Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-EHUko doktore-tesi batek Pedro Salinas poetaren narratibak duen garrantzia aldarrikatzen du


2009-01-14 13:40

BILBO, 14 (EUROPA PRESS)

Euskal Herriko Uuniertsitateko (EHU) doktore-tesi batek Pedro Salinas 1927ko Belaunaldiko idazlearen lana ikertu du. Poesia-lanengatik bereziki ezaguna den arren, haren lana aztertu ondoren aurkeztutako tesiak baztertu egin du Salinasentzat narratiba bigarren mailako lana izan zela dioen hipotesia eta bere narratibak duen garrantzia aldarrikatu du tesiak.

Pedro Salinasek (Madril, 1891 - Boston, AEB, 1951) hainbat genero landu zituen, besteak beste, antzerkia, literatura-kritika eta poesia. EHUn aurkeztutako tesiak Salinasen lan guztiak aztertu ditu autorearen lan narratibo osoa ikertu ahal izateko.

Tesiaren egileak, Natalia Vara Ferrero doktoreak, La narrativa de Pedro Salinas (Pedro Salinasen narratiba) izenburua jarri dio ikerketa-lanari. Vara doktorea Hispaniar Filologian lizentziatua da, eta Espainiar Literaturan doktoratu da. Tesia EHUko Letren Fakultateko Hispaniar Filologia, Filologia Erromanikoa eta Literaturaren Teoria saileko Juan Jose Lanz Rivera doktoreak zuzendu du. Vara doktorea irakasle da sail berean.

Tesia egin ahal izateko, Varak egonaldiak egin ditu Berlingo Institutu Iberoamerikarrean eta Harvardeko Unibertsitateko Real Colegio Complutensen.

ANIZTASUNA

Pedro Salinasen lana eta bizitza egituratzen duen funtsezko ezaugarria da aniztasuna, eta islatu egiten da autorearen lan zabalaren oinarrian dauden ikuspegi, gai eta motibo anitzetan. Salinas ezaguna bada, poesiagatik da ezaguna. Poesia-lanen artean nabarmentzen da La voz a ti debida maisulana; baina, horretaz gainera, antzerkia, narratiba, saiakera, kritika eta literaturaren historia landu zituen.

Salinasen poesiak piztutako interesak kalte egin die gainontzeko lanei. Tesiaren egilearen esanetan, azaletik eta aurreiritziz beteta egindako irakurketetan oinarritzen dute bere iritzia kritiko gehienek -horietako batzuk uste dute Salinasen narratiban ez dela lantzen poesian ez dagoenik-. Baina Vara doktoreak azpimarratzen du, baita ere, urteetan ahaztua eta mesprezatua izan ondoren, Salinasen narratibarako gaitasuna kontuan hartzen hasi direla kritikoak azken urteetan. Hori bera gertatu zen lehenago antzerki-lanekin.

Vara doktoreak idazleak 1921etik 1951ra bitartean idatzi edo argitaratutako lan guztiak -argitaratuak eta argitaratu gabeak- hartu ditu kontuan tesia egiteko. Lanaren lehen zatian, sakon irakurri eta aztertu du material guztia, autorearen alderdi guztiak ezagutzeko eta haren bertute eta akatsak zorroztasunez baloratzeko. Lan horretan, tesiaren egileak berreskuratu egin ditu Un conocido por conocer eta argitaratu gabeko Los cuatro grandes mayusculos y la doncella Tiberica, El valor de la vida, Proyectos de cuentos eta Ultimos escritos lanak.

Salinasentzat narratiba bigarren mailako lana izan zela dioen hipotesia baztertu egin du Vara doktoreak. Testuek -argitaratutakoek eta argitaratu gabeek- erakusten dute Pedro Salinasen berezko aniztasunaren beste zati bat izan zela narratiba, antzerkiarekin, kritikarekin edo poesiarekin batera. Salinasen lan narratiboen artean nabarmentzekoak dira El valor de la vida, La bomba increible, Vispera del gozo eta El desnudo impecable y otras narraciones.

Tesiaren bigarren zatian, autorearen testu narratiboak sakon aztertu ditu ikertzaileak. Vara doktoreak testuak sortzeko prozesua aztertu ahal izan du, eta, lan arretatsu baten bidez, leheneratu egin ditu, eta jatorrizko forma, autoreak lehen edizioan eman nahi izan zuen hura, berreskuratu du -ondorengo edizioetan gehitutakoak kenduz, eta abar-.

Ikerketak frogatzen du, halaber, Pedro Salinasen lanak irakurlearentzako jakituria-iturri izateko sortuak izan zirela -printzipio eta balio garrantzitsuak aurkitu daitezke lan horietan-, eta lan horiek Salinasen narratiban nahitaezkoa den gaiari -errealitatea eta gizakiak ezagutzeko ahaleginari- jarraitzen diotela.


188 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin