BILBO, 10 (EUROPA PRESS)
Eusko Jaurlaritzako Justizia, Lan eta Gizarte Segurantza Sailak 5,8 milioi euro ezarri ditu aurten guztira, gizarteratze-arloko langileak kontratatzeko eta proiektuak egiteko.
Horrela, 1.288.280 euro gizarteratze-arloko jarduerak diruz laguntzeko ezarri ditu Joseba Azkarragak zuzentzen duen Sailak.
Proiektu horien helburua da baztertuta edo horrela geratzeko arriskuan daudenak euren kabuz bizi daitezen falta diren giza edo gizarte baliabideak jartzea.
Diru-laguntzak, partzuergo, mankomunitate, udal eta irabazteko asmorik gabeko entitateei eman zaizkie, gizarteratze-arloko programen baitako jarduerak egiteko, oinarrizko gizarte-zerbitzuekin lankidetzan, eta gizarteratze-hitzarmenak oinarrizko lanabes bezala baliatuta.
Diru-kopuru hori --1,2 miloi euro-- 71 proiektutan banatu da (iaz baino 15 gehiago). Horien artean nabarmentzen dira, bai kopuruagatik baita eragin sozialagatik ere, Sartu Federazioak, Bilboko Caritas Diocesanak eta Peñascal Fundazioak aurkeztutako proiektuak.
Bestalde, tokiko erakundeek oinarrizko gizarte-zerbitzuak sendotzeko langileak kontratatzea izan dezaten, Justizia, Lan eta Gizarte Segurantza Sailak 4,5 milioi euro zuzendu ditu aurten, eta, horri esker 133 teknikari eta 76 administrari kontratatu dira 80 erakundeetako gizarte-zerbitzuetan.
