Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Korrika 15ek euskal emakumeak omenduko du, Heldu goiburuarekin


2006-12-18 13:03

Karrantzan hasiko da 2007ko martxoaren 22an eta Iruñean bukatuko apirilaren 1ean

BILBO, 18 (EUROPA PRESS)

Korrika 15ek Heldu izango du goiburu nagusitzat eta euskal emakumea omenduko du 2007ko edizioan. Korrika 15 2007ko martxoaren 22an abiatuko da Karrantzatik, eta apirilaren 1ean bukatuko da Iruñean, 2.150 kilometro egin ondoren.

Edurne Brouard Korrika 15en arduradun nagusiak, Mertxe Mujika AEKren koordinatzaile nagusiak eta Asier Amondo AEKren Nazio Batzordeko kideak azaldu dituzte gaur Bilboko Kalderapeko Kulturgunean Korrika 15en nondik norakoak.

Heldu hitza goiburu nagusitzat hartzearen arrazoia hitzaren beraren esanahi ugaritasunean egon da, Brouarden esanetan, heldu hitzak esangura asko dituelako euskaraz, denak baikorrak eta korrikarekin oso erraz lotzen direnak: iritsi, eutsi, oratu, ondu.

Bada Karrantzako Pozalagua kobazuloan munduan ia bakarra den fenomeno geologikoa. Estalaktitak goitik behera erori beharrean, ezker-eskuin zabaltzen dira sare moduko bat sortuz, elkar eutsi eta babesten duten bitartean. Horrelaxe egiten dugu euskaldunok Euskal Herria ere. Euskaldunok euskaraz mintzatuz adierazten dugu geure euskaldun izaera, euskaraz hitz eginez egiten dugu Euskal Herria. Euskara da gure nortasun agiria, euskara da munduari hemen herri bat dagoela adierazteko oinarria. Horregatik diogu heldu herriari, azaldu du Brouardek.

Horrela, urteetako menderakuntza, jazartze eta zigorren ondorioz baztertua izan den euskarak bere esparrua berreskuratzeko garaia dela azpimarratu du, euskarak Euskal Herri osoko hizkuntza izan behar duelako. Horretarako, konpromisoak behar direla gaineratu du, eta aurreko Korrikaren mezuari jarraituz, konpromisoaren beharra eta balioa azpimarratu nahi ditu Korrika 15ek.

Belaunaldiz belaunaldi kontra izan dituen legeei aurre eginez, euskararen aldeko konpromisoari heldu zioten euskaltzaleei esker dirau euskarak. Lagun horien konpromisoa eta elkarlanean aritzeko borondatea izan ziren euskarak, oztopo guztien aurka, gaur egun arte bizirik jarraitzeko euskarria, adierazi du.

OMENDUA, EUSKAL EMAKUMEA

Bestalde, euskal emakumea omenduko du Korrika 15ek, euskararen biziraupenean izan duen garrantzia eta ezinbesteko papera goraipatzeko. Brouardek azaldu duenez, urtetako menderakuntza, jazartze eta zigorrei aurre egiteko eta euskal kultura eta euskara, belaunaldiz belaunaldi, gorde eta transmititzeko, euskal emakumeek izan duten indarra, adorea eta balioa omendu nahi ditu Korrika 15ek.

Omenaldi honek iraganeko, egungo eta etorkizuneko euskal emakume guztiak hartuko ditu, adin, esparru eta ideologia guztietakoak, ezagunak eta ezezagunak. Horregatik ez dute omenaldi honetan aurpegi zehatzik erakutsi nahi izan, omendu nahi diren hainbat emakumek ez dutelako izen eta aurpegi ezagunik.

Ibilbideari dagokionez, Korrika 15 Karrantzan hasiko da, hain zuzen ere inoiz zapaldu gabeko eskualde bizkaitarrean. Euskal Herriko mendebaldeko inguru honetatik ez da Korrika inoiz pasatu eta urteak ziren bertako lagunek eskaera hori egiten ari zirela.

Hala ere, Asier Amondok azaldu duenez, ez zen batere erraza eskaera horri erantzutea, eskualdearen beraren kokapen geografikoagatik. Baina behin aukera aztertzen jarrita, pasatu ez ezik, bertan hastea erabaki zen, horrela hainbat urtetako presentzia eza nolabait konpondu nahian.

Karrantzan hasi eta Arabarantz abiatuko da berehala Korrika 15, handik Gipuzkoa aldera joteko. Bizkaian Elorriotik sartuko da, eta eskualde batzuetan izan ondoren, Arabako Lautadan eta Nafarroako hainbat eskualdetan ibiliko da, Iparraldean sartu arte. Donibane Garazi eta Maule zeharkatu, Baionara iritsi eta handik zuzenean Iruñerantz joko du Korrika 15ek.

Amondok azken eguneko alaitasuna euskararen aldeko aldarria izatea nahi dutela azaldu du, non eta Iruñean, Nafarroan, euskarak eta euskaltegiek bereziki pairatzen duten egoerari buelta ematea lor dezagun.

KORRIKA LAGUNTZAILEA

Azkenik, Mertxe Mujikak gogorarazi duenez, Korrika 15 dagoeneko martxan da, baina antolakuntza lanei aurre egiten jarraitzeko Korrika laguntzaile kanpainak ezinbestekoa izaten jarraitzen du. Aurten Nafarroako AEK-ko gau-eskola eta euskaltegiek, diru-laguntza publikoen ezagatik, pairatzen duten egoera ekonomiko tamalgarriari aurre egiteko erabiliko da batik bat Korrikaren bitartez lortutako dirua.

Korrika laguntzaile kanpainan parte hartzen duenak, euskarari eta AEKri laguntzeaz gain, Euskal Herriko 300 komertzio baino gehiagotan beherapenak izateko aukera daukala gogoratu du Mujikak.


374 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin