Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Euskal Autonomia Erkidegoko esportazioak %16,7 igo ziren 2006ko hirugarren hiruhilekoan


2006-12-20 13:16

Inportazioek %17,6ko hazkunde nominala izan zuten urte arteko aldi berean

BILBO, 20 (EUROPA PRESS)

Euskal Autonomia Erkidegoko (EAE) esportazioak %16,7 hazi ziren 2006ko hirugarren hiruhilekoan, Eustatek landutako datuen arabera. Iazko hirugarren hiruhilekoan 3.321,4 milioi euro lortu ziren, eta aurtengoan, aldiz, 3.876,9 milioi euro. 2006ko lehenengo bederatzi hilabeteetako esportazioekin 12.140,2 milioi euro lortu dira, eta %16,8ko urte arteko hazkunde-tasa egon da aurreko urteko aldi beraren aldean. Urteko hiruhileko honetan, bere horretan mantendu da lehen seihilekoan lortutako bilakaera tasa (%16,9).

Hirugarren hiruhilekoko guztizko inportazioetan, %17,6ko urte arteko hazkundea egon da, eta zenbatekoa 4.213,9 milioi eurora iritsi da. Aurreko urtean, aldiz, zenbateko hori 3.584,4 milioi eurokoa izan zen. Urteko lehen hiru hiruhilekoetako guztizko inportazioak 12.627,4 milioi eurora iritsi dira, eta %18ko urte arteko hazkundea egon da, aurtengo lehen seihilekoko bilakaera tasarekin (%18,2) bat etorriz.

Esportazioen eta inportazioen bilakaeraren emaitza gisa, hirugarren hiruhilekoko merkataritza-defizita 337 milioikoa izan da. Beraz, 2005eko hirugarren hiruhilekoko defizita 74 milioitan areagotu da. Horren ondorioz, esportazioek inportazioen gainean duten estaldura-tasa jaitsi egin da eta iazko %92,7tik aurtengo %92ra pasa da. Urteko lehen bederatzi hilabeteetako merkataritza-defizita 487,2 milioi eurokoa da.

Hala ere, 2006ko hirugarren hiruhilekoan, esportazio ez-energetikoak inportazio ez-energetikoen gainetik egon dira 848 milioitan. Estaldura-tasa %132 izan da eta produktu ez-energetikoen merkataritza-superabita 3.023,9 milioitara iritsi da, 2006ko lehen hiru hiruhilekoetan.

HELBURUAK

2006ko hirugarren hiruhileko honetan, Europar Batasuna helburu duten esportazioak %15,3 hazi dira, 2005eko hirugarren hiruhilekoaren aldean. Urte arteko hazkundeagatik eta bolumenagatik, Alemaniara (%24,9), Italiara (%24,6) eta Belgikara (%39,2) egindako esportazioak nabarmendu dira. Bolumenagatik lehen bezeroa den Frantziara bideratutako esportazioak, %5,8 hazi dira hirugarren hiruhilekoan.

Europar Batasunetik EAEra datozen inportazioak, aldiz, %14,5 hazi dira. Produktu energetikoen hornitzaile diren herrialdeetatik datozenak, berriz, %25,8 igo dira.

Esportazioetan balio handiena duen muga-zergetako taldea ekipo-ondasunak dira (hiruhileko honetan %13,1eko igoera izan du), eta horren atzetik metalak eta manufakturak taldea dago, %15,2ko hazkunde-tasarekin.

Aitzitik, inportazio ez-energetikoen artean, muga-zergetako talderik garrantzitsuena da metalak eta manufakturak. Izan ere, hirugarren hiruhilekoan %45,8ko urte arteko hazkundea izan du. Muga-zergetako bigarren taldea, bolumenari dagokionez, ekipo-ondasunak da (%3,7ko atzerakada izan du). Nolanahi ere, produktu mineralak eta energetikoak hiruhilekoko inportazio guztien %37,2 dira eta %25,8ko urte arteko hazkundea dute.

LURRALDEAK

Esportazio-hazkunde handiena Bizkaian gertatu da. Hirugarren hiruhilekoan %26,2 hazi da eta aurtengo orain arteko bederatzi hilabeteetan %29,3. Bizkaiko inportazioak %22,3 hazi dira hirugarren hiruhilekoan, bai produktu energetikoak taldearen hazkundeagatik (%26,2), bai eta metalak eta manufakturak taldearen igoeragatik ere (%47,8).

Gipuzkoan zenbatutako esportazioen balioa %8,9 igo da uztaila eta iraila bitarte. Horretarako, lagungarriak izan dira ekipo-ondasunak eta metalak eta manufakturak taldeen bilakaera ona, %8,5ekoa eta %11,6koa hurrenez hurren. Gipuzkoa helburu duten inportazioak %16,4 hazi dira, ia esportazioen bikoitza. Inportazio horiek batez ere metalak eta manufakturak (%42,5) eta ekipo-ondasunak (%8,7) taldeetan oinarritzen dira.

Arabako esportazioei dagokienez, hirugarren hiruhilekoan %13,8 hazi dira, ekipo-ondasunak multzoaren urte arteko igoeraren eraginez (%20,3), eta, zehatzago, garraio-materiala multzoaren jokabide onaren eraginez (%32,4). Inportazioak pixka bat hazi dira, %1,6 hain zuzen ere, garraio-materialaren (%-28,8) jaitsiera handiaren eraginez, nahiz eta beste inportazio batzuk igo egin diren, hala nola metalak eta manufakturak (%45,9) eta plastikoak eta kautxua (%25,5).


100 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin