Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Euskal Autonomia Erkidegoko internet erabiltzaileak 929.300 izan ziren iazko azken hiruhilekoan, biztanle osoen %50,5


2009-02-13 11:13

Interneten euskaraz nabigatu zutenen portzentajea %21,8 hazi zen

BILBO, 13 (EUROPA PRESS)

Euskal Autonomia Erkidegoko (EAE) 15 urte edo gehiagoko interneten erabiltzaileak 929.300 izan ziren 2008. urteko laugarren hiruhilekoan, hau da, adin horretako EAE osoko biztanleen %50,5. Horrela, 2007ko laugarren hiruhilekoaren aldean %6,4ko hazkundea da, Eustaten datuen arabera.

Lurralde historikoen arabera, Araban igo zen gehien erabiltzaileen kopurua, %3,8 hain zuzen ere, 2008ko bigarren hiruhilekoaren aldean; interneten erabiltzaileen portzentajeari dagokionez, lehenengo tokian jarri da, %51,5ekin. Bizkaian %3,6 izan zen hazkundea eta azken hiru hileetan %50,4 izan zen erabiltzaileen kopurua. Gipuzkoan %0,6ko jaitsiera izan zen, eta 15 urte eta gehiagoko biztanleriaren %50ek erabiltzen zuen internet.

Adina kontuan hartuta, 55-64 urte bitarteko erabiltzaileak nabarmendu ziren, %11,2ko hazkundea izan baitzen 2008ko bigarren hiruhilekoaren aldean. 65 urtetik gorakoen hazkundea ere nabarmendu zen, urteko bigarren hiruhilekoaren aldean %18,8ko hazi baitzen eta %64,1 2007ko laugarrenaren aldean. Interneten erabilera %3,6 hazi zen 25-34 urtekoen artean. Azken hiru hiletan 15-24 urtekoen arteko %88,2k erabili zuen Internet, urte bereko bigarren hiruhilekoan baino %4,5 gutxiago.

Generoen arteko aldea ehuneko 7,1 puntuan zen 2008ko bigarren hiruhilekoan, eta laugarrenean 8,8 puntura handitu zen. 15 urte eta gehiagoko biztanleei dagokienez, interneteko erabiltzaileak gizonezkoen %55 izan ziren eta emakumezkoen %46,2. 2008ko laugarren hiruhilekoan, interneteko erabiltzaile guztien artean, %52,9 gizonak izan ziren eta %47,1 emakumeak.

Jardueraren arabera, ikasleen arteko %95,4k erabiltzen zuen internet; pertsona okupatuen artean, %68,7k erabiltzen zuen, eta ez-aktiboen eta langabetuen artean, %17,7k. 2008ko bigarren hiruhilekoaren aldean hazkunderik handiena (%7,4) ez-aktiboen eta langabetuen artean izan zen; ikasleen artean %2,1 hazi zen, eta pertsona okupatuen artean %1,3.

Bestalde, etxetik bertatik egindako konexioak %5,1 hazi ziren; erabiltzaileen %84,7k etxetik egin zuen konexioa. Hazi egin ziren, baita ere, lantokitik (%0,9) eta ikastetxetik (%8,7) eginiko sarbideak. Beste lekuetatik egindako sarbideak -ziberkafeak, hotelak, aisialdiko lekuak- nabarmen jaitsi ziren (%-52) 2007ko laugarren hiruhilekoaren aldean.

HIZKUNTZAK ETA IRAUPENA

Bestalde, euskaraz nabigatu zuten erabiltzaileen portzentajea %21,8 hazi zen. Ingelesez nabigatu zutenen portzentajeak %18,1eko gorakada izan zuen eta gaztelaniaz egin zutenenak %2,5ekoa.

Halaber, interneteko konexioen batez besteko iraupena 44 minutukoa izan zen 2008ko laugarren hiruhilekoan, hau da, urteko bigarren hiruhilekoaren aldean minutu eta erdi laburragoa.

Gainera, internet bidez erosi zuten pertsonen kopuruak goranzko joera apala izan zuen. 2008ko laugarren hiruhilekoan 15.000 pertsona gehiagok erabili zuten internet zenbait erosteko. Guztira, 230.400 izan ziren sarearen bidez erosketaren bat egin zutenak.

Bestalde, informazioaren eta komunikazioaren teknologien ekipamenduek hedatzen jarraitu zuten EAEko familia-etxeetan. Horrela, 2008ko laugarren hiruhilekoan, EAEko familia-etxeen %58,7k ordenagailua zuten, 2008ko bigarrenean baino %3,1 gehiago eta aurreko urteko hiruhileko berean baino %6,8 gehiago.

Interneterako sarbideari dagokionez, 415.000 familia pasatxo ziren (%50,1) etxean zerbitzu hori zutenak; beraz, 2008ko laugarren hiruhilekoan interneteko konexioa zutenak 22.700 familia gehiago (%5,8) ziren. Internet zuten familiak aurreko urteko hiruhileko berean baino %13,9 gehiago izan ziren. Era berean, sarera sarbidea zuten 14 urte baino gehiagoko biztanleen kopuruak gora egin zuen 75.900 pertsonarekin 2007ko laugarren hiruhilekotik.

Bestalde, familia-etxeetako %88,7an sakeleko telefonoren bat zegoen. 14 urte baino gehiagoko biztanleak kontuan hartuta, sakeleko telefonoa duten pertsonen portzentajea %93raino igo zen.

Azkenik, Lurreko Telebista Digitala (LTD) zutenen portzentajea %184 hazi zen, 2008ko bigarren hiruhilekoko 430.400etik 2008ko laugarreneko 1.222.000ra, beti ere 15 urte eta gehiagoko pertsonen artean.


1012 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin