Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Milioi bat biztanleko 51 hildako izan ziren iaz auto istripuetan EAEn, Bide Segurtasuneko Planaren 2010erako xedea betez


2009-02-11 17:09

BILBO, 11 (EUROPA PRESS)

Euskal Autonomia erkidegoan (EAE) hiriarteko eta herri barruko errepideetan istripuak gertatu eta 24 orduko epean izandako hildakoak 89 izan ziren 2008. urtean, aurrekoan baino 20 gutxiago, hau da, hildakoen kopurua %18 gutxiago. Emaitza horren arabera, EAEn milioi bat biztanleko 30 egunetara hildakoen kopurua 51,2koa izan zenez iaz, Bide Segurtasunerako Plan Estrategikoak 2007-2010 eperako aurreikusitako tasa (54 hildako) bete eta hobetu da.

Gainera, Eusko Jaurlaritzako Herrizaingo Sailetik gaur jakinarazi duenez, 2001. eta 2007. urteen artean zirkulazio istripuetan 30 egunetara izandako hildakoen kopurua %43 jaitsi zen Euskadin, Europar Batasunean %23ko beherakada izan zen bitartean, Europako Energia eta Garraio Batzordearen datuen arabera.

Ertzaintzak eta udaltzaingoek 2008an erregistratutako 89 hildakoak honela banatzen dira lurraldeen arabera: 24 Araban, 27 Bizkaian eta 38 Gipuzkoan. Poliziei dagokienez, Ertzaintzak 76 hildako erregistratu zituen eta udaltzaingoek 13.

Ertzaintzak erregistratutako 76 hildakoen ikerketa estatistikoak ondorioztatzen duenez, hildakoen %84 gizononezkoak izan ziren. Adinen arabera, zirkulazio istripuetan hildakoen %21, 25 urtetik beherakoak ziren, %31, 25 eta 44 urte bitartekoak, %35, 45 eta 64 urte bitartekoak eta gainerako %13, 64 urtetik gorakoak. Pertsona motaren arabera, hildakoen %65 gidariak ziren, %19 bidaiariak eta %16 oinezkoak; hain zuzen ere, 2007ko datuekin alderatuta, lau oinezko gutxiago hil ziren.

Beherakada azpimarragarriena, EAEko hiru hiriburuetako udaltzaingoek erregistratutako hildakoen kopuruan egon zen, 2007ko datuekin alderatuta, 21etik zazpira murriztu baitzen, hau da, %67ko beherakada.

EUROPAREKIN ALDERATUTA

EAEn 2001ean milioi bat biztanleko 30 egunetara 111 hildako izan ziren eta, 2007an (Europarekin alderatu daitekeen azken urtea), berriz, 63; beraz, hildakoen kopuruak %43 egin du behera epe horretan, Europar Batasuneko herrialdeetan egondako beherakada (%23) ia bikoiztuz, Europako Energia eta Garraio Batzordearen datuen arabera.

Milioi bat biztanleko 30 egunetara izandako hilkortasun-tasa Trafiko Administrazioek orokorrean ezbehar-kopuruaren joeraren adierazle nagusitzat erabiltzen duten parametroa da. Tasa hori estatistika-datuen laginetan oinarrituta lortutako zuzentze-indizeekin kalkulatzen da.

Europako Batzordeak alderaketa taula bat zabaldu ohi du urrian. Euskadik iaz 51,2ko tasa izan zuenez, Erresuma Batuak eta Suediak (trafiko istripuen kontrako borrokan buru diren herrialdeak) 2007an lortutako emaitzak berdindu ditu.

Eusko Jaurlaritzako Herrizaingo Sailaren ustez, balantze honek azken hamarkadako joera berretsi du eta bide segurtasunean erreferente diren herrialdeen artean kokatzen du Euskadi.

Herrizaingo Sailaren arabera, emaitza hauek hiru faktore nagusiren ondorio dira. Lehenengoa errepide sare on bat izatea da, etengabe hobetzen dena; bigarrena, gero eta segurtasun ezaugarri hobeak dituzten eta derrigorrezko ikuskaritza teknikoek bermatutako zerbitzu maila eskaintzen duten ibilgailuak izatea da; hirugarren faktorea da erakunde publiko eta pribatuek Euskadiko Bide Segurtasunerako Plan Estrategikoan egiten duten baterako lana.

Izan ere, Eusko Jaurlaritzako Herrizaingo Saila buru izanda, kultura berria sortu da zirkulazioari dagokionez. Aldaketa horrek hainbat alderditan ohitura onak hartzea ekarri du, hala nola, abiadura mugetan, alkohol kontsumoan edota segurtasun-uhalaren, kaskoaren edo haur-jarlekuen erabilpenean, azaldu du Herrizaingo Sailak.

Azkenik, hemendik aurrera, aldaketa txikiak egotea aurreikusi du, milioi bat biztanleko 50 hildako dituzten herrialdeetan gertatzen den bezala. Halere, Herrizaingo Sailaren aburuz, lan egiten eta, baita ere, errepideetan, ibilgailuetan eta gidari, bidaiari eta oinezkoen kontzientziazioan hobetzeko moduak aurkitzen jarraitu beharra dago.


490 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin