Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Lurzoruen azidotasuna neutralizatzeko lohi kantitate handia gehitzea ez da komeni, EHUn egindako tesi baten arabera


2009-01-08 12:28

BILBO, 8 (EUROPA PRESS)

Eusskal Herriko Unibertsitatean (EHU) egindako doktore-tesi batek aztertu du araztegietako lohiek zein eragin duten lur azidoak neutralizatzeko, eta lurzoruen azidotasuna neutralizatzeko lohi edo lokatz kantitate handia gehitzea ez dela komeni ondorioztatu du.

Araztegietako lohiak berriro erabili daitezke, adibidez, lurzoruak ongarritzeko edo lurzoruen azidotasuna murrizteko. EHUn egindako tesiaren helburu nagusia izan da aztertzea araztegietako lohi anaerobikoek lurzoruaren propietate kimikoetan eta lurzoruak iragazitako uretan duten eragina -metal astunen portaera, batez ere-. Gainera, lohi horiek baso-sailetan (Pinus radiata) duten eragina ere aztertu dute.

Goio Egiarte Castañeira doktorea da tesiaren egilea, eta tesiaren izenburua, berriz, Application of sewage sludge as amendment on acid forest soils. Effect on the soil-plant-water system, with special attention to the behaviour of heavy metals (Hondakin-lohien erabilpena lurzoru azidoak zuzentzeko. Horrek lurzoru, landare eta ur-sisteman duen eragina, batez ere metal astunei dagokienez).

Egiarte nekazaritza-ingeniaria da, eta eskolak ematen ditu Bigarren Hezkuntzan. Doktore-tesiaren zuzendari izan dira Estilita Ruiz Romera, EHUko Ingeniaritza Goi Eskola Teknikoko Ingeniaritza Kimikoa eta Ingurumenaren Ingeniaritza Sailekoa, eta Marta Camps Arbestain, Neiker-Tecnaliako Nekazaritza-ekosistemen eta Natura-baliabideen Sailekoa.

Goio Egiarte doktoreak honako erakunde hauen laguntza izan du: Anconako Universita Politecnica delle Marche (Italia), Dipartimento di Scienze Ambientali e delle Produzioni Vegetali; Santiago Konpostelako Unibertsitatea, Biologia Fakultateko Edafologia y Nekazal Kimika saila; eta Bilbo Bizkaia Ur Partzuergoa.

NEURRI EGOKIA

EHUko iturriek azaldu dutenez, tesiaren planteamendua berritzailea da, lohiak baso-lurzoruetan ongarri bezala erabiltzeko aukera aztertzeaz gain, metal astunen eta forma nitrogenatuen portaera aztertzen duelako. Azterketa horretarako esperimentuak lau urtez egin dira.

Lortutako datuak aztertu ondoren, Egiartek ondorioztatu du ez dela batere komeni araztegiko lohien kantitate handia lurzoruei gehitzea, ez eta metal astunak legez onartutako mugen barruan daudenean ere. Lohietako konposatuek, oxidatzen hasten direnean, azidotu egiten dute, eta beharrezkoa da sistema alkalino bat azidotasuna murrizteko; baina lurzorua eta lohiak batzean sortzen den sistema alkalinoa ez da nahikoa azidotasun hori neutralizatzeko.

Aldiz, lohi kantitate txikiagoa -herena- aplikatzean, lurzoruaren azidotasuna eta metal astunen kopurua nabarmen murrizten da, eta sortzen den baso-biomasa kantitate handiak erabiliz sortutakoaren antzekoa da.

Hala eta guztiz ere, Egiartek bere tesian azpimarratu du komeni dela aztertutakoa bezalako lur azidoetan ur-araztegietako beste lohi batzuk erabiltzea -azidoak neutralizatzeko ahalmen handiagoa dutenak eta zati organiko egonkorragoa dutenak-.


306 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin