Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Euskaltzaindiak eta Nafarroako Unibertsitate Publikoak bost urteko iraupena duen hitzarmena sinatu dute


2009-01-21 16:22

IRUÑEA, 21 (EUROPA PRESS)

Nafarroako Unibertsitate Publikoak eta Euskaltzaindiak esparru hitzarmena sinatu dute gaur Arrosadiako campusean, Iruñean, bi erakundeen arteko lankidetza areagotzeko xedez. Hitzarmena Julio Lafuente errektoreak eta Andres Urrutia euskaltzainburuak sinatu dute eta ondoren bi erakundeetako ordezkariek lan bilera egin dute. Hitzarmenak bost urteko iraupena izango du.

Euskaltzaindiaren izenean ondoko ordezkari hauek parte hartu dute aipatu bileran: Andres Urrutia euskaltzainburuak, Xabier Kintana idazkariak, Jose Luis Lizundia diruzainak eta Andres Iñigo Nafarroako ordezkariak. Unibertsitatearen izenean, berriz, honako hauek izan dira: Jesus Maria Pintor Irakaskuntzako errektoreordea, Pablo Sotes Hizkuntza Plangintzako Saileko zuzendaria, Patxi Salaberri Filologia eta Hizkuntzaren Didaktikaren Departamentuko zuzendaria, eta Koldo Asiron Hizkuntza Plangintzarako Zerbitzuko zuzendaria.

Gaur sinatutako hitzarmenak dioenez, Nafarroako Unibertsitate Publikoak, euskarari dagokionez, erakunde aholku-emaile ofizialtzat hartzen du Euskaltzaindia eta, era berean, bi erakundeek ikerketarako goi mailako zentrotzat hartzen dute elkar. Zentzu horretan, bi aldeek lankidetza aktiboa adostu dute, hainbat arlotan islatuko dena.

Esaterako, bi erakundeok lankidetza-proiektu zehatzak bideratu eta garatuko dituzte, euskararen eta euskal kulturaren inguruko ikerketa eremuan. Horrela, bioi dagozkien lerro bereziak sustatuko dituzte, eta elkarri informazioa emango diote, ikerketa programazio orokorretan zehaztutako lehentasunei buruz. Halaber, curriculumerako eta merezimendu gisa, bi aldeek balioespen formulak aztertuko dituzte irakasleek Euskaltzaindiaren barruan egindako lana neurtzeko (batzordeak, biltzarrak, jardunaldi zientifikoak, proiektuak).

BESTE ZENBAIT ARLO

Bestalde, Nafarroako Unibertsitate Publikoko ikasleek Euskaltzaindian praktikak egiteko aukera izango dute, beti ere, Hitzarmenaren Jarraipen Batzordearen ustez egoki diren arloetan. Materialaren trukaketa arloan, bi aldeek konpromisoa adierazten dute beren ikerketa ondareak eta bereziki beren liburutegiak erabiltzea ahalbidetuko duten formulak abiaratzeko.

Argitalpenei dagokienez, elkarlana bultzatuko da, eta baterako argitalpenak sustatuko dira, euskal idazle klasikoen nahiz egungo euskal idazleen testuak direnean, bai eta euskal filologia edo literaturaren eremuko ikerketa nahiz hedapen-lanak direnean ere, bi erakundeok euskararen inguruan sortutako testugintza zientifikoa zabaltzeko.

Bi aldeek beren tesiak edo lanak bata bestearen eskura jartzeko konpromisoa ere adierazi dute, jabetza intelektuala errespetatuko delako bermearekin, eta bi erakundeek beharrezkotzat jotzen dituzten egileen baimenak izanik. Modu berean, bi erakunde zientifiko horiek elkarlanean arituko dira, euren liburutegietako euskal funtsak sendotzeko; horretarako, euron argitalpen funtsetatik, zenbait lan ekarriko dituzte.

Azkenik, Unibertsitateak eta Euskaltzaindiak lankidetza-politika bultzatuko dute, masterrak eta graduondoko programak sortu eta egin daitezen, euskarari eta euskal kulturari dagozkien eremuetan.

Arestian aipatutako helburuak betetzeko, Nafarroako Unibertsitate Publikoak eta Euskaltzaindiak Jarraipen Batzordea sortuko dute; batzorde horrek sei kide izango ditu, eta erakunde bakoitzak horietatik hiru hautatuko ditu.


308 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin