Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-Elkar argitaletxeak aurtengo udaberrian sei musika diska berri kaleratuko ditu


2006-02-13 17:10

Iker Goenaga, Kupela Taldea, Juan Carlos Perez, Sugan, The Pub Ibiltaria eta Juan Mari Beltran artisten lanak irtengo dira

BILBO, 13 (EUROPA PRESS)

Elkar argitaletxeak 2006ko udaberrira begira guztira sei musika diska berri plazaratzea espero du, hain zuen ere Iker Goenaga, Kupela Taldea, Juan Carlos Perez, Sugan, The Pub Ibiltaria eta Juan Mari Beltran artisten lan berriak, Elkarretik prentsa-ohar baten bidez adierazitakoaren arabera.

Batetik, Amorrua diskoa Iker Goenaga trikitilariaren hirugarren lana da. Angel Unzu produktorearen laguntzaz, Ikerrek, tradizio etnikoa oinarri hartuz, disko moderno eta erakargarria gauzatu du. Folk fresko eta harrigarri honen kaleratze data martxoaren hasieran aurreikusia dago.

Kupela taldea Urola bailarako Zabale (trikitixa), Larrañaga (panderoa, ahotsa) eta Berastegi (perkusioa) hirukoteak osatzen dute. Erromerietan profesionalak ditugu eta maisuki uztartzen dituzte Larrañagaren bertsoak eta betiko trikitixa, festarako eta dantzarako gonbita luzatuz. Martxoaren erdialdera aterako dute Biziz zaitez bizi lana.

Zuzeneko errepertorioaren sonoritatea gordetzeko asmoz, estudioan zuzenean grabaturiko disko pertsonal bat dakar JC Perezek udaberrirako Hiriko istorioak lanean. Atlantic River, Hau berua eta Ikaro diskoetako zenbait abestiz gain, inoiz argitara eman gabeko hiruzpalau kantu eta Itoiz garaiko Astelehen urdin baten (1978) abestia birmoldatu ditu, pop-rock estilotik aldendu eta jazz formaziora gerturatuz. Fernan Irazoki (bateria), Chris Kase (tronpeta), Gonzalo Tejada (kontrabaxua), Andrey Okejniczak (saxoa) eta Alberto Urretxo (tronboia) ditu abentura berri honetan bidelagun.

Kaleratze data, martxoaren amaierarako.

Beasaingo talde gaztea da Sugan eta izen ebreko lana kaleratuko dute. Oinarrian hiru neska dituen talde honek lehenengo diskoa grabatuko du martxoaren lehen hamabostaldian. Konposizio guztiak beraienak dira eta JC Perez arduratuko da produkzioaz. Lehen entzunaldiko kantuak, pop ikutukoak, freskoak, etab. Argitalpen data apirilaren amaierarako dago jarrita.

Oskorrik, The Pub Ibiltariaren abenturari bide emanez, iazko Santo Tomas egunean Bilboko Pio Baroja plazan zuzenean hartutako kontzertuaren grabaketa dakarkigu. Kantu herrikoiaren bildumari taldeak eskaintzen dion hamargarren ale honetan kantuen play-backa eta partiturak ere aurkeztuko dira. Kaleratze data, apirilaren amaiera.

Azkenik, Arditurri (Elkar, 2002) lanaren ildotik jarraituz, hamabost kantu berri dakar Beltranek bere azken lanean, Orhiko xoria izenekoa. Musika tresna tradizionalak oinarri hartuz (txalaparta, txistua, xirula, ttunttuna, alboka, eskusoinua), kantu tradizionalak eta berak sortuak uztartu ditu, kolore anitzeko lan bikaina gauzatuz. Suso Saiz arduratu da produkzioaz eta maiatzaren hasieran argitaratuko da.


332 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin