Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-EikenBANK internet bidezko proiektuen lehiaketaren bigarren edizioa jarri du martxan Eiken Ikus-entzunezkoen Klusterrak


2009-01-23 11:28

BILBO, 23 (EUROPA PRESS)

Eiken Euskadiko Ikus-entzunezkoen Klusterrak EikenBANK internet bidezko proiektuen lehiaketaren bigarren edizioa jarri du abian. Eikenen proiekturik berritzaileenetako bat da, eta sortzaile gazteen talentu ez-profesionala Euskadiko ikus-entzunezkoen sektoreko enpresekin zuzenean harremanetan jartzea da bere helburu nagusia, lankidetza horretatik proiektu lehiakor berriak sor daitezen. Era berean, EikenBANKen helburua sorkuntzarako talentua aurkitzea da, eta talentu hori Euskadin gera dadin lortzea.

Eikeneko ardurtadunek adierazi dutenez, lehiaketaren bigarren edizioak lehenengoaren eskemari jarraitzen dio oinarrian, baina baditu nobedade batzuk ere. Proiektu irabazlea produzitzeko konpromisoaz eta 4.000 euroko diru-sariaz gain, proiektuaren titularrak zenbateko bereko beka bat jasoko du, lau hilabetez bere ideia garatuko duen produkzio-etxearekin batera lan egiteko.

Gainera, aurten, EikenBANKek Euskadiko produkzio-etxeetako erreferentziako programetako gidoigileen lankidetza izango du; izan ere, prestakuntza-zentroei, zine-eskolei eta unibertsitateei egin beharreko informazio-aurkezpenetan hartuko dute parte.

EikenBANKen arduradunek urteko lehenengo hiruhilekoan aurkeztuko dute ekimena, prestakuntza-zentroetako, zine-eskoletako eta ikus-entzunezkoekin lotutako zenbait titulazio unibertsitariotako ia 500 ikasleren aurrean.

Aurreko edizioan bezala, programa honetan ikus-entzunezko proiektu originalen bat duten gazte sortzaileek har dezakete parte, baldin eta ez badaude edukien esparruko sektoreko enpresekin lanean edo lankidetzan, modu profesional eta jarraituan. Programaren oinarriak eta prozedura osoa webgune batean dago jasota, zeinen bitartez ekimen osoa artikulatuko baita (www.eikenbank.com).

EikenBANKek proiektu bat hautatu eta sarituko du, eta proiektu hori programan parte hartzen duten ekoizpen-etxeetakoren batek edo batzuek garatuko dute profesionalki. Azken urrats gisa, proiektua EiTBn emitituko da. Era berean, programa honetatik beste lankidetza osagarri batzuk sortu ahal izango dira sorkuntzarako talentuaren eta Euskadiko ekoizpen-etxeen artean.

Helburua da talentua edo sormena aurkitzea, eta daukan ideia hori egia bihurtzeko aukera ematea; gainera, bere produktua profesionalekin batera gainbegiratu ahal izango du. Iaz 27 proiektu jaso genituen, espero genuena baino askoz ere gehiago, eta irabazlea, Alazne Paramo, dagoeneko lanean dago bere lehiaketaren garapenean, 3Koma produkzio-etxearen eskutik, azaldu du Eikeneko zuzendari Itziar Menak.

BIDERAGARRITASUNA

EikenBANK irekita dago ikus-entzunezko produktuetarako proiektu, gidoi, maketa edo pilotuetara (telebistako saioak; esate baterako, telesailak, lehiaketak, magazinak edo realityak, animazioko produktuak, dokumentalak, multimedia edukiak), baldin eta EikenBANK programaren barruan egituratutako formularioaren arabera aurkezten badira. Hori horrela, programaren arduradunek proiektuen originaltasuna eta bideragarritasun komertziala baloratuko dute, batez ere.

Eiken Euskadiko Ikus-entzunezkoen Klusterrak sustatutako proiektuak 3Koma, Baleuko, Canal Bizkaia, EiTB, Irusoin, Jarkatza, K2000, Orio Produkzioak eta Pausoka enpresen inplikazioa dauka. Gainera, babes instituzional handia dauka; hain zuzen ere, Eusko Jaurlaritzako Industria, Merkataritza eta Turismo Sailak eta Kultura Sailak, Bizkaiko eta Gipuzkoako Foru Aldundietako Berrikuntza sailek, SPRIk, Bilboko Udalak eta BBKren Gazte Lanbidean Fundazioak babesten dute ekimena.

Instituzioek modu positiboan baloratu dute elkarren lehian aritzen diren enpresak -Euskadiko ikus-entzunezkoen sektoreko garrantzitsuenak- proiektu batean elkartu izana, profesionala ez den talentuaren aldeko proiektu bat bultzatzeko. Aurreko edizioan bezala, ekimenak EHUren, Mondragon Unibertsitatearen eta EAEko zine-eskola guztien babesa dauka.

Proiektua ESCIVIko, Erandioko Ategorri - Tartanga Institutuko eta ikus-entzunezkoen ikerketarako IMVAL Zentroko ikasleei aurkeztu zaie dagoeneko. Datozen asteotan, Bizkaiko eta Arabako ikus-entzunezkoen zenbait ikastetxetan, Deustuko Unibertsitatean eta Mondragon Unibertsitatean aurkeztuko da, eta, bertan, Goenkale saioko gidoien zuzendaria den Pedro Fuentes arituko da. Lanak aurkezteko epea apirilaren 30ean amaitzen da.


338 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin