Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-EAEko biztanleria landuna %1,6 gutxitu eta langabezia-tasa %4,6an kokatu zen 2008ko laugarren hiruhilekoan


2009-01-19 11:28

BILBO, 19 (EUROPA PRESS)

Euskal Autonomia Erkidegoko (EAE) lan-merkatuaren 2008ko laugarren hiruhilekoko datuen arabera, okupatuak 955.800 ziren, hau da, hiru hilabete lehenago baino 15.600 gutxiago (-%1,6), Eustaten datuen arabera. Bestalde, langabezia-tasa %4,6ra igo zen, aurreko hiruhilekoan baino 1,1 puntu gehiago alegia. Landunen eta langabeen bilakaeren ondorioz, jarduera-tasa %54,9ra jaitsi zen iazko azken hiruhilekoan.

Generoaren arabera, gizonei eragin zien batik bat okupazioaren jaitsierak, eta okupatuak aurreko hiruhilekoan baino 14.900 gutxiago ziren; emakumeen kasuan 800 gutxiago. Jaitsierak hiru herrialdeetan izan ziren: Bizkaiak 6.400 enplegu garbi gutxiago zituen, Gipuzkoak 5.500 gutxiago eta Arabak 3.700 gutxiago.

Industriak 9.400 enplegu garbi galdu zituen, Zerbitzuek 5.900 eta Nekazaritzak 300; Eraikuntzan ez zen aldaketarik izan 2008ko laugarren hiruhilekoan.

Landunen tasa, hau da, 16tik 64 urtera bitarteko biztanle-kopuruaren gainean landunek duten portzentajea, %67an kokatu zen, hots, hiru hilabete lehenago baino ia ehuneko puntu bat gutxiago. Tasa hori %74,8koa zen gizonezkoentzat eta emakumezkoentzat, berriz, %59,1ekoa.

Lurraldeka, okupazio-tasarik altuena Gipuzkoak zuen, %69,5ekin, aurreko hiruhilekoaren aldean puntu bat gutxiago; ondoren Arabak, %68,3rekin, ehuneko 1,6 puntu gutxiago; Bizkaiak zuen tasarik txikiena, %65,2, aurreko hiruhilekoan baino puntu erdia gutxiago.

Kontratu mugagabea duten soldatakoen kopurua 17.100 lagunetan jaitsi zen, 607.700 izanik; aldi baterakoa dutenak (kontraturik ez dutenak barne) 3.400 gutxiago ziren, 181.200 guztira.

EAEn zenbatetsitako 829.300 familia-etxeetako herenak ez zuen pertsona aktiborik. Hamarretik sei baino gehiagotan pertsona aktibo guztiak okupatuta zeuden, aurreko hiruhilekoan baino 7.200 familia gutxiago; pertsona aktibo guztiak langabezian zituztenak 13.100 ziren (guztirakoaren %1,6), aurreko hiruhilekoan baino 3.200 gehiago.

LANGABETUAK

Langabetuak, hots, lan bila aritu, bilatzeko kudeaketa aktiboak egin eta gainera lanerako prest daudenak, urteko laugarren hiruhilekoan 46.400 zirela zenbatetsi zen, 10.900 gehiago aurreko hiruhilekoan baino. Gizonezko langabetuen kolektiboak 23.000 lagun hartzen zituen, hau da, 4.100 gehiago. Emakumezkoen artean, 6.700 gehiago zeuden hirugarren hiruhilekoan, eta guztira 23.300 ziren.

2008ko laugarren hiruhilekoko datuen arabera, langabezia-tasa %4,6an zen, aurreko hiruhilekoaren aldean ehuneko 1,1 puntu gehiago. Gizonen langabeziari dagokionez, %4,1era igo zen (ehuneko 0,8 puntu gehiago), eta emakumeena 1,5 puntuz gehitu zen, %5,3 izanik. Gazteen langabezia-tasak altuena izaten segitzen zuen, %11,8, 2,6 puntuz igo zelarik; horrenbestez, 16-24 urte bitarteko 6.500 gazte aktibo zeuden langabezian.

EAEko hiru lurraldeetan igo zen langabetuen kopurua. Araban, 8.200 langabeturekin, kopurua 6.300etan hazi zen eta langabezia-tasa %5,4an zen. Bizkaian 1.700 langabe gehiago zeuden, eta tasa %4,9an zen. Gipuzkoan %3,9ko tasa zegoen, eta langabetuen kopuruan 3.000 pertsona gehiago zeuden, 12.800 guztira.

Bestalde, Eurostat Europar Batasuneko Estatistika Bulegoaren datuen arabera, 2008ko azaroan, 27-EBko langabezia-tasa %7,2an zen, eta Espainiakoa %13,4an.

Halaber, biztanleria landunak behera egin du azken 12 hilabeteetan. 2008ko laugarren hiruhilekoan, 2007koaren aldean, 18.600 pertsona gutxiago (-%1,9). Jaitsiera horrek gizonei eragin die batik bat, 20.600 enplegu gutxiago; emakumeen artean, berriz 1.900 gehiago.

Langabezia-tasa ehuneko 1,5 puntuz igo da azken urtean (%3,1etik %4,6ra). Beraz, 2008ko hondarrean 15.000 pertsona gehiago langabeak ziren EAEn. Araban ehuneko 3,4 puntuz igo da langabezia-tasa, Bizkaian puntu batean eta Gipuzkoan 1,5 puntuz azken 12 hileetan.


191 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin