Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Herrizaingo Sailak arrisku kimikoaz ohartarazteko plana helaraziko die EAEko 70 mila biztanleri


2006-02-06 11:53



BILBO, 6 (EUROPA PRESS)

Eusko Jaurlaritzako Herrizaingo Saileko Larrialdiei Aurregiteko Zuzendaritzak Arrisku Kimikoari buruzko Komunikazio Plana abiatuko du gaur, EAEn mota horretako industrien inguruan bizi diren biztanle guztiei zuzenduta.

Ertzaintzaren webgunean adierazten denez, guztira hamaika herritako 70 mila bizilaguni helaraziko dizkiete inguruko jarduera industrialari buruzko informazioa eta larrialdi kimiko baten aurrean kontuan izan beharreko aholkuak emango dira. Gai horiei buruzko azalpenak emateko, informazio-liburuxkak postontziz postontzi sartuko dituzte, hitzaldiak eskainiko dituzte eta ikasgela mugikor bat erabiliko dute.

Komunikazio Plana ondoko herri hauetan abiatuko dute: Lantaron (Acideka eta General Quimica) eta Legutiano (Izcoa) Araban; Muskiz, Abanto-Zierbena, Zierbena (Petronor), Barakaldo (Fertiberia eta Oxinorte), Erandio (Fertiberia), Alonsotegi (Arkema), Gueñes (Arkema) eta Santurtzi (Repsol) Bizkaian, eta Hernani (Arkema eta Electroquimica) Gipuzkoan, guztira hamar enpresa.

Etxe horiek guztiak Seveso Europako araudiaren (horrelako jarduerak dituzten enpresek bete behar dituzten segurtasun-neurriak ezartzen ditu) baitan daude. Eremu arriskutsu bakoitzerako, Kanpo Larrialdietarako Plan berezia prestatu du Eusko Jaurlaritzak, enpresa horien kanpoaldean eragina izango lukeen ezbeharra izanez gero, egoerari aurre egiteko.

Ekintza plan horren baitan, inguruko biztanleak arrisku kimikoari buruz ohartarazteko plana dago eta Herrizaingo Sailak hirugarrenez jarriko du abian. Aurreko informazio-ekintzak 1997. eta 2000. urteetan egin zituzten.

Gaur hasiko da Komunikazio Plana, eta informazio-liburuxkak bidaliko dira etxez etxe. Horietan, biztanleengandik gertu zer-nolako jarduera kimikoa egiten den eta istripua izatekotan zer neurri hartu behar diren azaltzen dute. Larrialdiaren berri sirena-hotsez -oraingoz Muskizen, Abanto-Zierbenan, Zierbenan eta Lantaronen soilik-, Poliziaren megafoniaz eta agintariek irratietan eta telebistetan igorritako mezuen bidez eman dezakete.

Tankera honetako ezbehar baten aurrean, leku itxi batean babestea eta hedabideen informazioa kontuan izatea dira aholku behinenak. Gainerako gomendioak informazio-liburuxkan zehaztu dituzte, eta informazio-orri bakoitza ezberdina da, inguru bakoitzean egiten den jarduera industrialaren arabera.

Planaren bigarren urratsean, hitzaldi-sorta bat eskainiko diete udaletxeetako eta ikastetxeetako langileei eta auzo-elkarteetako kideei. Dena den, edozeinek har dezake parte deialdietan. Horietako bakoitzean, DVDak banatuko dituzte, informazio guztia sei minutuko ikus-entzunezko grabaketa batean bildu baitute.

Hitzaldiak osatzeko, Planak helburu dituen herrietan informazioa eskainiko dute, hirigunez hirigune joango den ikasgela higikor baten bitartez. Zeregin horretarako, argibide-panelak eta bestelako hezkuntza-materiala izango dituen mikrobus bat prestatu dute. Ibilgailuan, gainera, langile adituak izango dira, herritarren zalantzak argitzeko eta informazioa emateko.

IRITZI-INKESTA

Larrialdiei Aurregiteko Komunikazio Plana prestatzeko, inkesta egin diote arrisku kimikoan dauden herrietako 70 mila biztanleetako 2 milari. Horren bidez, bizilagunen %75ek inguruan industria kimikoak dituztela badakitela ondorioztatu zuten. Hala ere, %36k baino ez daki larrialdi kimiko baten aurrean zer egin.

Portzentajea %74 arte handitu zen Muskizen eta Lantaronen; hain zuzen, iaz soinu bidezko alarmak ezarri zituen Herrizaingo Sailak, eta gaur aurkeztutako Komunikazio Planaren antzeko bat abiatu zuen leku horietan. Azkenik, azpimarratzekoa da biztanleen %70 hitzaldiotan parte hartzeko prest agertu direla.

Planaren arduradunen iritziz, herritarrak halako hedapen-programen alde daudela erakusten du datu horrek. Herritarrek larrialdi kimiko baten aurrean bete beharreko jarraibideak

Eusko Jaurlaritzako Larrialdiei Aurregiteko Zuzendaritzak herritarrak heztea du helburu, Arrisku Kimikoari buruzko Komunikazio Planaren bidez, larrialdi kimiko baten aurrean babes-neurriak har ditzaten. Horrela, larrialdi alarma entzutean, biztanleek LEKU ITXI batean sartu behar dute, eta oinarrizko aholku batzuk bete behar dira, ateak eta leihoak erabat itxi (pertsianak ere, ahal den heinean) eta haietatik urrundu, besteak beste.




376 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin