Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Eusko Jaurlaritzak zeliakoentzako menuez informatzen duten 50.000 liburuxka banatuko ditu jatetxe eta turismo bulegoetan


2009-02-11 17:30

BILBO, 11 (EUROPA PRESS)

Eusko Jaurlaritzako Industria Sailak zeliakoentzako menu batentzako osagai egokiei buruzko informazioa biltzen duten 50.000 liburuxka argitaratu ditu. Euskaraz, gaztelaniaz eta ingelesez editatutako diptiko horiek Euskal Autonomia Erkidegoko (EAE) 3.000 jatetxetan banatuko dira euskal ostalaritza-establezimenduetan lan egiten duten langileei informazioa ematearren.

Era berean, Euskadin bizi diren edo Euskadi bisitatuko duten zeliakoei banatuko zaie diptikoa, zeliakoen elkarteen eta euskal turismo-bulegoen bidez, jatetxe batera joaten diren bakoitzean euren premiei buruzko azalpenak emango dituen agiri bat izan dezaten.

Jaurlaritzako Industria, Merkataritza eta Turismo Sailak, Osasun Sailak eta Nekazaritza, Arrantza eta Elikadura Sailak Euskadiko Zeliakoen Elkartearekin sinatutako lankidetza-hitzarmenean bilduta dago ekimena, gaixotasun zeliakoari buruzko informazioa emateko ekintza bateratuak egitearren.

Izan ere, elikagaien glutenarekiko jasanezintasun kronikoaren gaixotasuna 4.000 pertsona ingururi diagnostikatu zaie Euskadin, eta gaixotasun horrek jota daudela ez dakiten beste 16.000 pertsonari eragin diezaiekeela kalkulatu da. Glutena oso ohikoa den osagaia da, eta elikagai-produktu askotan dago, hala nola garia, espelta, oloa, garagarra, zekalea, tritikalea, kamuta eta horien deribatuekin (irinak, semolak, almidoiak eta fekulak, besteak beste) landutako elikagaietan.

Beraz, liburuxka horietan ematen den informazioa kontuan hartuta, zeliakoek ezin dituzte honako elikagai hauek jan: irinarekin edo ogi birrinduarekin loditutako saltsak dituztenak, adobatuak edo arrautza-irinetan pasatuta daudenak, garagardoarekin edo irinarekin egindako elikagai erreak, hestebeteekin prestatutakoak, koloragarriarekin edo piperrautsarekin egindakoak eta abar. Era berean, ezin dute kroketarik, enpanadillarik, pizzarik, pastarik edo gozorik jan.

Zeliakoentzako aukera segurua egosita, plantxan edo txingarretan egindako elikagaiak edo egoera naturalean dauden elikagaiak dira: entsaladak, ozpinetakoak, barazkiak, ortuariak, lekaleak, arrautzak, itsaskiak, arrainak, haragiak, urdaiazpikoa, arroza, artoa, soja edo patata, besteak beste.

KONTROL KANPAINAK

Era berean, adierazitako lankidetza-hitzarmenaren esparruan, Eusko Jaurlaritzaren Kontsumo eta Industria Segurtasuneko Zuzendaritza haurrentzako ahien, saltsen, hestebeteen, haragi-prestakinen, esne-postreen eta glutenik gabeko produktu gisa katalogatutako aperitiboen laginak hartzeko urteko kanpainak egiten ari da baieztapen horren egiatasuna egiaztatzeko, laborategi espezializatuetan azterketak eginez.

Elisa R-5 metodoaren bidez egindako azterketa horien emaitzak oso positibotzat har daitezke, urterik urte hobetzen ari baitira 2005. urtean kanpaina hau hasi zenetik. Horrela, glutenik gabeko elikagaien laginak lehen aldiz hartzean, duela lau urte, hain zuzen ere, aztertutako elikagaien %33k kilo bakoitzeko 16,8-132 miligramo gluten zutela atzeman zen eta 2006. urtean, berriz, produktu guztiek kilogramo bakoitzeko 20 mg-tik beherako kantitateak zituzten.

Atzemandako gluten-dosiak gero eta gutxiago dira 2008. urtean egindako kanpainara arte eta behin-behineko emaitzek erakusten dutenez, aztertutako elikagaien %95ek baino gehiagok kilogramo bakoitzeko 3 mg-tik beherako gluten-dosia zuten. Lagin batek baino ez zituen kantitate handiagoak, baina betiere araudi berrian baimendutako 20 mg-tik behera kilogramo bakoitzeko.


521 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin