pertsonen osasuna hobetu ahal zuela iragartzen zuen- Gasteizko etxebizitza batean hartu zuen biktima, eta, zenbait masaje egin ostean, kontsultara itzultzeko agindu zion, baina bigarren bisita horretan, 7.227 euro dirutan eraman behar zituela jakinarazi zion, diru kopuru zehatz hori erritu batean erabili behar omen zuelako.

Petrikilo horrek dohain sendagarriak zituela sinetsita, salatzailea agindutako diru kopuruarekin itzuli zen kontsultara iragan astelehenean eta, bertan, dirua gutun-azal batean sartu zuen. Gutun-azal horren inguruan ustezko erritual batzuk egin ostean, maula-egileak saioa amaitutzat eman zuen. Gutun-azala jabeari itzuli zion eta ordu batzuk igaro arte ezin zuela ireki agindu zion.

Halere, bere etxebizitzarantz zihoanean, biktimak gutun-azala ireki zuen eta iruzur egin ziola konturatu zen, barruan egunkari-zati batzuk soilik baitzeuden. Ustezko kontsultara itzuli zen bere dirua berreskuratzeko, baina maula-egileak alde egin zuen jada.

Ertzaintzak abian jarritako ikerketari esker, iruzurgilea eta ustezko bi gaizkide -afrikarrak dira guztiak- identifikatu eta atxilotu ahal izan zituzten atzo Bilbon. Gassim Maisua edo Ami Maisua izeneko petrikilo faltsua iragartzeko erabiltzen zituzten panfleto batzuk (panfleto horietan agertzen zen telefono zenbakia Gasteizko salatzaileak agenteei eman zien telefono bera zen) eta ustezko erritualetan erabiltzen zituzten hainbat tresna atzeman zizkieten atxilotutakoei. Datozen orduetan Agintaritza Judizialaren esku jarriko dituzte.


334 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin