Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-EAEn 823 milioi euro gastatu ziren I+G arloan 2005ean, aurreko urrtean baino %7,1 gehiago


2006-12-18 10:51

BILBO, 18 (EUROPA PRESS)

Euskal Autonomia Erkidegoan (EAE) 823 milioi euro gastatu ziren Ikerketa Zientifiko eta Garapen Teknologikoko (I+G) jardueretan. Gastu horretatik, 390 milioi Bizkaiari dagozkio (%47), 318 milioi Gipuzkoari (%39) eta 115 milioi Arabari (%14), Eustatek eman dituen datuen arabera.

I+Gko barne-gastuaren batez besteko hazkundea, aurreko urtearekin alderatuta, %7,1ekoa izan zen EAEn. Gipuzkoak eta Bizkaiak gainditu egin zuten batez besteko igoera hori, %10 eta %9ko gehikuntzekin, hurrenez hurren; Araban, ostera, %6 jaitsi zen.

BPGaren aldean I+Gko gastua ehunekotan konparatzean, Gipuzkoak egindako ahalegina nabarmena izan zen. EAEn, portzentaje hori %1,43 izan zen. Ildo horretan, Gipuzkoan adierazle horren ehunekoa %1,71 izan zen, Bizkaian %1,34 eta Araban %1,18. Hiru lurraldeetako ehunekoak Espainiako batez bestekoaren gainetik daude.

Exekuzio-sektoreari dagokionez, lurralde historiko bakoitzak berezitasunak agertzen ditu. Araban garrantzitsua izan zen, oraindik ere, Administrazio publikoaren sektoreko gastua; izan ere, administrazioaren menpe dauden hainbat erakunde pilatu ziren. Horren ondorioz, I+Gko baliabideetarako bideratutako gastuak %13 igo ziren. Oso bestelakoa izan zen enpresa-sektorearen joera, aurreko urtean baino 9 milioi gutxiago inbertitu baitziren eta horren eraginez gertatu zen barne-gastuaren atzerakada.

Gipuzkoan gastu txikiena izan zuen sektorea Administrazioa izan zen, baina enpresen sektoreak nabarmen egin zuen gora, bere enpresa-ehundura espezifikoaren ondorioz. Unibertsitatearen sektorearen mailak ona izaten jarraitu zuen, fakultate teknologikoengatik, eta baita aurtengo I+Gko baliabideetan izandako %7,3ko hazkundeagatik ere.

Bizkaiari dagokionez, bere gastuak altua izaten jarraitu zuen sektore guztietan. Unibertsitate sektorea nabarmendu zen, batez ere, Euskal Herriko Unibertsitateko Zientzia Fakultateak Leioako campusean kontzentratuta daudelako. Oso aipagarria izan zen 2005. urtean enpresa-sektoreko gastua 292 milioi eurotara iritsi izana, 2004. urtearen aldean %11ko hazkundea izan baitzen.

Finantzaketa pribatuaren garrantziak (%64), Estatuko batez bestekoaren gainetik (%46) kokatu zituen EAEko hiru lurraldeak, Alemania, AEB, Suitza eta Belgikaren parean, enpresek ikerketara bideratutako baliabideei dagokienez.

Gasturik handiena eta pertsonal gehien zuen diziplina zientifikoa ingeniaritza eta teknologia izan zen oraindik ere herrialde guztietan. Hala ere, lurralde historiko bakoitzak diziplina horretan gastatutako ehunekoak honakoak izan ziren: Gipuzkoak %83, Bizkaiak %70 eta Arabak %73.

Manufaktura-enpresei aplikagarri zaien teknologia-mailakako sailkapenaren arabera ere, alde esanguratsuak izan ziren lurraldeen artean. Araban goi-mailako eta erdi-goi mailako teknologiako sektoreetan batzen diren enpresek egindako barne-gastuak manufaktura-industriak egindako guztizko gastuaren %62 hartu zuen, eta Bizkaian nahiz Gipuzkoan %75.

Emakumeek I+G jardueretan duten parte-hartzeari dagokionez, Araban langile guztien %32 eta Gipuzkoan %29 bakarrik izan ziren emakumezkoak; Bizkaian, ostera %35. Ehuneko guztiak Estatuko batez bestekoaren azpitik daude, %37,8koa baita.


157 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin