Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Eusko Jaurlaritzako Hizkuntz Politikarako sailburuordea Latinoamerikan dago euskara ikastaroak bultzatzeko


2006-11-02 18:29

GASTEIZ, 2 (EUROPA PRESS)

Patxi Baztarrika Eusko Jaurlaritzako Hizkuntz Politikarako sailburuordea eta Lorea Bilbao Eusko Jaurlaritzako Kultura Saileko Zerbitzuen zuzendaria Latinoamerikan daude bisitan, Uruguai, Txile, Argentina eta Mexikoko unibertsitate nagusietan ematen diren euskara eta euskal kulturari buruzko ikastaroak berritu eta hobetzeko helburuarekin.

Eusko Jaurlaritzako iturriek prentsa-ohar bidez gaur jakinarazi dutenez, Etxepare Euskal Institutua izango denaren sorreraren testuinguruan kokatzen da bidaia. Etxepare Institutuaren xedea euskara eta euskal kultura munduan zehar zabaltzea eta sustatzea izango da.

Euskara eta euskal kulturari buruzko ikastaroak emateko Eusko Jaurlaritzako Kultura Sailaren eta Uruguaiko Errepublikako Unibertsitatearen arteko hitzarmena berretsi ondoren, Baztarrika Uruguaiko Euskal Erakundeen Federazioko (FIVU) ordezkariekin bildu zen eta Montevideoko Euskal Herria eta Haize Hegoa euskal etxeak bisitatu zituen.

Ondoren, Txilera joan zen Santiago eta Valparaisoko unibertsitate nazional eta katolikoetan euskara eta euskal kulturaren ikastaroak berritzeko eta hobetzeko asmoz.

Txilen izan eta gero, Baztarrika eta Bilbao Argentinara abiatu ziren. Bertan, joan den astelehenean, bilerak izan zituzten Buenos Airesko Unibertsitateko Filosofia eta Letren Fakultateko Errektoregoarekin eta dekanordearekin, etorkizunean euskara ikastaroak indartu eta zabaltzeko balioko duen hitzarmen bat gauzatzeko asmoz. Datozen egunetan, Eusko Jaurlaritzako ordezkaritza Cordoba eta La Plata hirietara joango da.

2006-2007 ikasturtean Argentinan euskara ikasten ari diren 820 bat ikasle daude, bai eta bertako 42 irakasle eta 50 bat euskal etxetan euskara ikastaroak ere. Momentu honetan, 1.500 bat ikasle ari dira euskara ikasten Amerikako euskal etxeetan, eta beste 700 Europakoetan. AEBtan 60 euskal etxe existitzen dira eta haietako 30etan ari dira euskara ikastaroak ematen.


155 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin