Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Jose Maria Etxaburu Kamiñazpi euskaltzain urgazlea hil da, 93 urte zituela


2006-12-29 11:57

BILBO, 29 (EUROPA PRESS)

Jose Maria Etxaburu Etxaburu Kamiñazpi euskal idazle eta euskaltzain urgazlea atzo hil zen, 93 urte zituela, Euskaltzaindiko iturriek gaur jakinarazi dutenez.

Etxaburu Ondarroan jaio zen, 1913ko irailaren 23an. Haurra zelarik, eskolara joan zen, baina 12 urte zituela lanean hasi zen, Ondarroako arrain lantegi batean. 15 urterekin musika bandan sartu zen eta solfeoa eta saxofoi altua ikasi zituen.

Osasun arazoak zirela eta, Kamiñazpi ez zen gerrara joan eta Donibane Lohizunera egin zuen alde. Han urtebete egin zuen, gero Landetara joan zen eta beste urte bat igaro ostean, Donibane Lohizunera itzuli zen, harik eta Bigarren Mundu Gerra hasi zen arte.

Azkenean, Ondarroarako bidean zela, preso hartu eta hainbat kartzelatan izan zen. Libre geratu zenean Ondarroako bere etxera joan zen. Ezkondu ostean Hondarribira joan zen bizitzera eta han eman du bizitza guztia.

20 urte zituela, herriko berriak idazten hasi zen Ekin aldizkarian. Gero, handik aurrera, Euzkadi egunkarian idatzi zuen, Iturri ondo eta Iturrondo ezizenak erabiliz. Gerra amaitu ondoren, 1957an, Zeruko Argia aldizkarian hasi zen. Orduan hautatu zuen Kamiñazpi ezizena. Goiz Argi, Karmel, Anaitasuna, Jakin eta El Bidasoa aldizkarietan ere argitaratu zituen bere lanak.

Pan-Pin haurrentzako aldizkarian, berak prestatu ohi zuen bizkaierazko orria. Ondarrabiako kondaira idatzi zuen, bai eta bertso berriak ere, eta Auspoan argitara eman.

Sari ugari jaso zuen, besteak beste Irungo lehen literatur lehiaketako sari nagusia, Errijaiak eta San Martzialgo Alardea lanagatik, edota Gernikaren 600. urteurrena zela eta, herri horretan antolatu zuten lehiaketako bigarren saria, Maitasunaren arantzak lanarekin.

Bizitza guztian euskararen alde lan egin zuen. Euskara bera debekatuta zegoen garaian, gramatika ikasketa batzuk prestatu zituen eta Ondarroan zegoen maisu galiziar baten laguntzaz, euskara irakasteko tokia lortu zuen. Eibarko ikastolaren sorreran ere parte hartu zuen.

1966ko azaroaren 25ean, euskaltzain urgazle izendatu zuen Euskaltzaindiak. 2001eko azaroaren 30ean, Hondarribiko Udalak omendu zuen. Euskerazaleak elkarteko kide zen.

Honako liburuak argitaratu zituen: Ondarrabiako kondaira (1966);

Txolintxu. (1972); Neure lau urteko ibilerak (1988); eta Neure idazlan bilduma (1991).


367 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin