Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Hamaika Telebista Hedatzeko Taldea sortu da, euskarazko telebista lokalak zabaltzeko helburuarekin


2006-09-19 13:41

BILBO, 19 (EUROPA PRESS)

Corporacion Multimedia del Norte (Deia-Noticias), Euskal Komunikabideak Hedatzeko Elkartea (Gara-Le Journal), Euskarazko Komunikazio Taldea (Berria-Hitza), Elkar argitaletxea eta banatzailea, Euskaltel telekomunikazioen operadorea eta Bainet zine ekoiztetxea eta telebista elkartu egin dira Hamaika Telebista Hedatzeko Taldea sortzeko, eta euskarazko telebista lokalak zabaltzeko helburuarekin.

Talde berria gaur aurkeztu dute Bilbon, eta ekitaldian izan dira CMN, EKHE eta EKT-ko kontseilari delegatuak diren Iñaki Alzaga, Gorka Altuna eta Joanmari Larrarte, hurrenez hurren, Mikel Astarloza Euskalteleko Negozio Garapeneko zuzendaria, Joxemari Sors Elkarreko arduradun nagusia eta Juanjo Landa Baineteko ekoizpenburua.

Hedabideen aurrean egindako agerraldian, arduradunek egitasmoaren helburu nagusia azaldu dute, hots, digitalizazioaren abantailak aprobetxatzea euskarazko telebista lokal gehiago sortzeko, euskarak esparru honetan duen presentzia eskasa kezkagarria delako.

Taldearen izenak (Hamaika Telebista Hedatzeko Taldea) definizio zabala daukala azaldu dute arduradunek, eta izen horretan telebista lokal ugari biltzea espero dute, oraingoz kopuru osoa zehaztu ezin duten arren.

Horretarako, Larrartek aipatu duenez, bihartik aurrera bilerak eta elkarrizketak izango dituzte eskualde ezberdinetako kolektibo ezberdinekin, eta Nafarroa eta Iparraldea baztertuko ez dituztela azpimarratu du.

OINARRI SENDOA

Sei enpresek elkarrekin abiarazitako ekimenak oinarri sendoa dauka, denek egin baitute bat euskara eta telebista gehiago lotzeko helburu bateratuarekin. Gainera, etorkizunean enpresa gehiagok bat egitea espero dute.

Parte-hartzaileen artean hedabideak daude: Noticias-Deia, EKHE (Gara-Le Journal) eta EKT (Berria eta Hitzaren zazpi egunkariak). Euskaltelek bazkide teknologiko gisa hartuko du parte, zuntz optikoko azpiegiturak eta zabalkunde aukerak eskainiz.

Bestalde, Bainetek telebista-produkzioan duen esperientzia eskainiko du, eta Elkarrek euskal kulturako erreferentziak emango dizkio taldeari.

Larrartek azaldu du egitasmoak hiru oinarri sendo dituela jada: telebista-kate berrien zabalkuntza errazten duen teknologia digitalaren eraginkortasuna, Euskaltelek emana; sektorea ezagutzen duten enpresa batzuren babesa; eta Eusko Jaurlaritzak emango dituen lizentziak.


224 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin