Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Lea Artibai Amankomunazgoak Urriko Azoka Nagusia ospatuko du hilaren 14an, Markina-Xemeinen


2006-10-10 12:35

BILBO, 10 (EUROPA PRESS)

Lea Artibai Amankomunazgoak urriaren 14an ospatuko du Markina-Xemeinen Urriko azoka Nagusia. Azokaren helburu nagusia nekazaritza-sektorearen berpizte ekonomikoa eta eskualdeko kalitatezko produktuak ezagutzera ematea da. Urtez urte gero eta jendetza ugariagoa hurbiltzen da azokara, sektoreko eta kaletarrentzako topagune garrantzitsua bihurtuz.

Antolatzaileek jakinarazi dutenez, aurten azokaren 22. edizioa ospatzen da, eta azken urteetan, Lea Artibai Amankomunazgoak beste zenbait erakunde publikoren (Eusko Jaurlaritza, Bizkaiko Foru Aldundia) zein pribaturen (BBK, MIBA) lankidetzarekin antolatzen du urriko azoka.

Bi eginkizun garrantzitsu betetzen ditu azokak; alde batetik, nekazaritza-ekoizle, baserritar, abereen jabe eta artisauek euren produktuekin salerosketa negozioak egiteko zein bestekin harremanak izateko eta elkar ezagutzeko esparru bat da; bestetik, eskualdeko nekazaritza-sektoreari euren produktuak bide zuzenetik herritarrei saltzeko, komertzializatzeko eta ezagutzera emateko aukera ematen dio.

Azokak sei gune ezberdin izango ditu: lehenengoan, lehiaketa eta erakusketan parte hartuko duten zenbait ataletako jatorrizko produktuen standak izango dira (ortuaria, fruta, gazta, sagardoa, txakolina, artisautza); bigarrenean, Blonda Behien VI. Bizkaiko Txapelketa ospatuko da; hirugarrenean, eskualdeko abereen lehiaketa ospatuko da (okelarako behiak, zaldiak eta ardiak), eta abereen salerosketa gauzatzeko leku bat ere izango da; laugarrenean, Euskal Etxe Abereen eta Euskal Herriko Arraza abereen erakusketa egongo da; bosgarrenean, nekazaritza-tresnen azken berrikuntzak eskainiko dira; eta seigarrenean, umeentzako baserriko jolas eta jokoak aurkituko dira.

Aurten lehenengo aldiz, urriko azoka gaitzat hartuta, kanpoko frontoian kokatuta egongo den pantaila erraldoi batean, aurreko urteetako eta egunean bertan ateratako argazkiak ikusteko aukera izango du bertara hurbiltzen den orok.

EGITARAUA

Azoka goizeko 10,00etan zabalduko da, eta honekin batera, Blond Akitaniako behien Bizkaiko VI. Lehiaketari hasiera emango zaio. Ordu berdinean, epaimahaiak bere lanari ekingo dio ortuari, fruta, gazta, txakolin eta ogi dastaketarekin eta azterketarekin.

Eguerdiko 12,00etatik 14,00etara, umeentzako baserriko jolas eta jokoak izango dira jubilatuen elkartearen aurrean, eta eguerdi aldera, urtero bezala, herriko trikitilari taldeak kaleak alaitzen jardungo du.

Euskal Herriko Arraza Abereen erakustaldia 12,30etan hasiko da, abere bakoitzaren ezaugarrien azalpena eginez Frai Bartolome kalean;

13,30etan barriz, Bizkaiko VI. Blond lehiaketaren sari banaketa ospatuko da. Gainera, iaz bezala, zesta partidak izango dira frontoian, baina partidak egunean bertan ospatu beharrean ostiral gauez jokatuko dira.

Antolakuntzari dagokionez, goizeko orduetatik arratsaldeko 18,00ak arte, kale hauek itxita egongo dira: Osteko kalea, Okerra, Erdiko, Guen, Zehar kalea, Karmengo eta Abesua kaleko alde bat. Egun honetan Markina-Xemeinera hurbilduko direnentzat, aparkalekuak atonduko dira, baina egokiena garraio publikoa erabiltzea izango dela esan dute antolatzaileek.


176 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin