Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Ondarroako (Bizkaia) Martxoaren 8a iragartzeko kartel lehiaketan lanak aurkezteko epea otsailaren 12an amaituko da


2009-01-07 17:01

BILBO, 7 (EUROPA PRESS)

Ondarroako (Bizkaia) Emakumeen Udal Berdintasun Kontseiluak Emakumeen Nazioarteko Eguna ospatuko du berriz ere datorren martxoaren 8an, eta emakumeen eskubideak aldarrikatzeko eta berdintasun errealaren alde egiten den egun hau iragartzeko kartel lehiaketako arautegia atera du. Horrela, lanak aurkezteko azken eguna otsailaren 12a izango da.

Antolakuntzak jakinarazi duenez, lehiaketaren helburua emakumeen eta gizonen berdintasuna adierazten duen diseinu grafiko bat aukeratzea da, eta bertan edonork parte har dezake, banan banan edo taldeka. Egile bakoitzak lan bi aurkeztu ahal izango ditu gehienez, eta edozelan ere, sari bakarra hartu ahal izango du.

Aurkeztutako lanek derrigorrez testu hau izan beharko dute: Martxoak 8 - Emakumeen Nazioarteko Eguna. Ondarroa 2009, eta lanak egiteko edozein teknika erabili daiteke, beti ere A3 edo proportzionala den tamainan. Ostean, kartel irabazlean, Ondarroako Emakumeen Udal Berdintasun Kontseiluaren logoa sartuko du Kontseiluak. Lanak euskarri gogorrean aurkeztu behar dira eta, honekin batera, formatu digitalean ere bai. Hauek aurkezterakoan ez da egilearen izenik aipatuko eta euren atzealdean izenordea eta leloa jarri behar dira.

Egilearen datuak (izen-abizenak, helbidea, telefonoa, eta NAN) lanarekin batera doan gutunazal itxian emango dira. Gutunazal horren aurrealdean egilearen izenordea adierazi behar da eta ondoko leloa idatzi: 2009/03/08-kartel lehiaketa. Kartelek inolako kalterik jaso ez dezaten, behar den bezala estali eta babestuta aurkeztuko dira.

Otsailaren 13an erabakiko da zein kartelek irabazi duen lehiaketa. Emakumeen Kontseiluko bi partaide eta herriko hiru artistak edo bestela arte grafikoetan adituak osatuko dute epaimahaia. Saririk ez ematea erabaki dezake, bere iritziz, behar den beste kalitaterik ez badago aurkeztu diren karteletan. Irabazleak 1.000 euro poltsikoratuko ditu, eta beste sari bat ere izango da 16 urtetik beherako lehen sailkatuarentzat, 200 euro hain zuzen ere.

Kartel saridunak Ondarroako Udalarenak izango dira eta eskubidea edukiko du iragartzeko, argitaratzeko, edota zabaltzeko, eta baita erakusketa bat antolatzeko aurkeztutako kartelekin. Saritu gabeko kartelak egileen esku egongo dira martxoaren 1era arte, hortik aurrera, ulertuko da Udalarentzat direla eta honek egokien ikusten duen moduan erabiltzeko eskubidea izango duela.


216 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin