Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Euskal Autonomia Erkidegoan 1.090 milioi euro inbertitu ziren I+Gn 2007. urtean, aurrekoan baino %20 gehiago


2009-01-30 12:59

BILBO, 30 (EUROPA PRESS)

Euskal Autonomia Erkidegoan (EAE) 1.090 milioi euro inbertitu ziren 2007. urtean Ikerketa Zientifikoen eta Garapen Teknologikoaren jardueretan (I+G), hau da, Barne Produktu Gordinaren (BPG) %1,65. Gastu horretatik, Bizkaiak 503 milioi euro inbertitu zituen (%46), Gipuzkoak 447 (%41) eta Arabak 140 (%13), Eustat Estatistikaren Euskal Erakundearen datuen arabera.

I+Gko barne-gastua %20 gehitu zen aurreko urtearen aldean, bai Euskal Autonomia Erkidego osoan bai eta Bizkaian ere. Gipuzkoak batez besteko hori gainditu zuen, %23arekin; Arabako gastua, aldiz, %12 gehitu zen.

Gipuzkoak 2007an egindako ahalegina I+Gko barne-gastuaren alderaketan islatzen da, BPGaren ehuneko moduan; lurralde horrek %2,05eko gastua izan zuen, hau da, lehen aldiz gainditu zuen EB-27ko Europako batez bestekoa (%1,83). Adierazle hori %1,52koa izan zen Bizkaian eta %1,28koa Araban. Nolanahi ere, hiru lurraldeek gainditu zuten Espainiako batez bestekoa (%1,27).

Kapital-gastua bakarrik kontuan hartuta (lur, eraikin, ekipo eta tresnetan egindako inbertsioak) guztira 98 milioi euro inbertitu ziren, hots, aurreko urtean baino %57 gehiago, batez beste. Dena den, lurralde historikoen artean banaketa ezberdina eman zen: Gipuzkoan %78 gehitu zen, Bizkaian %46 eta Araban %28.

EGIKARITZE SEKTOREA

Egikaritze sektoreari dagokionez, lurralde historiko bakoitzak berezitasun ezberdinak izan zituen. Araban herri administrazioaren sektorean egindako gastua nabarmendu behar da berriz, Arabako gastu osoaren %7,2 izan baitzen; gastu hori administrazioaren menpeko erakunde batzuen ondorioz eman zen eta 2006. urtearen aldean %40 gehitu zen. Enpresen sektoreak %79,1eko gastua izan zuen eta unibertsitatearen sektoreak, aldiz, %13,7koa.

Bizkaian, 2007. urtean, administrazioaren eta enpresen sektorearen gastuak %22 gehitu ziren (2006. urtearekin alderatuta). Unibertsitate sektoreari dagokionez pisu gehien izan zuen lurralde historikoa zen oraindik (Bizkaiko guztirakoaren %18,8), batez ere Euskal Herriko Unibertsitateko Zientzia Fakultateak Leioako campusean daudelako.

Gipuzkoan, gastu erlatibo txikiena izan zuen sektorea administrazioarena izan zen (Gipuzkoako gastu osoaren %0,9); baina enpresen sektorea nabarmentzen da, enpresen egitura zehatza delako, zentro teknologiko gehiago dagoelako eta gastua %26an gehitu duelako. Unibertsitatearen sektoreak fakultate tekniko ugari ditu, eta guztira I+Grako baliabideen %11,7 erabili du.

EAEko hiru lurralde historikoetan, ingeniaritza eta teknologia sektorearen diziplina zientifikoan eman ziren berriz gastu handiena eta langile kopuru handiena. Dena den, lurralde bakoitzak gastu horretarako gordetzen zuen ehunekoa ezberdina izan zen: gasturik handiena Gipuzkoak egin zuen (%79), gero Arabak (%74) eta azkenik gastu txikiena Bizkaiak egin zuen (%66).

Bestalde, emakumeek I+Gn izan zuten partaidetzari dagokionez, Gipuzkoako emakume guztien %30ak, Arabako %33ak eta Bizkaiko %36ak parte hartu zuen 2007. urtean.

Enpresen finantzaketa (%59), ikerketarako baliabide pribatuei dagokienez, garrantzitsua izan zen hiru lurralde historikoetan eta, ondorioz, hauek Estatuko (%45,5) eta Europako (%54,5) batez bestekoa gainditu zuten.

Enpresen sektoreko I+G gastuaren %32, guztira 50 langile baino gutxiagoko enpresek egin zuten. Araban %40koa izan zen gastu hori eta Bizkaian soilik %30ekoa; Gipuzkoak (%32) Euskal Autonomia Erkidegoko batez bestekoa izan zuen.

Jarduera nagusitzat I+Gko zerbitzuak dituzten enpresek 367 milioi eurotik gorako I+Gko barne-gastua egin zuten (enpresen I+Gko gastuaren %41). Gastua honela banatu zen lurraldeen artean: Gipuzkoan gastuaren %52, Bizkaian %37 eta Araban %11.


233 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin