Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Inasmet-Tecnaliak eta Feninen osasunaren arloan berrikuntza teknologikoa sustatzea adostu dute


2006-10-31 11:41

Bi elkarteek lankidetza-hitzarmena sinatu dute eta onurak guztiz positiboak izango direla azpimarratu

BILBO, 31 (EUROPA PRESS)

Inasmet-Tecnalia zentro teknologikoak eta Osasun-Teknologiako Enpresen Espainiako Federazioak (Fenin) lankidetza-hitzarmen bat sinatu dute gaur, osasunaren arloan ikerketa eta berrikuntza teknologikoa sustatze aldera.

Inasmet-Tecnaliako zuzendari nagusi Jose Manuel Giralek azpimarratu du onura guztiz positiboak lortuko direla eta, hitzarmena sinatu ondoren, osasun-arloko teknologia garatzen lagunduko dutela Euskal Herrian nahiz Espainian.

Inasmet-Tecnaliak, 1995. urteaz geroztik, osasunerako materialen aplikazioak lantzen ditu. Ordutik hona, industrian zein medikuen edo ospitaleko sektorean, ikerketa eta transferentzia teknologikoko lan garrantzitsua egin dugu. Akordio honi esker, indartsuago lana egiteaz gain, biomaterialeen, nanoteknologiaren eta bioteknologiaren arloak gehiago jorratu ahal izango ditugu, azaldu du.

Bestalde, Fenineko idazkari nagusia den Margarita Alfonselek adierazi duenez, azken urteetan Espainiako Osasun-Teknologiaren sektorea ahalegin berritzaile nabarmena egiten ari denez, pazienteei eskaintzen zaien laguntzaren kalitatea hobetzeaz gain, epe ertainera osasun-arloko gastua aurreztuko da. Bi abantaila horiek, zalantzarik gabe, funtsezkoak dira Osasun Sistemaren iraunkortasuna lortzeko, esan du.

Lankidetza-hitzarmena sinatzearekin batera, bi erakundeek ezagutzak, esperientziak eta proiektuak elkartrukatuko dituzte. Ildo horretan, Feninek Inasmet-Tecnaliaren aholkularitza izango du I+G+B programetan parte hartzeko. Bai Feninek bai Inasmet-Tecnaliak parte hartuko dute bi erakundeek gai interesgarrien inguruan antolatutako foro eta jardunaldietan.

Inasmet-Tecnaliaren Osasun Unitateak lanerako dituen ildo nagusiak, biomaterialak, nanoteknologia eta bioteknologia dira. Horien bitartez, zentroak ikerketa eta transferentzia teknologikoa lantzen ditu industria-arloan (osasun-produktuen fabrikatzaileak) eta medikuen zein ospitaleen sektorean. Gainera, Sortek Funtsaren laguntzarekin, zentro teknologikoak laguntza eskaintzen du oinarri teknologikoko enpresa berriak sortzeko.

Feninek, berriz, osasun-arloko teknologiak eta berrikuntza eta teknologiaren transferentzia bultzatzen ditu, beste zenbait funtsezko helburuen artean. Margarita Alfonselen hitzetan, berrikuntza da, ezbairik gabe, edozein enpresak eta, batez ere, Osasun-Teknologiaren sektorekoak, lehiakortasuna lortzeko duen faktore giltzarria; beraz, Feninek espero du Inasmet-Tecnaliarekin sinatu duen lankidetza-hitzarmena oso emankorra izatea eta, hitzarmen horrek Espainian berrikuntza areagotzen laguntzea.

BIOMEDIKUNTZAKO IKERKETA-PROIEKTUAK

Lankidetza-hitzarmenaren bitartez, Feninen helburua da haren enpresa elkartuek ikerketa-proiektuetan parte har dezaten sustatzea. Bioavan izeneko proiektua da abian jarri den lehena (produktu biomediko aurreratuak fabrikatzeko polimeroak funtzionalizatzeko sortutakoa).

Inasmet-Tecnaliako Osasun Unitateko arduraduna den Gregorio Ortiz de Urbinaren ustez, Bioavan proiektuaren asmoa da Osasun-Produktuen sektorearen lehiakortasuna hobetzea. Modu horretan, sektorea hazteaz gain, ETEak nazioartean zabalduko dira, eta patenteak sortu eta osasun-produktuak esportatuko dira.

Bioavan proiektuan biltzen dira proiektuak arrakasta izateko behar dituen funtsezko ezagutzak eta gaitasunak. Proiektuan parte hartzen dute ikerketa-arloan izen handia duten honako erakunde publiko hauek: Ikerketa Zientifikoen Goi Mailako Zentroak (CSIC), Euskal Herriko Unibertsitateak, Madrileko Unibertsitate Konplutentseak, Valladolideko Unibertsitateak, Inbasio Txikieneko Kirurgiaren Zentroak, Alcala de Henaresko Unibertsitateak eta Vigoko Ospitaleak.

Proiektuaren helburua da funtzio anitzeko material polimerikoak egitea, produktu biomedikoak fabrikatzeko; esate baterako, bakterio kontrako eta tronbosi aurkako propietateak dituzten material polimerikoak, material polimeriko termomodulagarriak eta material polimeriko biodegradagarriak.


204 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin