Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Etxepare Euskal Institutua asteazken honetan hasiko da jardunean euskara eta euskal kultura munduratzeko tresna gisa


2009-01-05 11:39

Langile egitura osatu bitartean Eusko Jaurlaritzako Kultura Sailetik beteko dira funtzioak

BILBO, 5 (EUROPA PRESS)

Etxepare Euskal Institutuak asteazkenean hasiko du bere jarduna bere jardueren hasierarako Dekretuak aurreikusten duen moduan. Hasieran, eta euskara eta euskal kulturaren kanpo zabalpena xede duen institutuak bere langile egitura osatu eta hau lanean jarri bitartean, Eusko Jaurlaritzako Kultura Sailetik beteko dira Etxepare Euskal Institutuaren funtzioak.

Eusko Legebiltzarrak 2007ko apirilaren 20an onartu zuen 3/2007 Etxepare Euskal Institutua sortzeko eta arautzeko Legea. Zentroa Kultura Sailari atxikitako berezko gaitasuna eta izaera juridikoa duen zuzenbide pribatuko herri erakundea da, eta euskara eta euskal kulturaren kanpo zabalpena du xede. Alde horretatik, bere gain hartuko ditu lehenagotik Jaurlaritzak zuzenean lantzen zituen hizkuntzaren eta kulturaren alorreko zabalpenerako lanak.

Eusko Jaurlaritzako Kultura Sailetik azaldu dutenez, institutuak bi arlotan antolatuko du bere burua: euskal kulturaren sustapena eta zabalpena; euskararen sustapena eta zabalpena. Euskal kulturaren sustapen eta zabalpen arloaren baitan uztartzen dira musika, arte eszenikoak, ikus-arteak, zinema, arkitektura eta diseinua.

Horrela, euskal sorkuntza artistikoa eta artistak eta hauen lanak munduan zehar zabalduko ditu; nazioartean kultur erakustaldiak antolatuko ditu; arteen zabalpenerako ekintzabide estrategikoak bultzatuko ditu; euskal sorkuntza kanpoan ezagutzera emateko kultur eragileen sustapena burutuko du; euskal literatura, jakintza eta ikerketa kanpoan ezagutzera emango du horien zabalpena sustatuz; euskal kulturaren eta bereziki euskarazko eskaintzaren kanpo zabalpena bultzatuko du; pentsalari eta ikertzaileen arteko hartu emanak sustatuko ditu; hizkuntz eta kultur aniztasunari buruzko euskal egileen nazioarteko ezagutza bultzatuko du eta euskal kulturaren kanpo zabalpenaren alorrean lanean diren eragileei laguntza eskainiko die.

Bestalde, euskararen sustapen eta zabalpenaren arloaren baitan Etxepare Euskal Institutuak euskararen irakaskuntza, ikerketa eta ezagutza bultzatuko du, eta bere funtzioen artean izango dira Euskal Herritik kanpoko unibertsitateetan euskararen ikerketa eta ikasketak bultzattzea, lektoradoak eragitea eta euskararen ikertzaile eta euskal ikaskuntzen erakundeei laguntza eta babesa ematea, edota euskararen ezagutza eta erabilera bultzatzea munduan zehar diren euskal giza-taldeetan, euskal etxeen laguntzarekin eta hauen bitartez.

Halaber, beste erakundeekin elkarlanean, Euskal Herritik kanpo euskara ikasi ahal izateko beharrezkoak diren giza, hizkuntza eta didaktika beharrak eta tokian tokiko euskarazko irakasleen prestakuntza bideratuko ditu. Gainera, euskara ezagutza-egiaztagirien azterketak antolatuko ditu Euskal Herritik kanpo eta euskararen presentzia ahalbideratzeko hizkuntza eta kultura erakustazoka nagusienetan parte hartuko du.

Horrez gain, euskararen kanpo zabalpena xede izanda, sustapen ekintzak koordinatuko ditu gaztelania, katalana eta galiziera zabaltzea xede duten Etxepare Institutuaren gisa bereko erakundeekin, eta euskararen kanpo sustapenerako ekintzak euskararen lurraldeko beste erakunde publikoekin koordinatuko ditu.

Etxepare Euskal Institutuak elkarlana sustatuko du euskararen normalkuntza xede duten erakundeekin, eta, euskararen eta euskarazko sorkuntzaren zabalpena xede izanda, unibertsitate edota bestelako erakunde publiko eta pribatuekin ere elkarlana bultzatuko du. Azkenik, euskararen kanpo zabalpena egiten duten erakunde publiko eta pribatuei laguntza emango die eta teknologietan oinarritutako euskararen kanpo zabalpena bultzatuko du.

HURRENGO PAUSOAK

Izaera juridiko aldetik bere lanak hasi ondoren asteazken honetatik aurrera, Jaurlaritzak onartuko du Etxepare Euskal Institutuaren langile egitura eta ondoren Institutuaren Zuzendaritza Batzordeak bertako lanpostu-zerrenda onartuko du eta lanpostu-zerrenda Euskal Herriko Agintaritzaren Aldizkarian argitaratuz indarrean jartzen denean, plaza horiek betetzeari ekingo zaio, administrazio publikorako aplikagarriak diren prozedurak erabiliz.

Lanpostu zerrenda horretan sartzen dira Etxepare Euskal Institutuaren lanpostu guztiak, zuzendari nagusia salbu, hau izendapeneko kargua baita. Horrela, bitartean, Kultura sailburuak hartuko ditu bere gain zuzendari nagusiaren egin beharrak.

Etxepare Euskal Institutuaren eginbeharretarako beharrezkoak diren diru-kopuruak eta bere zereginetarako ezinbestekoak dituen ondare higiezinak transferituko ditu Eusko Jaurlaritzako Ogasun eta Herri Administrazio Sailak. Bere egoitza nagusia Donostian izango du, Tabakalera eraikinean, eta tabako-fabrika izandakoaren birmoldaketa gauzatzen den bitartean berariazko egoitza du Prim kalean.

Institutuaren lanerako teknologi berriek giltzarri izango dira, eta munduan zehar ordezkaritzak eta menpeko zentroak eduki ahal izango ditu bere helburuak betetzeko. Horretarako, merkataritza-sozietateetan, fundazioetan edo irabazi asmorik gabeko erakundeetan parte hartu ahal izango du beharrezkoa denean, Eusko Jaurlaritzaren aldez aurreko baimenarekin.

EZ DA HUTSETIK HASIKO

Etxepare Euskal Institutuak ez du bere lana hutsetik hasiko. Institutuak bere gain hartuko eta garatuko ditu lehenagotik Jaurlaritzak lantzen zituen hizkuntz eta kultur alorreko zabalpenerako lanak, eta hor txertatuko dira azken urteetan garatu diren euskara munduan erakusteko egitasmoak eta euskal kulturaren alor desberdinetan Kultura Sailaren bitartez eta alorrean alorreko sektoreen laguntzarekin egiten diren hainbat ekimen.

Kulturaren alorretan, institutua arian-arian lankide izango da edota bere gain hartuko ditu literatura eta liburugintza alorrean kanpo zabalpenari begira hainbat azoketan egiten diren parte hartzeak, bai eta ikus-entzunezko alorrean Kultura Sailak zuzenean eta beste batzuekin elkarlanean gauzatzen zituen euskal ikus-entzunezkoen kanpo zabalpenerako ekintzak ere.

Musikan, Kultura Saila eta alorraren arteko Euskadiko Soinuak egitasmoaren bultzatzaile izango da, eta arte plastikoen alorrean Etxepare Euskal Institutuak Gure Artea sarien kanpo zabalpena bultzatuko du.

Euskara eta euskal kulturaren kanpo zabalpenean, egun Amerika eta Europako 25 unibertsitatetan indarrean diren euskara eta euskal kulturaren irakaskuntzak eta Europa, Amerika eta Australian araututako euskara eskoletan lankide izango ditu HABE eta kulturaren kanpo zabalpenaren alorrean lanean diren beste erakunde eta egitasmo.

Kultura Sailak bultzaturik, euskara eta euskal kulturaren lektoradoak sortu dira Europa eta Amerikako hainbat unibertsitateetan, Etxepare Euskal Institutuaren garapenaren bidean. Egun, Amerika eta Europako 13 herrialdetako 25 unibertsitatetan ematen dituzte euskara eta euskal kulturaren irakaskuntzak, eta beste 30 unibertsitateren eskaerak aztertzen ari dira. Aurtengo ikasturtean 700 ikasle daude matrikulatuta euskara eta euskal kulturaren ikastaro hauetan.

Ildo berean, Kultura Sailak -HABEren bitartez- abian du Euskal Herritik kanpo helduentzako ematen diren euskara eskolen garapenerako egitasmoa, eta Estatuko hainbat hiriburutan (Madril, Bartzelona, Valentzia, Valladolid) eta Europa eta Ameriketako hiri eta herri desberdinetan helduentzako ematen diren euskara eskolak arautu eta garatu dira. Horrela, 2008-2009 ikasturtean 2.000 lagun baino gehiago ariko dira euskara ikasten eskola hauetan.

Halaber, Etxepare Euskal Institutuak bere gain hartuko du euskara eta euskal kulturaren ordezkaritza nazioartean antolatzen diren hizkuntza, hezkuntza eta kultura dibulgatzeko azoka eta erakusketetan parte hartzea. Hauen artean aipatzekoak dira hizkuntzaren irakaskuntzarekin lotutako Expolangues eta antzekoak.


480 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin