Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Emakumeek bakegintza prozesuetan dsuten zeregina aztertuko dute nazioarteko adituek Donostian, urriaren 23an eta 24an


2006-10-04 12:08

DONOSTIA, 4 (EUROPA PRESS)

Emakundek Nazioarteko Sare 2006 Kongresua antolatu du Donostiako Kursaal Jauregian, urriaren 23 eta 24rako, Emakumeak bakeak eraikitzen goiburuarekin. Bertan, Israel, Palestina, Kolonbia, Ipar Irlanda, Liberia, Argentina, Serbia eta Kosovoko adituak elkartuko dira euren herrialdeetako esperientziei buruz hitz egiteko. Bertan izango dira baita euskal ordezkariak Euskal Herriko bake prozesuaren gakoetaz aritzeko.

Sare topaketak urtero antolatzen dira gizon eta emakumeen berdintasunaren inguruko hausnarketa eta iritzi trukaketa egiteko helburuarekin. Topaketa hauen bidez Emakundek omenaldia egin nahi die gure aurreko emakume guztiei eta berdintasunerako guneak eraikitzeko sare berriak sortu nahi ditu, Emakundeko iturriek azaldu dutenez.

Emakumeak bakeak eraikitzen nazioarteko batzarraren helburua da emakumeek bakegintza prozesuetan jokatu duten papera aztertzea, euskal emakumeek oraingo egoeran izan behar duten parte hartze aktiboa bultzatzeko.

Bi egunetan zehar aztertuko da bakearen eraikuntza teoria feministatik, ikusiko da emakumeak historikoki bakearen alde nola antolatu diren eta nazioarteko esperientziak ere aztertuko dira, hala nola, Latinoamerika, Ekialde Hurbila, Afrika, Balkanak eta Ipar Irlandakoak. Honekin batera, Euskal Herriko bakegintzarako gakoei buruz eztabaidatuko da.

Kongresua egituratzeko kontuan izan da bakea eraikitzeko prozesuaren garai ezberdinak: gatazkaren une latzenak, negoziazio uneak eta adiskidetze eta baketze garaia, azkenik.

Urriaren 23an, Eusko Jaurlaritzako lehendakariorde Idoia Zenarrutzabeitiak eta Emakundeko zuzendari Izaskun Moyuak emango diote hasiera kongresuari. Ondoren, UNEDeko Filosofia Moral eta Politikoko katedraduna den Amelia Valcarcelek inaugurazio txostena aurkeztuko du Bakegintza teoria feministatik izenburupean.

Ondorengo eztabaidagaia Emakumeak munduko bake-prozesuetan: pentsamendua eta praktikak izango da, eta honetaz hitz egingo dute Bakerako Ikerketen Mintegiko zuzendaria den Carmen Magallonek eta Europako Kontseiluko Parlamentu Batzarreko Berdintasun Batzordeko presidentea den Minodora Clivetik. Arratsaldean, Bakea izutik eraikitzea: gatazkan parte hartzea gaiaz arituko dira Kolonbiako Emakumeen Bakezko Ibilbideko Olga Lucia Ramirezek, Bat Shalom Beltzezko Emakumeak taldeko Debby Lerman israeldarrak, eta Jerusalem Center for Women-eko Amal Khriesh palestinarrak.

Urriaren 24an, lehenengo orduan eztabaidatuko den gaia Adiskidetzen: emakumeen ahotsak bake-negoziaketetan izango da eta eztabaidan parte hartuko dute Britainia Handiko International Alert-eko Maria Olsonek, Liberiako Emakumeen Ekimeneko Etweda A. Cooperrek, eta Ipar Irlandako Emakumeen Koalizioko Ann Hopek.

Bigarren eztabaidagaia izango da Bakea sendotzea: emakumeak gizarte-aldaketaren alde, eta hizlariak honako hauek izango dira: Kolonbiako Ordainketako eta Adiskidetzeko Batzorde Nazionaleko Patricia Buritica, Argentinako Maiatzeko Plazako Amen ordezkari Nora Cortiñas, Belgradeko Beltzezko Emakumeen ordezkari Stasa Zajovic eta Kosovoko Emakumeen Sareko Luljeta Vuniqi.

Arratsaldean, kongresua bukatzeko, gai nagusia Euskadiko bakegintzarako gakoak izango da eta eztabaidan parte hartuko dute Ahotsak ekimeneko ordezkariek, Alderdi Feministak, Plazandreok, Gernika Gogoratuzek, Bilgune Feministak eta emakumeen elkarteetako beste zenbait kidek.

Kongresuan parte hartzeko izena emateko epea datorren urriaren 16an bukatzen da, eta izen-emateak egiteko moduaz informazio gehiago dago www.sare-emakunde.com webgunean.


255 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin