Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Euskararen Etxea euskarazko unibertsitate-liburu guztien gordailua izango da


2006-10-11 17:20

Funts honetan 400 lan inguru daude dagoeneko, eta Bizkaiko Foru Aldundiaren eta EIRE elkartearen arteko lankidetzaren emaitza da

BILBO, 11 (EUROPA PRESS)

Bilboko San Inazio auzoan kokatuta dagoen Euskararen Etxea euskarazko unibertsitate funts bibliografiko guztien egoitza izango da hemendik aurrera. Gordailu honetan 1990etik gaur arte argitaratutako arlo honetako euskarazko material guztia bilduko da, unibertsitateko jardun zientifikoa euskaraz egiten laguntzeko helburuarekin.

Funts honetan 400 lan inguru daude dagoeneko, zientziaren arlo guztietakoak: Humanitateak, Gizarte Zientziak, Natur Zientziak, Zientzia Teknikoak eta Osasun Zientziak. Euskarazko Unibertsitate Liburuen Gordailua Bizkaiko Foru Aldundiaren eta EIRE Unibertsitateko Euskal Irakasleen Elkartearen lankidetzaren emaitza da; elkarlan honen ondorioz Euskararen Etxeak aurrerapauso handia eman du euskararen eta ikerketaren zabalkuntza zentro gisa.

Bi erakundeak iaz hasi ziren proiektu honetan lanean, eta azkenean xede zuten funts bibliografikoa sortzea lortu dute: 500etik gora egileren 366 lan, jakintza-arlo guztietakoak: Humanitateak (Artea, Historia, Hizkuntzalaritza); Gizarte Zientziak (Ekonomia, Enpresak, Kazetaritza, Zuzenbidea); Natur Zientziak (Kimika, Matematikak, Fisika, Biologia); Zientzia Teknikoak (Arkitektura, Ingeniaritza, Teknologia); eta Osasun Zientziak (Medikuntza, Mikrobiologia, Anatomia).

Gordailu hau Euskararen Etxean dago jada eta ikasle eta irakasle guztiek zein nahi duten guztiek erabil ditzakete bertako liburuak. Nolanahi ere, kontuan izan behar da ezin daitezkeela atera zentrotik, ez maileguan hartu.

Katalogoa Internet bidez ere aztertu ahal izango da Euskararen Etxearen webgunean (www.euskararenetxea.net/liburutegia). Gainera, esteka bat ezarriko da EIREren webgunean (www.eireka.org) eta Euskararen Etxearen Intranetean ere eskuragarri izango da.

Euskararen Etxean ezarritako gordailu bibliografikoa merkaturatzen diren lan guztiekin eguneratuko da etengabe. Halaber, badago beste funts bat ere, erakusketa ibiltariak egiteko erabiliko dena. Erakusketa hauek Euskal Herriko hainbat hiri, unibertsitate eta campusetan egingo dira, eta funtsaren testu guztiak izango dira ikusgai.

Izan ere, gordailu hau sortzeko proiektuaren ernamuina EIREk joan den urtean Bilbon egin zuen lehen erakusketa izan zen. Ekimen haren ondoren lan asko egin da testuak biltzen, katalogatzen eta digitalizatzen, besteak beste, eta horrela euskarazko unibertsitate liburuen lehen funtsa eratu da, momentuz bakarra ere badena. Orain, ezarritako helburuetako bat beste bilduma bat prestatzea da, Nafarroako Liburutegian gordailatzeko, alegia.

Aipatu bezala, gordailuan 366 titulu daude guztira. Liburuen %75 (274) euskaraz idatziak dira eta %25 (92) itzulpenak, eta guztira, 500 egile baino gehiago daude.

EUSKARAREN ETXEA

Euskararen Etxea Bilboko San Inazio auzoan dago eta euskara ardatz duen gune espezializatua da, Bizkaiko Foru Aldundiaren, Eusko Jaurlaritzaren eta Bilboko Udalaren lankidetzari esker sortua. 2004ko abenduaren 3tik Euskararen Etxeko ateak zabalik daude euskaltzaleentzat, ikerlarientzat eta, oro har, euskararen inguruko gaietan ari diren pertsona guztientzat.

Euskararen Etxeak lau solairu ditu, baina bi gune nagusi bereiz daitezke. Alde batetik, gorengo bi solairuek euskal gaietan lanean diharduten elkarte eta erakundeen lan bateraturako gunea osotzen dute. Hirugarren solairuan Euskal Idazleen Elkartea, Euskara Elkarteen Federazioa (Topagunea), Euskal Pen Kluba (etxera bildu berria) eta Mendebalde Kultura Alkartea daude. Laugarren solairuan Bizkaiko Ikastolen Elkartea dago.

Bestalde, beheko bi solairuetan euskararekin zerikusia duten jardueren berri zabaltzeko eremua eratu da. Lehenengo solairuan Euskararen Interpretazio Zentroa dago. Eremu hau tren geltokien antzera girotuta dago, eta beraren bidez euskarak denboran zehar egin duen bidaia islatu nahi da, hau da, euskararen historia eta bilakaera.

Euskara ezagutarazteaz gain, zentroak bizipen entretenigarria eskaintzen die bisitariei teknologia berriez baliatuta. Turismoa ere kontuan hartu da eta zentroa lau hizkuntzatan bisita daiteke: euskaraz, gaztelaniaz, ingelesez eta frantsesez. Bigarren solairuan euskararen Mediategia dago. Eremu honetan plazaratzen diren euskarazko produktu multimedia guztiak biltzen dira.

2004ko abenduaren 3tik 2006ko abuztuaren 31 arte, Euskararen Etxearen webguneak 50.908 bisita izan ditu, eta Etxera bertaratu diren bisitariak 7.085 izan dira, %44 gizonezkoak eta %56 emakumezkoak, alegia.

Bisitarien %86,5 bizkaitarrak izan dira, %9,2 Euskal Herriko gainerako herrialdeetakoak, %2,8 Estatu espainiarrekoak (batez ere katalanak eta madrildarrak) eta %1,5 atzerrikoak.

Mediategiari dagokionez, hasieran bederatzi kontsultagune (ordenagailuak) ipini ziren, baina gaur egun 16 daude, denetariko beharrizanak direla medio. Ordenagailu hauen bidez zentroak eskaintzen dituen programa eta material guztiak erabil eta azter daitezke.

Euskararen Etxea aplikazio eta lan-tresna berriez hornitu da, informazio eta komunikazioaren teknologia berrien (IKTB) bidez euskararen garapena eta zabalkuntza bultzatzeko xedearekin.

Ildo honetan, Euskararen Etxeak teknologia berri hauek eskuragarri jarri nahi dizkie euskal gaietan lanean diharduten elkarte eta erakundeei eta zentroa bisitatzen duten guztiei. Halaber, teknologia berri hauek kanpo proiekzioa ere ahalbidetzen dutenez, euskal diasporarekiko loturak estutu ahal izango dira.


262 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin