Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Kimuak 2006 katalogoko bi film labur garaile izan dira Mexiko eta Sitgeseko zinema jaialdietan


2006-11-08 12:30

Borja Cobeaga donostiarraren Eramos pocos Fikziozko Film Labur Onenaren Oscar saria jasotzeko hautatu dute aurrez

BILBO, 8 (EUROPA PRESS)

Kimuak 2006 katalogoa osatzen dutenen arteko bi film labur, Sarean eta For(r)est in the des(s)ert, garaile atera dira Mexiko eta Sitgeseko zinema jaialdietako sail ezberdineta, hurrenez hurren. Gainera, 2005ko katalogoa osatzen duten zazpi film laburren artean 237 sari lortu dituzte mundu osoko zinema jaialdietan. Horrez gain, Borja Cobeaga donostiarraren Eramos pocos Fikziozko Film Labur Onenaren Oscar saria jasotzeko hautatu dute aurrez.

Donostiako Nazioarteko Zinemaldian aurkeztuak izan ondoren, Kimuak 2006 programa berria osatzen duten zazpi film laburrak mundu osoko zinema jaialdietan ematen hasi dira. Aurtengo katalogoa aurretik ere Kimuaken obrak izan dituzten zuzendariek egindako film laburrek osatzen dute (Luiso Berdejo, Ione Hernandez, Koldo Almandoz, Asier Altuna), baina izen berriak ere sartu dira: Alberto Gonzalez, Gabe Ibañez eta David Gonzalez.

Egitasmoaren sustatzailea den Eusko Jaurlaritzako Kultura Sailaren arabera, horrek esan nahi du Kimuakek duen helburu bikoitza betetzen ari dela: alde batetik, jardunean diren film laburren egileak sendotzea eta haiei laguntzea, eta, bestetik, zuzendari berriak eta gazteak kontuan hartzea.

Ondokoak dira Kimuak 2006 katalogoa osatzen duten film laburrak:

Cirugia (Alberto Gonzalez); For(r)est in the des(s)ert (Luiso Berdejo); Juego (Ione Hernandez); Maquina (Gabe Ibañez); Midori (Koldo Almandoz); El relevo (David Gonzalez); eta Sarean (Asier Altuna).

Ibilbidea orain gutxi hasi badute ere, film labur horietako batzuk jaso dituzte jada sari batzuk. Horrela bada, esan bezala, Sarean filmak arrakasta izan zuen Guadalajarako Jaialdian (Mexiko); Cirugia filmak saria jaso zuen Notodofilmfesten; Midori-k euskarazko film labur onenaren Berria saria jaso zuen; eta For(r)est in the des(s)ert filmak Nazioarteko Film Labur Onenaren saria jaso du amaitu berri den Sitgesko Jaialdian. Gainera, Kimuakeko film laburrak, Donostiako Fantasiazko eta Beldurrezko Zinemaren Astean, Bilboko Zinebin edo Alcala de Henaresko jaialdia bezalako jaialdi garrantzitsuetan egon dira edo egongo dira.

KIMUAK

Kimuak euskal film laburraren hedapenerako, sustapenerako eta banaketarako programa da. 1998an sortu zuen Eusko Jaurlaritzak, eta bere Kultura Sailaren eta hainbat elkarteren lankidetzari eta lanari esker garatu da. Elkarte horiek kulturaren alorrean eta produkzio zinematografikoetan inplikatutako elkarteak dira.

Programa horren helburua Euskadin produzitutako film laburrak bultzatzea eta hedatzea da. 2005eko edizioaz geroztik, programa hori Euskadiko Filmategia Fundazioak kudeatzen du, eta Euskadiko ikus-entzunezkoa hedatzea du xede.

Kimuak 2005 katalogoari dagokionez, hilabete honetan amaituko du jaialdi-zikloa. Kimuak 2005eko film laburren ibilbidea ikusgarria izan dela eta izaten ari dela nabarmendu du programako koordinatzaile Txema Muñozek. Izan ere, gaur egun, zazpi film laburren artean 237 sari lortu dituzte Espainia mailako eta nazioarteko jaialdietan (Sintonia eta Eramos pocos nabarmendu dira, bakoitzak 62 sari erdietsi baititu), eta bost kontinenteetako jaialdietan 954 aukeraketa izan dituzte.

Gainera, film laburretako bat (Borja Cobeaga donostiarrak zuzendu duen Eramos pocos) Fikziozko Film Labur Onenaren Oscar saria jasotzeko hautatu dute aurrez, eta orain bi urte Nacho Vigalondoren 7:35 de la mañana filma iritsi zen lekura behintzat iritsiko dela espero du Kimuakeko arduradunek.

EUSKAL ETXEETAN ERE

Era berean, aipagarria da Kimuak ez dela soilik jaialdietara iristen; nazioarteko 200 banatzaileri, talentu harrapatzaileei, nazioarteko programatzaileei, instituzioei eta abarri baino gehiagori bidali zaie, eta, beraz, hedatu egingo dela eta merkatu garrantzitsuenetan egongo dela bermatzen da.

Muñozek adierazi du aurten Kimuakek harreman ezin hobea hasi duela munduan zehar banatuta dauden Euskal Etxeekin. Euskal Etxe horietatik 18k agertu du interesa programa horretan, batez ere Latinoamerikakoak, eta, aurreikuspenen arabera, katalogoa askoz ere gehiagok jasoko dutela gaineratu du.

Gaur egun, nazioarteko jaialdietan, telebistetan, eragileetan eta instituzioetan ospe handiko programa gisa finkatu delarik, Kimuakek duen funtsezko erronketako bat euskal film laburrak Euskadin bertan hedatzea da, eta, beraz, film laburren produkzioetara euskal ikus-entzuleak erakartzeko hainbat formula aztertzen ari dira.


180 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin