Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Eusko Jaurlaritzak eta Euskalitek enpresetako hizkuntz normalizaziorako prozesuen ebaluazio eskemak zehaztuko dituzte


2006-10-02 13:08

BILBO, 2 (EUROPA PRESS)

Kalitatea eta euskara lotzen dituen ziurtagiri publikoa izango da lehenengo aldiz Euskal Autonomia Erkidegoan, eta horretarako, Eusko Jaurlaritzako Hizkuntz Politikarako Sailburuordetzak eta Kalitatearen Sustapenerako Euskal Iraskundeak (Euskalit) lankidetza-hitzarmena sinatu dute enpresetako hizkuntza-normalizaziorako prozesuen ebaluazio-eskemak zehazteko.

Hitzarmen honen bidez, euskara planak garatzen ari diren erakundeei ebaluaziorako tresna egokia eskaini nahi zaie, gaur egun indarrean dauden kalitatea ziurtatzeko sistemetan jasotako irizpide eta parametroetan oinarrituta. Horretarako, erakunde pribatuetako euskararen erabilera ebaluatzeko eta antzemateko sistema garatuko du Euskalitek Hizkuntza Politikarako Sailburuordetzarekin batera.

Aurki, Eusko Jaurlaritzak, EAEko hiru foru aldundiek eta Eudelek LanHitz programa-markoa aurkeztu zuten, alor sozio-ekonomikoan euskararen presentzia eta erabilera areagotzeko. Aldi berean, enpresari-elkarteek (CONFEBASK, ADEGI, CEBEK eta SEA) alde batetik, eta EAEko sindikatu nagusiek (ELA, CC.OO., LAB eta UGT), bestetik, hitzarmenak sinatu berriak dituzte Eusko Jaurlaritzarekin; hitzarmen horietan espreski jasota dago Eusko Jaurlaritzaren konpromisoa dela arlo sozioekonomikorako euskararen erabilera ebaluatzeko eta errekonozitzeko sistema sortzea.

Hortaz, LanHitzen programa-markoaren garapenerako, pauso erabakigarria da kalitatea eta euskara lotuko dituen ziurtagiri publikoa izatea, Hizkuntz Politikarako Sailburuordetzako eta Euskaliteko arduradunek Bilbon eskainitako prentsaurrekoan gaur nabarmendu dutenez.

Horiek gogoan, Euskalit eta Eusko Jaurlaritza, Hizkuntz Politikarako Sailburuordetzaren bidez, elkarlanean arituko dira EAEko enpresetako hizkuntza-normalizaziorako prozesuen garapen-maila egiaztatuko duen ebaluazio edota errekonozimendu sistema bat zehazteko, diseinatzeko eta sortzeko, bai eta ebaluazioak egiteko sistemarik egokiena finkatzeko lanean aurrera egiteko ere.

LAN-ARDATZAK

Hitzarmenean jasotakoaren arabera zenbait lan egingo dira 2006. urtean zehar. Alde batetik, ebaluaziorako eskema zehaztu eta aitortza-moduak finkatuko dira ebaluatuak izango direnentzat; bestalde, zabalkunde, sentsibilizazio eta sustapen ekintzak definituko dira eta komunikazio-ildoak zehaztu hartzaile-mota ezberdinen arabera; azkenik, prestakuntza-egitarauak definitu eta ekintzak nahiz ebaluaketa bideratzeko bestelako baliabideak eta laguntzak zehaztuko dira.

1990eko hamarkadaren hasieran euskararen erabilera sustatzeko emandako lehenengo urratsetatik hona bide luzea egin dute enpresek euskara-planak gauzatzeari begira. Horrela, hitzarmenaren sustatzaileen arabera, garaia iritsi da esparru sozio-ekonomikoan euskararen erabilera sustatzeko egiten ari diren saioak eta plangintzak ebaluatzeko eta antzemateko sistema bateratua eta sistematizatua ezartzeko.

Horrela, enpresetako euskararen erabilera egun erakunde pribatuetan indarrean diren kalitate-parametroen arabera modu sistematizatuan aitortzeko eta ebaluatzeko prozedura finkatu, bultzatu eta garatuko du Hizkuntz Politikarako Sailburuordetzak, eta horretarako, Euskaliten ezagupena eta eskarmentua ezinbestekoa da.

Euskalit 1992. urtean Eusko Jaurlaritzaren bultzadaz sortutako erakundea da, eta bere xedea Euskadiko esparru guztietan kudeaketaren hobekuntza eta berriztapenaren alde egitea da. Kalitatearen kudeaketa-sistemak ezartzen eta hobekuntza bultzatzen Euskalitek erakutsi duen esperientzia bikaina dela eta, Eusko Jaurlaritzako Hizkuntz Politikarako Sailburuordetzak ezinbestekotzat jo du Euskalitekin elkarlanean aritzea enpresetako hizkuntza normalizaziorako prozesuen ebaluazio eskemak zehazteko, hitzarmen honetan xedatzen denari jarraituz.


261 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin