Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Eusko Labela duen Esne Bildotsaren Festa ospatuko da larunbatean Gasteizen


2009-02-04 13:37

GASTEIZ, 4 (EUROPA PRESS)

Kalitatea Fundazioak eta Arabako Foru Aldundiak Eusko Labela duen Esne Bildotsaren Festa antolatu dute larunbat honetarako Gasteizko Foruen Plazan, Udalaren, Vital Kutxaren eta Gasteiz On merkatarien elkartearen laguntzarekin Foruen Plazan.

Egun horretan, goizez, Carlos Ibarrondo adituak Gasteizko ekoizleek ekarritako 32 esne bildots burruntzian erreko ditu aldi berean. Erreketa 10:00etan hasiko da, eta 13:00etatik aurrera jateko prest egongo direla espero da. Orduan hasiko dira bildotsak zatitzen eta ondoren mila pintxotik gora eskainiko dira.

Pintxoak euro baten truke banatuko dira eta dastaketa Foruen Plazan izango da. Jaki gozo hau dastatu nahi dutenek ticket bat erosi beharko dute Esklerosi Anizkoitzaren Eugenia Epalza Euskal Fundazioaren Arabako AEMAR ordezkaritzak bertan jarriko duen salmenta postuan.

Gainera, dastaketa gunearen ondoan, Arabako ekoizleen produktuak salduko dituen nekazaritza-azoka txikia ere egongo da, eta bertan, besteak beste, gazta, ogia, txakolin edo sagardoa erosteko aukera izango dute gerturatzen direnek.

Arabako Nekazaritzako foru diputatu Estefania Beltran de Herediak eta Kalitatea Fundazioaren presidente Jose Antonio Susok aurkeztu dute gaur ekimena. Larunbateko festarekin produktua sustatu nahi dute, bere ezaugarriak jakinarazteko eta Arabako artzainak babesteko. Beraiekin batera Gasteizko Udaleko Ekonomia Sustapen eta Estrategia Plangintzaren Saileko zinegotzi Isabel Martinez izan da.

Eusko Labela duen benetako Esne Bildotsa garaiko produktu bat da, azarotik maiatzera bitartean ekoizten dena, Euskadi bertako arrazetakoa: Latxa eta Karrantzana. Bere amaren esneaz elikatzen da eta 3 eta 5 aste artean dituenean hiltzen da; horrek, emaitza bezala haragi samur eta zapore bikainekoa dakar.

Produktu hori bere fase guztietan kontrolatuta dago ekoizpenetik hiltegiraino. Ekoizpenean, baimendutako artzainen erregistroak kontrolatzen dira eta jatorri geografiko eta genetikoaren eta elikaduraren kontrola ere egiten da.

Hiltegian berriz, Kalitatea Fundazioko berezitatutako teknikariek bildotsen hilketa eta prestaketaren lan zorrotza gainbegiratzen dute, produktuaren araudian ageri diren kalitate ezaugarriak kontuan hartuz, eta azkenean, bildotsak Eusko Label bezala identifikatuz. Eusko Labela duen Esne Bildotsak Eusko Labelaren logotipoa duten zenbatutako lau kontrol etiketa daramatza, bat laurden bakoitzean. Etiketotan hiltze data eta hiltegiaren izena agertzen da.

Eusko Label marka lortu zuen lehenengo produktua izan zen Esne Bildotsa, eta bere jokabidea azpimarratzekoa izan da ordutik: 1994. urtean Euskal Autonomia Erkidegoan erregistratuta zeuden 81 artzainek 32.000 kilo bildots merkaturatu zuten marka honekin, eta 2008an 392 erregistratuek 200.000 kilo produktu identifikatuta baino gehiago ipini zuten merkatuan.

Produktu honen ezaugarriak ezagutarazteko eta sustatzeko, Kalitatea Fundazioak promozio kanpaina bat jarri du martxan, ekoizleei, saltzaileei eta kontsumitzaileei zuzenduta. Gasteizen -eta aldi berean Bilbon eta Donostian- larunbatean izango den festa kanpaina honen barruan sartzen da.


431 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin