Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Euskal Idazleen Elkarteak euskal literaturaren irakurketak egin ditu berriki Esloveniako Vilenicako Literatur Jaialdian


2006-09-15 12:28

BILBO, 15 (EUROPA PRESS)

Euskal literaturaren oihartzuna izan da berriki Ekialdeko Europan, Esloveniako Vilenicako Literatur Jaialdian hain zuzen ere Euskal Idazleen Elkartearen eskutik, EuskalKultura.com webgunearen arabera.

Ekialdeko Europan tradizio handia duen ekitaldi honek 21. edizioa izan du aurtengoa eta Europako eremu urriko literaturei eskainitako tartea jarri dute abian bertan, euskal letrak protagonista bihurtuz. Idazle talde zabala joan da Euskal Herritik: Bernardo Atxaga, Harkaitz Cano, Marijo Olaziregi, Miren Agur Meabe, Ricardo Arregi, Juan Ramon Makuso eta Kirmen Uribe.

Euskal idazleen ordezkaritza zabala izan da bertan, hilaren 7tik 10era egin diren hainbat ekitaldietan parte hartuz. Bernardo Atxaga idazleak Soinujolearen Semea bere azken lanaren eslovenierazko edizioa aurkeztu zuen irailaren 6an antolatutako ekitaldi berezian, berez jaialdiaren egitarautik kanpo.

Irailaren 8an Euskaraz egile izatea, gaur eta bihar izenburupean mahai ingurua izan zen entzungai Ljubljana hirian, Marijo Olaziregi, Rikardo Arregi, Juan Ramon Makuso, Alexandra Büchler eta Franco Juri idazleek parte hartu zutelarik. Ondotik Harkaitz Cano, Miren Agur Meabe, Ricardo Arregi eta Kirmen Uribek errezitaldiak eskaini zituzten.

Jaialdian gainera, lehenengo aldiz, eslovenieraz idatzitako euskal literaturaren antologia bat aurkeztu zuen bertako Idazleen Elkarteak, Vilenicako Antologiak bildumari hasiera emanez. Antologiaren izenburua Etzikoak da, eta bertan Jon Mirande, Gabriel Aresti, Ramon Saizarbitoria, Anjel Lertxundi, Bernardo Atxaga, Miren Lourdes Oñederra, Rikardo Arregi, Miren Agur Meabe, Kirmen Uribe, Unai Elorriaga, Harkaitz Cano eta Igor Estankonaren testuak bildu dituzte, Marjeta Dbronic eta Marjeta Prelesnik Drozg-ek itzulita, Mari Jose Olaziregiren atarikoarekin.

Informazio gehiago Euskal Idazleen Elkartearen Interneteko www.idazleak.org helbidean edota Vilenicako 21. Nazioarteko Literatur Jaialdiaren wegunea www.vilenica.si helbidean aurki daiteke.


187 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin