Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Erabilera planak herri-administrazioetan jardunaldiek 230 euskara teknikari bilduko dituzte gaur eta bihar Bilbon


2009-01-27 12:30

BILBO, 27 (EUROPA PRESS)

Herri-administrazioetako euskara teknikarientzako lan jardunaldiak antolatu ditu Eusko Jaurlaritzako Hizkuntza Politikarako Sailburuordetzak Erabilera planak herri-administrazioetan goiburupean, eta Bilboko Euskalduna Jauregian egingo dira gaur eta bihar.

Jardunaldiek bi helburu dituzte: batetik, zenbait erakunderen planen berri zabaltzea, eta bestetik, erabilera planak diseinatzerakoan zein ekintzak gauzatzerakoan gerta daitezkeen ustekabe eta arazoei irtenbideak ematea. Guztira, 14 hizlarik hartuko dute parte, eta 230 euskara teknikari inguru bertaratuko dira.

Patxi Baztarrika Eusko Jaurlaritzako Hizkuntza Politikarako sailburuordeak jardunaldien aurkezpenean adierazi duenez, euskararen erabilerak aurrera egin dezan oso da garrantzitsua berak zuzentzen duen Sailburuordetzarentzat herri-administrazio guztietan erabilera planak abian jartzea.

Hain zuzen ere, Hizkuntza politika aurrera begira (2005-2009) egitasmoaren jardunbide nagusien artean dago Administrazioko euskararen erabilera normalizatzeko planak indartzearena, euskara zerbitzu-hizkuntza ez ezik gero eta administrazio-atal gehiagotan ohiko lan-hizkuntza ere izan dadin neurriak hartuz.

Baztarrikaren esanetan, azken urteetan, Euskal Autonomia Erkidegoko herri-administrazioek ahalegin handia egin dute, euskararen erabilera planak diseinatu eta martxan jartzeko. Horrela bada, dagoeneko Eusko Jaurlaritzako sail eta erakunde autonomo ia gehienek, hiru diputazio eta hiru hiriburuek, beste zenbait erakundek (Legebiltzarra, EHU) eta ehun toki-entitatek baino gehiagok 86/1997 Dekretua bete eta diseinatu eta onartu egin dituzte beraien erabilera planak. Ahalegin horren ondorioz, gaur egun, EAEko biztanleriaren %90 erabilera plana egiteko ardura hartu duen udalerri batean bizi da.

Hala eta guztiz ere, oraindik orain, badago zeregin franko herri txiki guztietara hedatuko badira planak, batez ere, euskara, soziolinguistikoki, gutxien erabiltzen den horietara hedatuko badira. Hizkuntza Politikarako Sailburuordetza horretan ari da, eta lanean jarraituko du datozen hilabeteetan, ahalik eta eperik laburrenean, herri-administrazio orok bere erabilera plana onartu dezan eta, era horretara, euskararen erabilerak gora egin dezan Administrazioan, azaldu du.

METODOLOGIA BERRIA

Bide hori erraztu nahian metodologia berria eskaintzen die Hizkuntza Politikarako Sailburuordetzak herri-administrazio guztiei, metodologia sinplea eta malgua alegia. Metodologia hori IRATI aplikazio informatikoan islatu da. Aplikazio honen bidez erakundeak bi plan diseinatu, kudeatu eta jarraitu ahal izango ditu: Euskara Biziberritzeko Plan Nagusia (EBPN) eta erakundearen erabilera plana.

Euskara Biziberritzeko Plan Nagusiak euskararen normalizazioa sustatzen du bizitzako esparru guztietan: familia-transmisioa, lan-mundua, aisia, kirola, kulturgintza eta abar. Erakunde barruko erabilera planari dagokionez, metodologia hau erabilita, garatu nahi diren administrazioko esparruak aukeratu eta horiek lortzeko ekintzak jarri ahal izango dira martxan, euskararen erabilera honelako eremuetan bultzatzeko: ahozko eta idatzizko erabilera, itzulpenak, dokumentazioa, terminologia, langileen prestakuntza orokorra, hizkuntza-paisaia edo kontratazio administratiboak.

Datozen egunetan IRATI martxan eta eskura izango dute hala eskatu duten erakundeek. Teknikari eta profesional asko egon da tresna berriaren zain, eta horren erakusgarri da dagoeneko 70 erakunde eta 130 teknikari inguruk eman dutela izena IRATI erabili ahal izateko.

IRATI metodologia berriaren erabilpena errazteko, Jaurlaritzako Hizkuntza Politikarako Sailburuordetzak hamar prestakuntza saio antolatu ditu; saio horiek otsailean zehar egingo dira EAEko hiru hiriburuetan.


232 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin