Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Patxi Altuna euskaltzain osoa gaur hil da Loiolan 78 urte zituela


2006-01-20 15:58



DONOSTIA, 20 (EUROPA PRESS)

Patxi Altuna Bengoetxea euskaltzain osoa hil da gaur Loiolan 78 urte zituela, Euskaltzaindiatik gaur prentsa-ohar batean jakinarazi duenez.

Azpeitian jaioa zen, 1927ko irailaren 8an. Batxilergoko ikasketak Xabierren (Nafarroa) egin zituen eta 1945ean Jesuslagunen Loiolako nobiziatuan sartu zen, nobiziatuko bi urte egin zituen, gero Erretorikako beste bi urte eta, azkenik, horien osagarri, Perficit deritzan urtea -latin eta greko hizkuntzetan sakontzeko- egin zuen Loiolan bertan, Aita Errandonearen tutoretzapean.

1950etik 1953ra bitartean, Filosofiako hiru urteak ikasi zituen Oñan (Burgos) eta Lizentziatura eskuratu zuen. Amaitu ondoren, Salamancako Unibertsitate Zibilean sartu zen Ikasketa Klasikoak ikastera; lizentziatura 1957an eskuratu zuen. 1957tik 58ra, Doktoregoko ikastaroak egin zituen.

Antonio Tovar irakaslearen lekua hartu zuen urte batez Salamancako Unibertsitatearen Manuel de Larramendi Katedran eta Hizkuntzalaritza eskolak eman zituen Salamankako Pontifize Unibertsitatean.

1958an Teologiako ikasketak hasi zituen Oñan (Burgos) eta amaitu, berriz, Innsbrucken amaitu zituen. Hirugarren ikasturtea bukatutakoan apaiztu egin zen eta laugarren ikasturtea burututa, Teologiako Lizentziatura eskuratu zuen.

1962an, urtebetez, Hirugarren Probantza Urtea egin zuen Gandian (Valentzia) eta hala jesuita karrera burutu zuen. Horren ondoren, Donostiara bidali zuten. 1963an, sortzekoa zen Hizkuntza Eskolan, Euskal Hizkuntzako ikasketak antolatzeko ardura eman zitzaion. Aita Ignacio Errandonea izan zen eragilea.

LATIN IRAKASLEA

Koldo Mitxelena irakaslearen laguntzailea izan zen gero, Latin irakasgaian, Filosofia eta Letretako lizentziaturaren aurreko Komunen kurtsoan, Mundaizen (Donostia). 1964an, Latin Klasiko eta Arrunteko irakasle titularra izendatu zuten

1976an irakasle hasi zen Deustuko Unibertsitatean, Bilboko eta Donostiako campusetan, Euskal Filologiako lizentziatura sortu zenetik jubilatu arte. Euskal Hizkuntzaren Historia eta Euskal Testuak irakasgaiak eman ditu.

1978. urtean Hizkuntzalaritzako doktoregoa eskuratu zuen, Salamancako Unibertsitatean, Versificación de Dechepare: métrica y pronunciación izenburuko doktore tesia defendatuta. Tesi hori Koldo Mitxelena doktorearen zuzendaritzapean egin zuen. Jubilatu ostean, 2001ean, Loiolako Artxibo Historikoaren arduradun izendatu zuten.

Euskaltzaindiak 1965ean izendatu zuen euskaltzain urgazle eta euskaltzain oso, berriz, 1980ko uztailaren 31n, Jose Maria Lojendioren ordez. Sarrera hitzaldia Azpeitian egin zuen, 1981ko urtarrilaren 24an, Ziburuko Ioannes Etxeberri gaiari buruz. Koldo Mitxelenak erantzun zion.

GRAMATIKA BATZORDEBURU

Urte askotan zehar, Gramatika batzordeburua izan da. 2005eko maiatzaren geroztik, aldiz, Patxi Altuna Gramatika batzordeko ohorezko burua da, bai eta Euskara Batuko batzordeko kidea ere Euskaltzaindian. Gainera, Argitalpen batzordekidea izana da, baita Iker sailburua ere.

Tadao Shimomiya irakasle japoniarraren Manual de lengua y culturas vascas: lengua, literatura, folklore, método de vasco unificado, antología y glosario (1979) lana zuzendu zuen. Lana Tokion argitaratu zen, eta, besteak beste, japonieratik abiatuta euskara irakasteko metodoa zekarren.

Sari eta omenaldi ugari jasotako gizona izan zuan eta argitaratutako lan nagusien artean Euskal Gramatika. Lehen Urratsak bildumaren sei aleez gain, Larramendiren hiztegi berria (1967), Oihenarten metrika (1979) eta Aita Aranaren Egunaria (2000) lanak argitaratu zituen, beste ia 50 libururen artean.


344 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin