Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Lau gizon atxilotu dituzte Bilbon adineko bikote bati 500 euro lapurtzeagatik


2009-02-03 13:58

BILBO, 3 (EUROPA PRESS)

Ertzaintzaren agenteek lau gizonezko atxilotu zituzten atzo Bilbon, Deustu auzo adineko bikote bati lapurreta egin izana egotzita, Eusko Jaurlaritzako Herrizaingo Saileko iturriek gaur jakinarazi dutenez.

Aurrez, zerbitzutik kanpo zegoen agente batek lapurrak banketxe baten inguruetan ikusi zituen, dirua atera berri zuen adineko bikote bat zelatatzen ari zirenean. Lapurreta egin ostean, susmagarriek auto batean alde egin zuten, baina patruila batek denbora gutxira atzeman zituen. Ertzaintzak gogorarazi du herritarrek arreta neurriak indartu behar dituztela mota honetako lapurreten aurrean.

Gertakaria atzoko 12:40an hasi zen, Bilboko Lehendakari Agirre kaleko banketxe batean. Bi gizonezko dirua atera berri zuen adineko bikote bat zelatatzen ari zirela ikusi zuen zerbitzutik kanpo zegoen Ertzaintzaren agente batek. Bi gizonezko horien jarrera susmagarria zela iritzita, ertzaina gizonen atzetik joan zen. Hala, bi gizonezkoak beste batekin biltzen zirela eta, elkarrizketa baten ostean, biek adineko bikoteari segitzen ziotela ikusi zuen agenteak.

Ondoren, beren etxebizitzako atariraino jarraitu zituztela egiaztatu zuen ertzainak. Gizonezkoak adinekoekin sartu ziren igogailuan eta, bikotearen deskuidoaz baliatuta, poltsikoan zeramaten dirua (500 euro) ostu zieten; lapurrek aldizkari batzuk erabili zituzten amu gisa.

Pixka bat geroago, gizonezkoak tokira bueltatu eta, hirugarrenarekin harremanetan jarri ostean, auto batean sartu ziren eta abiadura handiz alde egin zuten. Hori ikusita, agenteak bere lankideak ohartarazi zituen eta susmagarrien eta autoaren deskribapen fisikoa eskaini zien.

Hala, denbora gutxira, autoa San Inazio auzoan atzeman zuen patruila batek, eta agenteek hiru susmagarriak eta gidaria identifikatu zituzten. Adinekoei egindako lapurretaz jabetu bezain laster eta susmagarrietako batek billetetan 640 euro zeramatzala egiaztatu ostean (gainera, biktimek atzemandako gizonetako bi lapurreten egileak zirela jakinarazi zuten), agenteek lau lagunak atxilotu zituzten, diruaren ebasketa delitu bat egin izana egotzita.

Atxilotuak (16 eta 35 urte bitartekoak) polizia egoitza batera eraman zituzten dagozkien eginbideak burutzeko eta, ondoren, epailearen esku jartzeko.

Atxilotutako gizonezkoak antzeko zenbait lapurretatan nahasita dauden ikertzen ari da orain Ertzaintza. Halaber, herritarrei, batez ere adinekoei (jardunbide honen biktima nagusiak baitira), ohartarazi die mota honetako gertakarien aurrean arreta neurriak indartu behar dituztela.


258 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin