Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Gecem Masterrak aurpegiaren identifikazioan oinarrituriko segurtasun-sistema biometrikoak garatzeko proiektua saritu du


2009-02-04 12:59

BILBO, 4 (EUROPA PRESS)

Aurpegiaren identifikazioan oinarritutako segurtasun-sistema biometriko aurreratuak garatu eta merkaturatzen diharduen Face Systems enpresa-proiektua izan da Gecem Masterraren XII. edizioko lehenengo sariaren irabazlea. Masterra ekimen aitzindaria da, titulazio desberdinetako ikasle-taldeei enpresa-proiektuak egiteko aukera ematen diena, ezaguerak trukatuz eta enpresa-kudeaketaren alor desberdinetako erronkei aurre eginez.

Enpresen Lehiakortasunerako Kudeaketa Masterra (Gecem), Bizkaiko Ingeniari eta Abokatuen elkargo ofizialek, Ekonomisten Euskal Elkargoak eta Bilboko Ingeniaritza Goi Eskola Teknikoko Enpresa-Antolaketa Sailak sustatutako ekimena da, Cebek Bizkaiko Enpresarien Konfederazioaren eta Zuzendaritzaren Aurrekuntzarako Elkartearen (APD) lankidetzarekin eta Iberdrola eta Bizkaiko Foru Aldundia bezalako erakundeen babesaz.

Hauexek izan dira proiektu irabazlea landu duten sei ikasleak: Asier Echaurren Gaviña, Meatzaritzako ingeniari teknikoa; Maria Fernandez Rodriguez, Biokimikan Lizentziatua; Julen Macazaga Beobide, Industri ingeniari teknikoa; Gorka Ruiz de Austri Bilbao, Antolaketa ingeniaria; Miguel Valbuena Anton, Informatika ingeniaria; eta David Vidal Miguelez, Industria ingeniaria.

Segurtasunaren alorreko sistema biometriko aurreratuak garatu eta merkaturatzea da Face Systems deritzon proiektu berritzaile honen xedea. Biometria pertsonen identifikazio zalantzaezina errazten duten metodo automatikoen ikerketa da. Metodo horiek ezaugarri fisikoetan eta portaerari dagozkionetan oinarritzen dira, hau da, hatz-marka, erretina, iris, aurpegi-eredu, ahots edo sinaduran.

Gecem Masterraren edizio honetako irabazleak aurpegi bidezko identifikazioaren alde azaldu dira, hauxe baita hazkunderik handiena izan duen bigarren teknologia biometrikoa. Gainera, teknologia honek aplikazio-eremu ugari ditu, horietako batzuk orain arte estali gabe egon direnak -kamera batek grabatutako aurpegia prozesatu eta erabiltzailearen ezaugarri biometrikoekin konparatzen duten txartel adimendunak, kasu-, eta honek aparteko balioa gaineratuko lieke erabiltzaile potentzialei.

AKZESITA

Lehenengo sariarekin batera, Gecem Masterreko epaimahaiak Ohorezko Akzesita eman dio Comhorvisa deritzon proiektuari. Hormigoizko modulu aurrefabrikatuak erabiliz, familia bakarreko etxebizitzak diseinatu, eraiki, muntatu eta merkaturatzea da proiektuaren helburua.

Kasu honetan, hauek izan dira proiektua aurkeztu duten ikasleak: Gonzalo Alvarez Zubiaur, Antolaketa ingeniaria; Zaloa Campillo Mandaluniz, Telekomunikazio ingeniaria; Javier Garcia Paja, Industria ingeniaria; eta Santiago Gonzalez de la Torre, Fisikan lizentziatua.

Ekimena han-hemenka detektatutako negozio-aukera desberdinetan oinarritzen da, hala nola, biztanleriaren zati nabarmen batek hiri handien inguruetan bizitzera joateko duen aurrejoeran edota euriborraren jaitsierak eragingo duen finantza-baldintzen hobekuntzan.

Modulu-paneletan espezializatutako enpresa izango litzateke. Diseinua eta erabilitako materialak gogoan hartuta, eraikuntza-mota hori aisa asko moldatzen da Mesetaren Iparraldeko eremu geografikora, eta ondorioz, produkzio-gunea Burgos inguruan kokatuko litzateke.

Bestalde, saritutako bi proiektuez gain, epaimahaiak Gecem Masterraren azken edizio honetan parte hartu duten bi pertsonen banakako lana nabarmendu du, ohiturari jarraituz. Aintzatespen hauek, ikasle, hizlari eta zuzendaritza kontseiluaren artean lotura edo eragilearena egin duen Miguel Valbuena Anton Informatika ingeniariarentzat eta ikaskideek Masterreko ikaslerik bikainentzat jo duten Javier Garcia Paja Industria ingeniariarentzat izan dira.

GECEM MASTERRA

Orain arte antolatu diren 12 edizioetan, graduondoko 350 ikasle inguruk parte hartu dute Gecem Masterrean. Enpresetako etorkizuneko goi-kargudunei jarduera-esparru desberdinetan erabakiak hartzeko behar duten ezagutza eta esperientziaz hornitzea da ekimenaren helburua. Azken edizio honetan, 21 izan dira matrikulatutako ikasleak.

Masterrak 15 hilabetetan banatutako 500 eskola-orduko iraupena du, Bizkaiko Ingeniarien Elkargo Ofizialaren lokaletan ematen da, eta lana zeregin exekutiboetan edo zuzendaritza karguetan egiten edo egingo duten goi-titulazioko profesionalei zuzenduta dago.

Graduatuei prestakuntza akademikoan argitu gabe geratu diren alderdiak argitzeko aukera ematea da helburu nagusia, baita ezaguerak trukatzea eta beren ikusmoldea aberastea ere, beti ere enpresen lehiakortasunari begira. Hitz gutxitan esanda, xedea geroko exekutiboei erabakiak hartzeko ezaguerak eta esperientzia ematea da.

Gecem Masterra Euskal Herriko Unibertsitatearen ekimen aitzindaria da, matrikulatutako ikasleei beren ogibideetako kudeaketan eta zuzendaritza arloko zereginetan era erraz eta praktikoan sakontzeko aukera ematen diena. Masterra zortzi moduluk osatzen dute, eta bakoitzaren ardura enpresa-kudeaketan eta irakaskuntzan esperientzia zabala duten profesionalen esku geratu da, aholkulariak, unibertsitate-irakasleak, teknologia zentroetako profesionalak eta enpresetako goi-kargudunak tarteko direla.


531 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin