Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-HABEk urriaren 6a arte zabaldu du euskaltegietako ikasleek diru-laguntzak eskatzeko epea


2006-09-26 16:26

BILBO, 26 (EUROPA PRESS)

Helduen Alfabetatze eta Berreuskalduntze Erakundeak (HABE) zabalik du euskaltegietako ikasleentzako urtero egin ohi duen diru-laguntzen deialdia. Eskatzaileek urriaren 6a izango dute eskaera aurkezteko azken eguna. HABEk urtero antolatzen ditu azterketak, euskaltegiekin elkarlanean eta euskaltegietako ikasleei zuzenduak, Helduen Euskalduntzearen Oinarrizko Kurrikuluaren (HEOK) 1. eta 2. maila egiaztatu edo EGA eskura dezaten.

Gainera, 2006. urtean, HEOKaren 4. maila egiaztatzeko azterketa izan da lehenbiziko aldiz, 2005/06 ikasturtean 4. maila saio esperimental modura irakatsi baita euskaltegi batzuetan, HABEren gidaritzapean.

Zabalik dagoen laguntza deialdian, 2006ko azterketa deialdian HEOKaren 1., 2. edo 4. maila egiaztatu duten ikasleek eta 2005eko bigarren deialdi itxian (euskaltegietako ikasleei zuzendurikoan) edo 2006ko lehenengo deialdi itxian EGA eskuratu duten ikasleek egin dezakete eskaria.

Ikasleek euskaltegian ordaindutako matrikula kostuak berreskuratzeko edo leuntzeko helburua du deialdi honek eta, beraz, deialditik kanpo geratzen dira, Administrazio Publikoko langile izanik, horrek finantzatuta eskolatu diren ikasleak.

2006ko deialdian 1.425 ikasleek gainditu dute 1. maila (aurkeztutakoen %66), 1.066k 2. maila (aurkeztutakoen %52) eta 16k 4. maila (aurkeztutakoen %66). EGAri dagokionez, berriz, 2005eko bigarren deialdi itxian eta 2006ko lehenengo deialdi itxian guztira 1.156 ikasleek eskuratu dute agiria.

Egiaztatu den maila bakoitzeko jarraian zehazten den kopurua eskura dezake gehienez ikasleak: HABEk deitutako 1. mailan, 600 euro; HABEk deitutako 2. maila, 400 euro; EGAko deialdi itxietan, 400 euro; eta HABEk deitutako 4. mailan, 400 euro.

Maila bakoitzerako ikasketak behin bakarrik lagunduko zaizkio diruz ikasleari. HABEren diru-laguntza osorik eskuratzeko, ikasleak zuritu beharko du matrikuletan beste horrenbeste ordaindu izana.

Diru-laguntza bateragarria izango da xede berarekin jaso daitekeen beste edozeinekin, baldin eta gain-finantzaziorik sortzen ez bada matrikula gisa ordaindutakoari dagokionez.

Diru-laguntzen deialdi honetan esku hartu nahi dutenek, www.habe.euskadi.net web-orrian egongo den eskariko datu-orria bete beharko dute. Eskariarekin batera, euskaltegi edo auto-ikaskuntzarako zentro homologatuak emandako agiriak aurkeztu behar dira, 2003-04, 2004-05 eta 2005-06 ikasturteetan egindako ikastaroei eta matrikula gisa ordaindutako kopuruei buruzkoa.

Eskatzaile bakoitzak datu-orria eta euskaltegi/zentroak emandako agiria HABEren zuzendaritzari aurkeztu behar dizkio, HABEren edozein bulegotara eramanez, Donostian, Gasteizen edo Bilbon. Bestela, postaz ere aurkez ditzake, baina betiere Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legeak aurreikusitako beste edozein prozedura baliatuz.


193 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin