Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Kroke talde poloniarrak kontzertu bat eskainiko du bihar Donostiako Kursaaleko Ganbera Aretoan


2006-10-26 16:50

DONOSTIA, 26 (EUROPA PRESS)

Kroke Poloniako taldearen kontzertua izango da bihar Donostiako Kursaal Jauregiko Ganbera Aretoan, iluntzeko 20,00etan hasita. Sarrerak 15 euroko prezioa dauka eta Telekutxan, Servikutxan eta www.kutxa.net eta www.fundacionkursaal.com webguneetan eskura daitezke, Kursaaleko iturriek iragarri dutenez.

Tomasz Kukurba (biolina), Jerzy Bawol (akordeoia), Tomasz Lato (kontrabaxua) eta Tomasz Grochot (perkusioa) dira Kroke. Kroke esaten zaio yiddishez (Europa erdialdeko juduen hizkuntza) Poloniako Krakovia hiriari. Han du jatorria 1992an hiru lagunen artean sortutako talde honek, hiru taldekideak Krakoviako Musika Akademian graduatuak baitira.

Denbora gutxiren buruan, oso ezagun egin dira, Europako jaialdi garrantzitsuenetan jo izanari esker. Aipatzekoak dira, emanaldi horien artean, Las Palmaseko Womad jaialdiak, Reading deitua edo musika juduaren inguruko topagune ugariak. Esandako emanaldi horietan, ospe handiko artistekin partekatu dute agertokia, hala nola Van Morrison, Ravi Shankar, Klezmatics edo Natacha Atlas. Taldearen jarraitzaileen artean daude, bestalde, Ben Kingsley eta Kate Capshaw aktoreak edota Steven Spielberg zine zuzendaria.

Musika tradizionaleko errepertorioan oinarriturik, Krokek, bere moldaketa propioak ez ezik, inprobisazioak garatzen ditu, musika klasikoan eta jazzean jasotako heziketa eta esperientzia baliatuz. Hala, konposizio berriak eta bakarrak sortzen ditu, musika juduaren unibertsoan guztiz ezezagunak ziren soinuak eratuz.

Taldekide bakoitza benetako birtuosoa da, nor bere instrumentuarekin: Tomasz Kukurbak bere biolak eta biolinak harrapa dezaketen espektro guztia erabiltzen du; Jerzy Bawol gai da, eskusoinuarekin, gogoeta barnekoietatik su artifizial alaienetara igarotzeko; Tomasz Latok, azkenik, tonalitate sotilenak lortzen ditu bere kontrabaxuarekin.

Krokek egiten duen musika, batez ere, klezmer soinutik abiatzen da. Hitz hori hebreerazko bi hitzez osatua dago: kley (musika tresna) eta zemer (abestu, musika jo), baina, batez ere, Europa erdi-ekialdeko juduek --yiddishez mintzatzen direnek-- interpretatzen duten tradiziozko musika instrumentalari deitzen zaio klezmer.

Denbora askoan zehar, klezmer musika beste soinu eta erritmo batzuekin osatuz joan da, harik eta aberastasun handiko soinu ondare bihurtu den arte. Klezmerraren bitartez azaltzen dira herri juduaren pozak eta tristurak, eta horixe egiten du, hain zuzen, Kroke taldeak ere, tradizioa errespetatuz eta urrats bat aurrerago eramanez.


149 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin