Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Garcia-Viana, Alaitz Olaizola, Aintzane Galardi eta Gartzia Trujillo, Euskaltzaindia-BBK Literatur Sarien irabazleak


2006-12-18 16:48

BILBO, 18 (EUROPA PRESS)

Euskaltzaindiak eta Bilbao Bizkaia Kutxa Fundazioak urtero elkarrekin antolatzen dituzten eleberri, antzerki, olerki eta saiakera-sarien 2006. urteari dagozkion irabazleen izenak jakinarazi dira gaur. Txomin Agirre eleberri-saria, Txema Garcia-Vianak lortu du; Toribio Altzaga antzerki-saria, Alaitz Olaizolak; Felipe Arrese Beitia olerki-saria, Aintzane Galardik; eta Mikel Zarate saio-saria, Sebastian Gartzia Trujillok.

Txema Garcia-Vianak, XIII. mendean girotutako Arkitektoa eleberriari esker irabazi du saria. Irabazlea Donostian sortu zen, 1963an. Lanbidez garraiolaria, eta, idazle bezala, gehienbat misterio kutsuko narrazioak idatzi ohi izan ditu. Literatur kritikak ere eginak ditu hainbat aldizkaritan.

Literatura sarien alorrean berriz, 1996an Pasaiako ipuin lehiaketa irabazi zuenetik beste sei sari jaso ditu, Urnietako narrazio lehiaketa azkena delarik (tartean Antonio Maria Labaien gazteentzako narrazio saria bi aldiz irabaziz).

Bestalde, Alaitz Olaizolak, Joanes. Itxaropenaren semea lanarekin lortu du Toribio Altzaga antzerki-saria. Olaizola Azpeitian jaio zen, 1975ean, eta haur hezkuntzan diplomatua da. Azpeitiako Ikasberri ikastolako Lakrikun antzerki taldeko partaidea da azken hamar urteotan. Antzerkia idatzi eta egiteaz gain, antzerki lantegiak ematen ditu herrian bertan.

Aintzane Galardi Portuk Felipe Arrese Beitia olerki-saria lortu du Zirrikituak obrarekin. Oiartzuarrak Euskal Filologia Lizentziatura eta Kultur Baliabideen Kudeaketa espezializazioa Deustuko Unibertsitatean eskuratu zituen. 1996az geroztik, Nafarroan dihardu lanean. Itoti urdinaren azpian liburuak Felipe Arrese Beitia saria lortu zuen, 2004an.

Azkenik, Sebastian Gartzia Trujillok Herri maitea. Herri dorpea lanarekin lortu du Mikel Zarate Saiakera Saria. Saiakera honetan Bitoriano Gandiagaren Hiru gizon bakarka (1974) olerki liburua aztertu, sakondu eta azaltzen da.

Gartzia Trujillo 1944an jaio zen, Lutxana-Barakaldon. Ekonomia Zientzietan lizentziatua eta Euskal Filologian doktorea da. Finantza enpresa batean lan egin du, Ikerketa Departamentuan. Gaur egun aurrejubilatua dago eta Eliz Barrutiko Teologia eta Pastoral Institutuan kolaboratzaile da. Euskaltzain urgazlea ere bada. El País egunkarian eta zenbait aldizkaritan kolaboratu du, urteetan, ekonomia arloko artikuluak idatziz.


755 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin