Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Getxon Bizi atzerritarrentzako harrera-programak lau tailer eta txango batzuk eskainiko ditu aurten


2009-02-05 17:56

BILBO, 5 (EUROPA PRESS)

Getxon Bizi atzerritarrentzako harrera-programaren hirugarren edizioak lau tailer eta txango batzuk eskainiko ditu aurten, otsailetik urrira bitartean, Getxoko Udaleko (Bizkaia) Gizarte Zerbitzuetako Immigrazio eta Kulturarteko Unitateak antolatuta, Munduko Medikuak Gobernuz Kanpoko Erakundearekin elkarlanean.

Aurtengo harrera-programaren aurrekontua 17.500 eurokoa da.

Egitasmoaren helburua pertsona etorkinekin lan egitea da, beren errotzea lortzen laguntzeko eta horrela bertokoa izateko sentimendua bultzatzen eta horiek ahalbideratzen dituzten sareak osatzen laguntzea, normalean egoera irregularrean dauden pertsonak izaten baitira eta horregatik harremanetan sartzeko arazoak izaten baitituzte.

Horregatik, Getxon Bizi programak prestakuntzarako, aisirako eta inguruaren eta harrera-gizartearen ezagutzarako espazioak biltzen ditu, helburu nagusia atzerritik etorri diren eta azken urteotan Getxon bizitzea erabaki duten herritarrek ahalik eta ongizate handiena izatea eta hemen errotzen laguntzea baita, Elena Coria Gizarte Zerbitzuetako zinegotziak programaren aurkezpenean azaldu duenez.

Aurtengo berrikuntzen artean tailer bakoitza amaitutakoan txango bat egitea izango da, euskal geografiako hiri eta toki adierazgarrienetan zehar, euskal historia eta kultura ezagutuz. Izan ere, oraingoan txangoei edukiera eman nahi zaie eta horregatik tailerretan parte hartzen dutenekin antolatuko dira.

Iazko edizioan tailerretan 78 lagunek hartu zuten parte eta txangotan 300 baino gehiagok. Parte-hartzaileen %80 emakumeak izan ziren eta horietatik %50 Boliviakoak.

Programa honen balantzea oso positibotzat jo dute antolatzaileek, argi geratu delako pertsona askorentzat udalerriarekin duten lehenengo kontaktua izaten baita, adierazi du Estibaliz Gil Miguel Munduko Medikuak GKEko ordezkariak.

TAILERRAK

Lehenengo tailerra ostalaritzari buruzkoa izango da. Otsailaren amaieran hasiko da eta izena emateko epea otsailaren 9an zabalduko da. Zerbitzari moduan lan egiteko edota lanpostu horretan hobetzeko prestakuntza jasoko dute parte-hartzaileek. Saioak otsailaren 22an, martxoaren 1ean, 8an, 15ean eta 29an eta apirilaren 19an ere.

Nahi duten parte-hartzaileek apirilaren 26an Bilboko itsasadarretik egingo den txangoan parte hartu ahal izango dute, eta itsasadarraren bi ertzek bizi izan duten hiri eta industri garapena ezagutzeko aukera izango dute.

Informatika tailerra aurtengo beste berrikuntza bat izango da, eta horretan internetek senideekin eta lagunekin harremanetan jartzeko eskaintzen duen aukera aprobetxatuko da. Saioak maiatzaren 10ean, 17an, 24ean eta 31n izango dira, eta izen-ematea apirilaren 24an hasiko da. Amaierako txangoa Gasteizera izango da.

Besteren laguntza behar duten pertsonen zaintza delako tailerraren saioak ekainaren 21ean eta 28an eta uztailaren 5, 12, 19 eta 26an izango dira. Izen-ematea ekainaren 5ean hasiko da. Gaixorik dauden edota ezintasunen bat duten adinekoak zaintzean profesionaltasunez aritzen ikasiko dute eta baita zaintzaileek euren burua zaintzeko behar dituzten baliabideak edukitzen ere. Txangoa Donostiara izango da.

Azkenik, elikadura eta sukaldaritzari buruzko tailerrean parte hartzeko izena emateko epea abuztuaren 28an hasiko da eta irailaren 13an, 20an, 27an eta urriaren 4ean, 11an eta 18an egingo da. Amaitutakoan Gernikako Kulturarteko Topagunera joango dira.

Tailerrak doakoak izango dira eta otsaila eta urria arteko igandeetan egingo dira, 10:00etatik 14:00etara, Erromoko Ezequiel Agirre kaleko 21 zenbakian dagoen egoitzan; informatikako tailerra Fadura Institutuan izango da. Izen-emateak Getxoko Herritarren Arretarako Bulegoetan egin behar dira eta informazio gehiago lortzeko Gizarte Zerbitzuen telefono zenbakira dei dezakete interesatuek: 94 466 01 30.

Gainera, udan txango bat egiteko deialdi irekia izango da Markina-Bolibarrera joateko, Simon Bolivar jaio zen ingurura. Bertako eta itsasoz haraindiko komunitateak elkartzeko aukera izango da, eta, era berean landa-ingurunea eta euskal kultura hobeto ezagutuko dute. Izena emateko epea abuztuaren 14ean hasiko da.


261 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin