Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Nömadak Tx, Oreka Tx taldean oinarritutako filma, Zinemaldiko Zabaltegi Bereziak atalean estreinatuko da


2006-08-24 16:37



DONOSTIA, 24 (EUROPA PRESS)

Oreka Tx taldeko Harkaitz Martinez de San Vicente eta Igor Otxoa protagonista dituen Nömadak Tx filma Donostiako Zinemaldiko 54. edizioko Zabaltegi Bereziak atalean estreinatuko da, bikotearen inguruneko iturriek gaur adierazi dutenaren arabera.

Lan honek bi musikariek Indiara, Mongoliara, Saharara eta Laponiara egindako bidaiak erakusten ditu. Txalaparta jotzeko lehengai eta soinu berrien bila egindako bidaiak izan dira, beste kultura eta jatorrizko pertsonen bila egindako bidaiak, txalaparta horien guztien topagune bihur dadin.

Nömadak Tx filmak lau urteetako lanaren fruitua biltzen du. Denbora honetan zehar, Harkaitz Martinez de San Vicente eta Igor Otxoa txalapartariek India, Mongolia, Laponia eta Saharara bidaiatu dute esperientziak eta materialak bilduz izen bereko proiektua elikatzeko.

Nömada TX egitasmoa txalaparta eta kultur elkartrukearen inguruan aritzen da. Protagonistek txalapartaren aukerak arakatzeko helburuarekin batetik bestera bidaiatu dute, lehengai berriak probatzen eta giza-talde eta kultura ezberdinak tresna honen inguruan harremanetan jartzen.

Urte hauetan zehar adivasiekin -Indiako kastagabetuak-, Laponiako lur izoztuetako samiekin, Mongoliako estepako biztanleekin eta Saharako herritarrekin ibili dira. Bidai hauen guztien helburua musikak eta bizipenak biltzea izan da, gerora gure artean zabalduak izateko zinema, musika eta literaturaren bitartez.

Oreka Tx sortu eta ibilbide profesionalari ekin ziotenetik Oreka Tx-eko bi taldekideak txalapartak dituen aukeren ikerketari, esperimentatzeari eta zabaltzeari eskaini diote beren jardueraren alde handia. Izan ere, Nömadak Tx-eko protagonistek ez dute txalaparta musika-tresna soiltzat hartzen, baizik eta jarrera bezala, bestearengana gerturatu eta aurkitzeko modua bezala.

EGITASMO EZBERDINA

Mundu gero eta globalizatuago batean, Nömadak Tx korrontearen kontrako egitasmoa da, beren hotsa galdu nahi ez duten pertsonentzako espazioa. Film honek erakusten du aniztasunak gauza ederrak sortzen dituela. Baina, bereziki, agerian uzten du gutako bakoitzaren desioen indarra eta balioa, nahiz eta urrunekoak eta ezberdinak izan. Gauza ederrak, baliagarriak, onak egiteagatik borrokan ibiltzea da Nömadak Tx-eko protagonisten bizitza zentzuz betetzen duena.

Donostiako Zinemalditik igaro ondoren, Ral de la Fuente iruinsemeak zuzendutako filma -Pablo Irabururen, Harkaitz Martinez eta Igor Otxoaren zuzendarikidetzarekin- Donostia, Baiona, Donibane Lohitzune, Iruñea eta Gasteizko areto komertzialetan estreinatuko da urriaren 11n.

Estreinaldi nagusia Donostiako Zinemaldian izango den arren, lan honek Europako beste jaialdi batzuetan arreta piztu du, Amsterdamgo International Documentary Festival kasu, eta, honez gero, beren programazioetan sartzeko asmoa erakutsi dute.

Egitasmo, talde edota filmearen berri gehiago nahi izanez gero, Interneten www.nomadaktx.com helbidera jo dezake interesaturik dagoen oro.


551 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin